154. කක්කාරු පූජක ථේරාපදානය
“දිව්‍යපුත්‍රයෙකුවූ මම සිඛී බුදුරජුන් පිදීමි. කැකිරි මලක්ද ගෙන (එම) බුදුරජුන්හට පිදීමි.
“මින් එක්තිස්වන කපෙහි යම් මලක් පිදුයෙම්ද, (ඒ හේතුවෙන්) දුගතියක් නොදනිමි. බුද්ධ පූජාවෙහි මේ විපාකයයි.
“මින් නවවන කපෙහි සත්රුවනින් යුත්, මහත් බල ඇති සත්තුත්තම නම් සක්විති රජෙක් වීමි.
“මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් කක්කාරු පූජක තෙරුන් වහන්සේ මෙම ගාථාවන් වදාළ සේක.
කක්කාරුපූජකත්ථෙරස්ස අපදානං චතුත්ථං.
155. මන්දාරව පූජක ථේරාපදානය
“දිව්‍යපුත්‍රයෙකුවූ මම සිඛී බුදුරජුන් පිදීමි. මදාරා මලක්ද ගෙන (එම) බුදුරජුන්හට පිදීමි.
“සත් දිනක් මුළුල්ලෙහිම තථාගතයන් කෙරෙහි (එය) දිව්‍යමය වියනක් විය. සියලු ජනයෝ එක්ව තථාගතයන් වහන්සේට නමස්කාර කළාහුය.
“මින් එක්තිස්වන කපෙහි යම් මල් පූජාවක් කෙළෙම්ද, (ඒ හේතුවෙන්) දුගතියක් නොදනිමි. බුද්ධ පූජාවෙහි මේ විපාකයයි.
“මින් දසවෙනි කපෙහි සත්රුවනින් යුත්, මහත් බල ඇති ජුතින්‍ධර නම් සක්විති රජෙක් වීමි.
“මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් මන්දාරව පූජක තෙරුන් වහන්සේ මෙම ගාථාවන් වදාළ සේක.
මන්දාරවපූජකත්ථෙරස්ස අපදානං පඤ්චමං.
156. කදම්බ පුප්ඵිය ථේරාපදානය
“හිමවතට නුදුරෙහි කුක්කුට නම් පර්වතයක් විය. එම පර්‍වත පාදයෙහි (පසේ) බුදුවරු සත්නමක් වෙසෙත්.
“උඩට නැංගාවූ සඳු වැනිව (බබළන) පිපුනු කොළොම් ගසක් දැක (මල්) දොහොතින් ගෙන සත් පසේබුදුවරයන් කෙරෙහි පිදීමි.
“මින් අනූහතරවන කපෙහි යම් මල් පූජාවක් කෙළෙම්ද (ඒ හේතුවෙන්) දුගතියක් නොදනිමි. බුද්ධ පූජාවෙහි මේ විපාකයයි.
“මින් දෙඅනූවන කපෙහි සත්රුවනින් යුත් මහත් බල ඇති පුප්ඵ නම්වු සත් සක්විති රජ කෙනෙක් වූහ.
“මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් කදම්බ පුප්ඵිය තෙරුන් වහන්සේ මෙම ගාථාවන් වදාළ සේක.
කදම්බපුප්ඵියත්ථෙරස්ස අපදානං ඡට්ඨං.
157. තිණසුලක ථේරාපදානය
“හිමවතට නුදුරෙහි භූතගණ නම් පර්වතයක් විය. එහි සියල්ල තෙමේම දැන ගත් ලොව හා නොගැටුණු එක් (සිඛී නම්) සර්‍වඥවරයෙක් වැඩ වෙසෙති.
“බෝලිද්ද මල් ගෙන (එම) බුදුරජුන්හට පිදීමි. (ඒ හේතුවෙන්) එකුන් සියක් දහස් කපක් මුලුල්ලෙහි දුගතියකට නොගියේ වෙමි.
“මින් එකොලොස්වන කපෙහි සත්රුවනින් යුත් මහත් බල ඇති ධරණීරුහ නම් එක් සක්විති රජෙක් වීමි.
“මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් තිණසුලක තෙරුන් වහන්සේ මෙම ගාථාවන් වදාළ සේක.
තිණසූලකත්ථෙරස්සාපදානං සත්තමං.
158. නාගපුප්ඵිය ථේරාපදානය
“මන්ත්‍රයන්හි පරතෙරෙට ගිය නාමයෙන් සවච්ඡ නම්වූ බමුණෙක් ස්වකීය ශිෂ්‍යයන් සමග පර්වතාන්තරයෙහි වෙසෙයි.
“ලෝකයාගේ පූජාවන් පිළිගන්නාවූ පදුමුත්තර නම් ඒ සර්‍වඥ තෙමේ මා (සසර සයුරින්) ගොඩනගනු කැමැත්තේ මා සමීපයට පැමිණිසේක.
“(පැමිණ) අහසෙහි සක්මන් කරයි. ධූම දමයි. එසේම බබළයි. (එසේකොට) මාගේ සතුට දැන ප්‍රාචීන දේශාභිමුඛව වැඩිසේක.
“විෂ්මයජනක, ලොමු දැහැගන්නාවූ එම ආශ්චර්‍ය්‍ය දැක නාමල් ගෙන, (වැඩම කළ) මගෙහි ඉසීමි.
“මින් සියක් දහස්වන කපෙහි මම යම් මල් විසිරවීමක් කෙළෙම්ද, එම චිත්ත ප්‍රසාදය කරණකොටගෙන මම දුගතියක නොඉපදුනෙමි.
“මින් එක්තිස් සියවන කපෙහි සත්රුවනින් යුත්, මහත් බල ඇති මහාරථ නම් සක්විති රජෙක් වීමි.
“මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් නාගපුප්ඵිය තෙරුන් වහන්සේ මෙම ගාථාවන් වදාළ සේක.
නාගපුප්ඵියත්ථෙරස්ස අපදානං අට්ඨමං.