118. මග්ග සඤ්ඤක ථේරාපදානය
1742. “පදුමුත්තර බුදුරජාණන් වහන්සේගේ වචනයෙහි හැසිරෙන ශ්‍රාවකයෝ මහවනයෙහි මංමුළාවූවාහු අන්‍ධවූවෝ මෙන් ඒ මේ අත හැසිරෙත්.
1743. “පදුමුත්තර බුදුරජාණන් වහන්සේගේ ඒ මහ වෙනෙහිවූ මංමුළාවූ ශ්‍රාවකයන්ද සිහිකොට (සංවේගයට පත්වීමි.)
1744. “භවනයෙන් බැස එම භික්‍ෂූන් වෙතට පැමිණයෙමි. මම උන්වහන්සේලාට මාර්‍ගයද කීමි. බොජුන්ද දුනිමි.
1745. “විපදෝත්තමයන් වහන්ස, ලෝක ජ්‍යෙෂ්ඨයන් වහන්ස, නරශ්‍රේෂ්ඨයන් වහන්ස, එම පුණ්‍ය කර්‍මය කරණ කොට ගෙණ උත්පත්තියෙන් සත් හැවිරිදිවූ මම රහත් බවටද පැමිණියෙමි.
1746. “මින් පන්සියවන කපෙහි සත්රුවනින් යුත් නම්න් සචක්ඛු නම්වූ දොළොස් සක්විති රජ කෙනෙක් වූහ.
1747. “මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
ඉත්ථං සුදං ආයස්මා මග්ගසඤ්ඤකො ථෙරො ඉමා ගාථායො අභාසිත්ථාති.
මග්ගසඤ්ඤකත්ථෙරස්සාපදානං අට්ඨමං.
119. පච්චුපඨාන සඤ්ඤක ථේරාපදානය
1748. “අත්‍ථදස්සී බුදුරජුන් පිරිනිවීමට අනතුරුව යසසට පත් මම යක්‍ෂ යෝනියෙහි ඉපදුනිමි. එකල්හි (මම මෙසේ සිතීමි.)
1749. “මාගේ සම්පත් පවත්නා කල්හි යම් හෙයකින් බුදුරජාණන් වහන්සේ පිරිනිවි සේක්ද, එය මට අයහපත් ලැබුමක් විය, අයහපත් උදෑසනක් විය, අයහපත් හිරු උදාවක් විය, කියායි.
1750. “(මෙසේ සිතන්නාවූ) මාගේ අදහස සාගර නම් ශ්‍රාවකයෙක් තෙම දැනගෙන හෙතෙමේ මා (දුකින්) ගොඩගනු කැමැත්තේ මාගේ සමීපයට පැමිණියේය.
1751. “නුවණැත්ත, (ඔබ) කිම ශෝක කරහිද? බිය නොවනු මැනවි. ධර්‍මයෙහි හැසිරෙන්නා බුදුරජුන් විසින් සියළු දෙනාගේ කුශල බීජ සම්පත්තිය මනාසේ දෙන ලදී.
1752. “යමෙක් ජීවමානවූ ලෝකනායක බුදුරජුන් පුදන්නේනම් (එසේම) පිරිනිවි බුදුරජුන්ගේ අබැටක් පමණවූ ධාතූන් වහන්සේ නමකුදු පුදන්නේය.
1753. “චිත්ත ප්‍රසාදය සමවූ කල්හි පිණද සමානය. මහත් බවට ගියේද වේ. එහෙයින් සෑයක් කොට සර්වඥ ධාතූන් පුදනු මැනව කියායි.”
1754. “සාගර ශ්‍රාවකයන් වහන්සේගේ වචනය අසා මම සර්වඥ (ධාතු නිදන්කොට) සෑයක් කෙළෙමි. (ඒ) බුදු රජුන්ගේ උතුම් සෑය පස් වසක්ම පරිවරණය කෙළෙමි.
1755. “විපදෝත්තමයන් වහන්ස, ලෝක ජ්‍යෙෂ්ඨයන් වහන්ස, නරශ්‍රේෂ්ඨයන් වහන්ස, එම පුණ්‍ය කර්‍මය කරණ කොට ගෙන සම්පත් අනුභව කොට රහත් බවට පැමිණියෙමි.
1756. “මින් සත්සියවන කපෙහි සත්රුවනින් යුත් මහත් බල ඇති භූරිපඤ්ඤ නම් සිව් සක්විති රජ කෙනෙක් වූහ.
1757. “මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
ඉත්ථං සුදං ආයස්මා පච්චුපට්ඨානසඤ්ඤකො ථෙරො ඉමා ගාථායො අභාසිත්ථාති.
පච්චුපට්ඨානසඤ්ඤකත්ථෙරස්සාපදානං නවමං.
120. ජාති පූජක ථේරාපදානය
1758. “විපස්සී බුදුරජාණන් වහන්සේ ලොව පහළවූ කල්හි සාගර පර්‍වත සහිතවූ පෘථිවිය කම්පණය විය.
1759. “නිමිත්ත පාඨකයෝ මෙසේ පැවසූහ. (කෙසේද යත්?) සියළු සත්ත්‍වයන් අතුරෙන් ශ්‍රේෂ්ඨවූ සර්වඥ තෙම ලොව පහළවන්නේය. ජන සමූහය සසර සයුරින් නගා සිටුවන්නේය.”
1760. “මම නිමිත්ත පාඨකයන්ගේ වචනය අසා (උත්පත්තිය නිමිතිකොට පැවැත්වූ) ජාති පූජාව කෙළෙමි. (බුදුරජුන්ගේ උපත පිළිබඳව පවත්වන ලද) ජාති පූජාව යම්බඳු නම් එබඳු උතුම් පූජාවක් (ලෙව්හි) නැත.
1761. “කුසල් කොට සිත පැහැදවීමි. එහිදී (එම) ජාති පූජාව කොට කළුරිය කෙළේ වෙමි.