5. කෙසකම්බලූපම සූත්‍රය
138. “මහණෙනි, නූල්වලින් වියන ලද යම් වස්ත්‍ර වෙද්ද, ඒ පොරෝනයන් අතුරෙන් හිසකෙස්වලින් වියන ලද කම්බලය ඉතා පහත්යයි කියනු ලැබේද, මහණෙනි, කෙශකම්බලය, ශීත කාලයෙහි සීතලය, උෂ්ණ කාලයෙහි උෂ්ණය. දුර්වර්ණය, දුර්ගන්‍ධය. මහණෙනි, එසේම බොහෝවූ ශ්‍රමණ වාදයන් අතුරෙන්, මක්ඛලී වාදය ඉතා පහත්යයි කියනු ලැබේ.
“මහණෙනි, මක්ඛලී හිස් පුරුෂ තෙමේ මෙබඳු වාද ඇත්තේ, මෙබඳු දෘෂ්ටි ඇත්තේ වෙයි. “නත්ථි කම්මං, නත්ථි කිරියං, නත්ථි විරිය”න්ති.
“මහණෙනි, අතීත කාලයෙහි යම් ඒ අර්‍හත්වූ සම්‍යක් සම්බුදුවරයෝ වූවාහුද, ඒ භාග්‍යවතුන් වහන්සේලාද කර්‍මවාදීහු, ක්‍රියාවාදීහු, විරියවාදීහු වූවාහුය. “මහණෙනි, මක්ඛලී හිස් පුරුෂ තෙමේ මෙබඳු වාද ඇත්තේ, මෙබඳු දෘෂ්ටි ඇත්තේ වෙයි. කර්‍මයක් නැත, ක්‍රියාවක් නැත, වීර්‍ය්‍යයක් නැත කියායි.
“මහණෙනි, අනාගත කාලයෙහි අර්‍හත්වූ යම් සම්‍යක් සම්බුදුවරයෝ වන්නාහුද, මක්ඛලී හිස් පුරුෂ තෙමේ, ඒ භාග්‍යවතුන් වහන්සේලාද කර්‍මයක් නැත, ක්‍රියාවක් නැත, විර්‍ය්‍යයක් නැතැයි ප්‍රතික්‍ෂෙප කරයි.
“මහණෙනි, මේ කාලයෙහි අර්‍හත් සම්‍යක් සම්බුද්ධවූ මමද කර්‍මවාදී වෙමි, ක්‍රියාවාදී වෙමි, වීර්‍ය්‍යවාදී වෙමි. මහණෙනි, මක්ඛලී හිස් පුරුෂ තෙම කර්‍මයක් නැත, ක්‍රියාවක් නැත, වීර්‍ය්‍යයක් නැතැයි මාද ප්‍රතික්‍ෂෙප කරයි.
“මහණෙනි, යම්සේ ගංගා දොරටුවෙහි කෙමිනක් දමන්නේ නම්, බොහෝ මත්ස්‍යයන්ගේ අහිත පිණිස, දුක් පිණිස, හානිය පිණිස, විනාශය පිණිස පවත්නේද, මහණෙනි, එපරිද්දෙන්ම, මක්ඛලී හිස් පුරුෂ තෙම බොහෝ සත්ත්‍වයන්ගේ අහිත පිණිස, දුක් පිණිස, හානිය පිණිස, විනාශය පිණිස ලෝකයෙහි උපන් මිනිස් කෙමිනකැයි හඟිමි.”
6. තිසම්පදා සූත්‍රය
139. “මහණෙනි, මේ සම්පත් තුනෙකි.
කවර තුනෙක්ද? ශ්‍රද්ධා සම්පත්තියද, සීල සම්පත්තියද, ප්‍රඥා සම්පත්තියද වෙත්.
මහණෙනි, මේ ත්‍රිවිධ සම්පත්තීහුය.”
7. වුද්‍ධිත්තය සූත්‍රය
140. “මහණෙනි, මේ අභිවෘද්ධි තුනෙකි.
කවර තුනක්ද? ශ්‍රද්ධා අභිවෘද්ධියද, ශීල අභිවෘද්ධියද, ප්‍රඥා අභිවෘද්ධියද, වෙයි.
මහණෙනි, මේ අභිවෘද්ධි තුනයි.
