4. 1. 2.
දෙවන ශික්ෂාපදය
1. සැවැත් නුවරදී පැනවූ ශික්ෂාපදයයි – එකල ෂඩ්වර්ගික භික්ෂුණීන් රහස් ප්‍රදේශයෙහි ලොම් ඉවත් කරවා, අචිරවතී නදියෙහි ගණිකාවන් සමඟ නිරුවතින් එකම තොටෙහි නාති. ගණිකාවෝ හෙළා දකිති, නුගුණ කියති, දොස් පතුරුවති: “කාමසැප විඳින ගිහි කාන්තාවන් මෙන් භික්ෂුණීන් රහස් ප්‍රදේශයෙහි ලොම් ඉවත් කරවන්නේ කෙසේ ද?” කියා.
2. හෙළා දකින, නුගුණ කියන, දොස් පතුරුවන ඒ ගණිකාවන්ගේ (අපකීර්ති වචන) භික්ෂුණීහු ඇසූහ. අල්පේච්ඡ (ආශා අඩු) වූ යම් ඒ භික්ෂුණීහු වෙත් ද -පෙ- ඔවුහු හෙළා දකිති, නුගුණ කියති, දොස් පතුරුවති: “ෂඩ්වර්ගික භික්ෂුණීන් රහස් ප්‍රදේශයෙහි ලොම් ඉවත් කරවන්නේ කෙසේ ද?” කියා. -පෙ- “මහණෙනි, ෂඩ්වර්ගික භික්ෂුණීන් රහස් ප්‍රදේශයෙහි ලොම් ඉවත් කරවන බව සැබෑ ද?” “සැබෑ ය, භාග්‍යවතුන් වහන්ස.” භාග්‍යවත් බුදුරජාණන් වහන්සේ ගැරහූ සේක. -පෙ- “මහණෙනි, ෂඩ්වර්ගික භික්ෂුණීන් රහස් ප්‍රදේශයෙහි ලොම් ඉවත් කරවන්නේ කෙසේ ද? මහණෙනි, මෙය නොපැහැදුණු අයගේ පැහැදීම පිණිස හෝ නොවේ. -පෙ- මහණෙනි, භික්ෂුණීහු මේ ශික්ෂාපදය මෙසේ උදෙසිය යුතු ය (ප්‍රකාශ කළ යුතු ය):
“යම් භික්ෂුණියක් රහස් ප්‍රදේශයෙහි ලොම් ඉවත් කරවයි නම් පාචිත්තිය ඇවැත් වේ” යනුයි.
3. යා පන (යම්): යම්, යම් බඳු -පෙ- භික්ඛුනී (භික්ෂුණිය): -පෙ- මේ අර්ථයෙහි අදහස් කරන ලද්දේ මේ භික්ෂුණිය යි.
සම්බාධ (රහස් ප්‍රදේශය) නම්: කිහිලි දෙක ද මුත්‍රා මාර්ගය ද යි.
සංහරාපෙය්‍ය (ඉවත් කරවයි නම්): එක් ලොමක් පමණක් වුව ද ඉවත් කරවයි නම් පාචිත්තිය ඇවැත් වේ. ලොම් බොහෝ ගණනක් ඉවත් කරවයි නම් ද පාචිත්තිය ඇවැත් වේ.
ඇවැත් නැත: රෝගයක් හේතුවෙන් කරවන්නියට ඇවැත් නැත. සිහි විකල් වූවෙකුට ද -පෙ- මුලින්ම මේ වරද කළ තැනැත්තාට (ආදිකම්මිකයාට) ද ඇවැත් නැත.
දෙවන ශික්ෂාපදය යි.
4. 1. 3.
තෙවන ශික්ෂාපදය
1. සැවැත් නුවරදී පැනවූ ශික්ෂාපදයයි – එකල භික්ෂුණීන් දෙදෙනෙක් බඹසර කෙරෙහි නොඇල්මෙන් පෙළුණාහු, කාමරයකට පිවිස තලඝාතකය (මුත්‍රා මාර්ගයට අතුලෙන් පහර දීම) කරති. භික්ෂුණීහු ඒ ශබ්දය අසා දුව ඇවිත් ඒ භික්ෂුණීන්ට මෙසේ කීහ: “ආර්යාවෙනි, ඔබ පුරුෂයන් සමඟ දූෂිත වන්නේ කුමක් නිසා ද?” “ආර්යාවෙනි, අපි පුරුෂයන් සමඟ කිසිසේත් දූෂිත නොවන්නෙමු.” ඔවුහු මේ කරුණ භික්ෂුණීන්ට දැන්වූහ.
2. අල්පේච්ඡ (ආශා අඩු) වූ යම් ඒ භික්ෂුණීහු වෙත් ද -පෙ- ඔවුහු හෙළා දකිති, නුගුණ කියති, දොස් පතුරුවති: “භික්ෂුණීන් තලඝාතකය කරන්නේ කෙසේ ද?” කියා. -පෙ- “මහණෙනි, භික්ෂුණීන් තලඝාතකය කරන බව සැබෑ ද?” “සැබෑ ය, භාග්‍යවතුන් වහන්ස.” භාග්‍යවත් බුදුරජාණන් වහන්සේ ගැරහූ සේක. -පෙ- “මහණෙනි, භික්ෂුණීන් තලඝාතකය කරන්නේ කෙසේ ද? මහණෙනි, මෙය නොපැහැදුණු අයගේ පැහැදීම පිණිස හෝ නොවේ. -පෙ- මහණෙනි, භික්ෂුණීහු මේ ශික්ෂාපදය මෙසේ උදෙසිය යුතු ය (ප්‍රකාශ කළ යුතු ය):
“තලඝාතකයෙහි (මුත්‍රා මාර්ගයට පහර දීමෙහි) පාචිත්තිය ඇවැත් වේ” යනුයි.