720. මහණෙනි, වඩනා ලද්දාවූ බහුල කරන ලද්දාවූ නිරෝධ සඤ්ඤාව මහත්වූ යෝගක්ෂේමය පිණිස පවතියි. කෙසේ වඩනා ලද කෙසේ බහුල කරන ලද නිරෝධ සඤ්ඤාව මහත්වූ යෝගක්ෂේමය පිණිස පවතීද: මහණෙනි, මේ සස්නෙහි මහණතෙම විවේකය ඇසුරු කළ... නිරෝධ සඤ්ඤාවෙන් යුත් සති සම්බොජ්ඣංගය වඩයිද... උපෙක්ඛා සම්බොජ්ඣංගය වඩයිද, මහණෙනි, මෙසේ වඩනා ලද්දාවූ, මෙසේ බහුල කරන ලද්දාවූ නිරෝධ සඤ්ඤාව මහත්වූ යෝගක්ෂේමය පිණිස පවතියි.

721. මහණෙනි, වඩනා ලද්දාවූ බහුල කරන ලද්දාවූ නිරෝධ සඤ්ඤාව මහත්වූ සංවේගය පිණිස පවතියි. කෙසේ වඩනා ලද කෙසේ බහුල කරන ලද නිරෝධ සඤ්ඤාව මහත්වූ සංවේගය පිණිස පවතීද: මහණෙනි, මේ සස්නෙහි මහණතෙම විවේකය ඇසුරු කළ... නිරෝධ සඤ්ඤාවෙන් යුත් සති සම්බොජ්ඣංගය වඩයිද... උපෙක්ඛා සම්බොජ්ඣංගය වඩයිද, මහණෙනි, මෙසේ වඩනා ලද්දාවූ, මෙසේ බහුල කරන ලද්දාවූ නිරෝධ සඤ්ඤාව මහත්වූ සංවේගය පිණිස පවතියි.

722. මහණෙනි, වඩනා ලද්දාවූ බහුල කරන ලද්දාවූ නිරෝධ සඤ්ඤාව මහත්වූ පහසු විහරණය පිණිස පවතියි. කෙසේ වඩනා ලද කෙසේ බහුල කරන ලද නිරෝධ සඤ්ඤාව මහත්වූ පහසු විහරණය පිණිස පවතීද: මහණෙනි, මේ සස්නෙහි මහණතෙම විවේකය ඇසුරු කළ... නිරෝධ සඤ්ඤාවෙන් යුත් සති සම්බොජ්ඣංගය වඩයිද... උපෙක්ඛා සම්බොජ්ඣංගය වඩයිද, මහණෙනි, මෙසේ වඩනා ලද්දාවූ, මෙසේ බහුල කරන ලද්දාවූ නිරෝධ සඤ්ඤාව මහත්වූ පහසු විහරණය පිණිස පවතියි.

723-734. මහණෙනි, යම් සේ ගංගා නදිය පෙරදිගට නැමී, පෙරදිගට නැඹුරුව, පෙරදිගට බරව ගලා බසී ද, එපරිද්දෙන්ම මහණෙනි, භික්ෂුව සප්ත බොජ්ඣංගයන් වඩන්නේ, සප්ත බොජ්ඣංගයන් බහුල කරන්නේ, නිවනට නැමී, නිවනට නැඹුරුව, නිවනට බරව වාසය කරයි. මහණෙනි, කෙසේ නම් භික්ෂුව... සතිසම්බොජ්ඣංගය වඩයි ද... උපෙක්ඛාසම්බොජ්ඣංගය වඩයි ද... මහණෙනි, මෙසේ ඛො භික්ෂුව සප්ත බොජ්ඣංගයන් වඩන්නේ... නිවනට බරව වාසය කරයි. (මග්ග සංයුත්තයේ තිබෙන මෙහි පහත දක්වන වර්ගයන්හි ඇති ආර්ය අෂ්ටාංගික මාර්ගය වෙනුවට සප්තබොජ්ඣංගය යොදා විස්තර කළයුතුයි. මග්ගසංයුත්තයේ ගංගාපෙය්‍යාල වර්ගයේ මෙන් මෙහි සූත්‍ර දොළසක් වෙත්.)

735-744. මහණෙනි, යම්තාක් පාද නැත්තාවූ හෝ දෙපා ඇත්තාවූ හෝ සිව්පා ඇත්තාවූ හෝ බොහෝ පා ඇත්තාවූ හෝ සත්වයෝ වෙත් ද, තථාගත තෙමේ ඔවුන් අතර අග්‍ර යයි කියනු ලැබේ. මහණෙනි, එසේම යම් කුසල ධර්මයෝ වෙත් ද, ඒ සියල්ල අප්‍රමාදය මුල් කොට පවතී. අප්‍රමාදය ඒ ධර්මයන්ට අග්‍ර වේ. (මග්ගසංයුත්තයේ අප්පමාදවර්ගයේ මෙන් මෙහි සූත්‍ර දහයක් වෙත්.)

(බොජ්ඣංග වශයෙන් දස සූත්‍රය විස්තර කළ යුතුය.)