8. ඛලුඞ්ක සූත්‍රය
141. “මහණෙනි, අශ්ව පෝතකයන් තිදෙනෙකුත්, පුරුෂ පෝතකයන් තිදෙනෙකුත් දේශනා කරන්නෙමි. එය අසව්. මනාකොට මෙනෙහි කරව්. කියන්නෙමි.” “එසේය, ස්වාමීනි,” යි කියා ඒ භික්‍ෂුහු භාග්‍යවතුන් වහන්සේට පිළිතුරු දුන්හ. භාග්‍යවතුන් වහන්සේ මෙසේ දේශනා කළ සේක.
“මහණෙනි, අශ්ව පොතකයන් තිදෙනා නම් කවරහුද?
මහණෙනි, මේ ලෝකයෙහි ඇතැම් අශ්ව පෝතකයෙක් ජවයෙන් යුක්ත වෙයි. වර්‍ණයෙන් යුක්ත නොවෙයි. උස මහතින් යුක්ත නොවෙයි. මහණෙනි, ලෝකයෙහි ඇතැම් අශ්ව පෝතකයෙක් ජවයෙන් යුක්තවූයේද වෙයි. වර්‍ණයෙන් යුක්තවූයේද වෙයි. උස මහතින් යුක්තවූයේ නොවෙයි. මහණෙනි, ලෝකයෙහි ඇතැම් අශ්ව පොතකයෙක් ජවයෙන් යුක්තවූයේද වෙයි. වර්‍ණයෙන් යුක්තවූයේද වෙයි. උස මහතින් යුක්තවූයේද වෙයි. මහණෙනි, මේ අශ්ව පෝතකයෝ තිදෙන වෙත්.
“මහණෙනි, පුරුෂ පෝතකයෝ තිදෙන කවරහුද?
මහණෙනි, මේ ලෝකයෙහි ඇතැම් පුරුෂ පෝතකයෙක් ජවයෙන් යුක්ත වූයේ වෙයි. වර්‍ණයෙන් යුක්ත වූයේ නොවෙයි. උස මහතින් යුක්ත වූයේ නොවෙයි. මහණෙනි, මේ ලෝකයෙහි ඇතැම් පුරුෂ පෝතකයෙක් ජවයෙන් යුක්තවූයේද වෙයි. වර්‍ණයෙන් යුක්තවූයේද වෙයි. උස මහතින් යුක්තවූයේ නොවෙයි. මහණෙනි, ලෝකයෙහි ඇතැම් පුරුෂ පොතකයෙක් ජවයෙන් යුක්තවූයේද වෙයි. වර්‍ණයෙන් යුක්තවූයේද වෙයි. උස මහතින් යුක්තවූයේද වෙයි.
“මහණෙනි, කෙසේ නම් පුරුෂ පෝතක තෙම ජවයෙන් යුක්ත වෙයිද, වර්‍ණයෙන් යුක්ත නොවෙයිද, උස මහතින් යුක්ත නොවෙයිද?
“මහණෙනි, මේ ශාසනයෙහි මහණ තෙම මෙය දුකයයි තත්ත්‍වාකාරයෙන් දනීද, මේ දුකට හේතුවයයි තත්ත්‍වාකාර යෙන් දනීද, මේ දුක නිරුද්‍ධ කිරීමයයි තත්ත්‍වාකායෙන් දනීද, මේ දුක නිරුද්ධකිරීමේ මාර්‍ගයයයි තත්ත්‍වාකාරයෙන් දනීද, මෙය ඔහුගේ ජවයයි කියමි. “අභිධර්‍මයෙහි හෝ අභිවිනයෙහි ප්‍රශ්නයක් අසන ලද්දේ පැකිලෙයිද, නොවිසඳයිද, මෙය ඔහුගේ වර්‍ණයෙන් යුක්ත නොවීමයයි කියමි. චීවර, පිණ්ඩපාත, සේනාසන, ගිලානප්පව්වය, භෙසජ්ජ පරික්ඛාරයන්ගේ ලාභියෙක් නොවේද, මෙය ඔහුගේ උස මහතින් යුක්ත නොවීමයයි කියමි. මහණෙනි, මෙසේ වනාහි පුරුෂ පොතක තෙම ජවයෙන් යුක්තවූයේ වෙයි. වර්‍ණයෙන් යුක්ත නොවූයේද වෙයි. උස මහතින් යුක්ත නොවූයේද වෙයි.