342. තිඋප්පලමාලිය ථේරාපදානය
“මම එකල්හි චන්‍ද්‍රභාග නදී තීරයෙහි වඳුරෙක් වීමි. එහිදී කඳු අතුරෙහි වැඩහුන් කෙළෙස් රජස් නැති බුදුරජුන් දුටිමි.
“දස දිගින් බබුළුවන්නාවූ, පිපීගිය උතුම්වූ සල් රුකක් වැනි ලකුණින් හා අනු ව්‍යඤ්ජනයන්ගෙන් යුත් බුදුරජුන් දැක සතුටු වීමි.
“ඔදවැඩි සිත් ඇත්තේ, සොම්නස්වූයේ, ප්‍රීතියෙන් පිනා ගියේ, උපුල් මල් තුනක් මතුයෙහි දමා පිදීමි.
“විපස්සී බුදුජුන්හට මෙම මල් පුදා, ගෞරව සහිතව ගොස් උතුරු දිගට මුහුණ ලා ගියෙමි.
“පැහැදි සිතින් සීඝ්‍රව යන්නේ, කඳු අතුරෙහි වැටී ජිවිතක්‍ෂයට පැමිණියෙමි.
“මැනවින් කරණලද එම කර්‍මය කරණකොට ගෙනද, චිත්ත ප්‍රණිධීන් කරණ කොට ගෙනද, මිනිස් සිරුර හැර මම තව්තිසා දෙව් ලොවට ගියෙමි.
“මම තුන්සිය වරක් දිව්‍ය රාජ්‍යය කෙළෙමි. පන්සිය වරක් සක්විති රජ වීමි.
“මින් එක් අනූවන කපෙහි යම් පුෂ්ප පූජාවක් කරණ ලදද, ඒ හේතුවෙන් දුගතියක් නොදනිමි. බුද්ධ පූජාවෙහි මේ විපාකයයි.
“සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් තිඋප්පලමාලිය තෙරුන් වහන්සේ මෙම ගාථාවන් වදාළ සේක.
තීණුප්පලමාලියත්ථෙරස්සාපදානං දුතියං.
343. ධජදායක ථේරාපදානය
“ලොක ජ්‍යෙෂ්ඨවූ, නරශ්‍රේෂ්ඨවූ, තිස්ස නම් ශාස්තෘ තෙමේ ලොව පහළ විය. උන්වහන්සේගේ උපධික්‍ෂය දැක මා විසින් ධජයක් නගන ලදී.
“මැනවින් කරණ ලද එම කර්‍මය කරණ කොට ගෙනද මම මිනිස් සිරුර හැර තව්තිසාවට ගියෙමි.
“මම තුන්සිය වරක් දිව්‍ය රාජයය කරවීමි. එසේම, පන්සිය වරක් සක්විති රජ වීමි.
“කරවන ලද ප්‍රදේශ රාජ්‍ය ගණන් වශයෙන් ගිණිය නොහැකිය. පෙර තමා විසින් මනාකොට කරණලද ස්වකීය කර්‍ම ඵලය අනුභව කරමි.
“මින් දෙයානූවන කපෙහි වූ එකල්හි යම් කර්‍මයක් කෙළෙම්ද, ඒ හේතුවෙන් දුගතියක් නොදනිමි. ධජ දානයාගේ මේ විපාකයයි.
“මම අද කැමතිවන්නේ නම් කඳු වන සහිතවූ ලෝකය කොමුපිලියෙන් වසන්නෙමි. මේ එදා මා විසින් කරන ලද පුණය කර්‍මයාගේ විපාකයයි.
“සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් ධජදායක තෙරුන් වහන්සේ මෙම ගාථාවන් වදාළ සේක.
ධජදායකත්ථෙරස්සාපදානං තතියං.
344. තිකිඞ්කිණිපූජක ථේරාපදානය
“හිමවතට නුදුරෙහි “භුතගණ” නම් පර්‍වතයක් විය. එහිද ගස් මුදුනක එල්ලන ලද පවුල් සිවුරක් දුටිමි.
“මම එකල්හි කිකිණි මල් තුනක් කඩා, සතුටුවූයේ සතුටු සිතින් පවුල් සිවුරට පිදීමි.
“මින් තිස් එක්වන කපෙහි වූ එකල්හි යම් කර්‍මයක් කෙළෙම්ද, ඒ හේතුවෙන් දුගතියක් නොදනිමි. කිකිණි මල් තුනක් පිදීමෙහි මේ විපාකයයි.
“සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් තිකිඞකණි පූජක තෙරුන් වහන්සේ මෙම ගාථාවන් වදාළ සේක.
තිකිඞ්කණිපූජකත්ථෙරස්සාපදානං චතුත්ථං.
345. නළාගාරික ථේරාපදානය
“හිමවතට නුදුරෙහි භාරිත නම් පර්‍වතයක් විය. නාරද නම් බුදුරජතෙම රුක් මුලක විසූහ.
“මම බට කුටියක් කොට එහි තණ සෙවිළි කළෙමි. එහි සක්මණක්ද පිරිසිදුකොට තථාගතයන් වහන්සේට දුනිමි.
“මම තුදුස්වන කපෙහි දෙව්ලොව සිත් අලවා විසීමි. සූසැත්තෑ වරක් දිව්‍ය රාජ්‍යය කරවීමි.