19. අබ්භානයට සුදුසු භික්ෂුවට කරන මූලායපටිකස්සනාව ආදිය
1. ඔහු මානත පුරා අවසන් කොට, අබ්භානයට (ඇවැතින් නිදහස් කොට නැවත සංඝයා අතරට ගැනීමට) සුදුසු ව සිටිය දී, ඒ අතරතුර දින පහක් සැඟවූ එක් සඤ්චේතනික සුක්කවිසට්ඨි ඇවැතකට පැමිණියේ ය. ඔහු භික්ෂූන්ට “ඇවැත්නි, මම පක්ෂයක් සැඟවූ එක් සඤ්චේතනික සුක්කවිසට්ඨි ඇවැතකට පැමිණියෙමි -පෙ- ඒ මම මානත පුරා අවසන් කොට, අබ්භානයට සුදුසු ව සිටිය දී, ඒ අතරතුර දින පහක් සැඟවූ එක් සඤ්චේතනික සුක්කවිසට්ඨි ඇවැතකට පැමිණියෙමි. මා කෙසේ පිළිපැදිය යුතු ද?” යි දැන්වූයේ ය. ඒ භික්ෂූන් මේ කරුණ භාග්යවතුන් වහන්සේට දැන්වූහ. (භාග්යවතුන් වහන්සේ මෙසේ වදාළ සේක:) “මහණෙනි, එසේ නම් සංඝයා උදායී භික්ෂුවට, අතරතුර පැමිණි, දින පහක් සැඟවූ එක් සඤ්චේතනික සුක්කවිසට්ඨි ඇවැත නිසා මූලායපටිකස්සනාව (නැවත මුලට ගෙන ඒම) කොට, පළමු ඇවැත සමඟ සමෝධාන පරිවාසය (ඇවැත් එක් කොට දෙන පරිවාසය) දී, රාත්රී හයක මානත දෙත්වා. මහණෙනි, මූලායපටිකස්සනාව මෙසේ කළ යුතු ය -පෙ- මහණෙනි, පළමු ඇවැත සමඟ සමෝධාන පරිවාසය මෙසේ දිය යුතු ය -පෙ- මහණෙනි, රාත්රී හයක මානත මෙසේ දිය යුතු ය -පෙ- සංඝයා උදායී භික්ෂුවට රාත්රී හයක මානත දෙයි -පෙ-
සංඝයා විසින් උදායී භික්ෂුවට, අතරතුර පැමිණි, දින පහක් සැඟවූ එක් සඤ්චේතනික සුක්කවිසට්ඨි ඇවැත නිසා රාත්රී හයක මානත දෙන ලදී. සංඝයා එයට කැමති ය. එහෙයින් නිහඬ ය. මෙසේ මෙය දරමි.”
අබ්භානයට සුදුසු භික්ෂුවට කරන මූලායපටිකස්සනාව ආදිය නිමියේ ය.
20. පක්ෂයක් (සති දෙකක්) සැඟවූ ඇවැතට අබ්භානය
1. ඔහු මානත්තය පුරා අවසන් කොට, භික්ෂූන්ට “ඇවැත්නි, මම පක්ෂයක් (සති දෙකක්) සැඟවූ එක් සඤ්චේතනික සුක්කවිසට්ඨි ඇවැතකට පැමිණියෙමි -පෙ- ඒ මම මානත්තය පුරා අවසන් කළෙමි. මා කෙසේ පිළිපැදිය යුතු ද?” යි දැන්වූයේ ය. ඒ භික්ෂූන් මේ කරුණ භාග්යවතුන් වහන්සේට දැන්වූහ. (භාග්යවතුන් වහන්සේ මෙසේ වදාළ සේක:) “මහණෙනි, එසේ නම් සංඝයා උදායී භික්ෂුවට අබ්භානය (ඇවැතින් නිදහස් කොට නැවත සංඝයා අතරට ගැනීම) කෙරේවා.
2. මහණෙනි, අබ්භානය කළ යුත්තේ මෙසේ ය: මහණෙනි, ඒ උදායී භික්ෂුව සංඝයා වෙත ගොස්, උතුරු සළුව එක් උරයක් වසා සිටින සේ පොරවා, වැඩිමහලු භික්ෂූන්ගේ පා වැඳ, උක්කුටිකව (දණහිස් බිම නොතබා පතුල් මත) හිඳ, දොහොත් මුදුනේ තබාගෙන මෙසේ කිව යුතු ය: ‘ස්වාමීනි, මම පක්ෂයක් සැඟවූ එක් සඤ්චේතනික සුක්කවිසට්ඨි ඇවැතකට පැමිණියෙමි. ඒ මම පක්ෂයක් සැඟවූ ඒ එක් සඤ්චේතනික සුක්කවිසට්ඨි ඇවැත සඳහා සංඝයාගෙන් පක්ෂපරිවාසය ඉල්ලුවෙමි. සංඝයා මට පක්ෂයක් සැඟවූ ඒ එක් සඤ්චේතනික සුක්කවිසට්ඨි ඇවැත සඳහා පක්ෂපරිවාසය දුන්නේ ය. ඒ මම පරිවාසය වසමින් සිටියදී, ඒ අතරතුර පස් දිනක් සැඟවූ එක් සඤ්චේතනික සුක්කවිසට්ඨි ඇවැතකට පැමිණියෙමි. ඒ මම පස් දිනක් සැඟවූ, අතරතුර පැමිණි ඒ එක් සඤ්චේතනික සුක්කවිසට්ඨි ඇවැත සඳහා සංඝයාගෙන් මූලායපටිකස්සනය (පරිවාසය මුල සිට නැවත පටන් ගැනීම) ඉල්ලුවෙමි. සංඝයා පස් දිනක් සැඟවූ, අතරතුර පැමිණි ඒ එක් සඤ්චේතනික සුක්කවිසට්ඨි ඇවැත සඳහා මට මූලායපටිකස්සනය කළේ ය. ඒ මම පස් දිනක් සැඟවූ, අතරතුර පැමිණි ඒ එක් සඤ්චේතනික සුක්කවිසට්ඨි ඇවැත සඳහා, පළමු ඇවැත පටන් ගෙන (එය සමඟ එක් කොට) සමෝධාන පරිවාසය සංඝයාගෙන් ඉල්ලුවෙමි. සංඝයා පස් දිනක් සැඟවූ, අතරතුර පැමිණි ඒ එක් සඤ්චේතනික සුක්කවිසට්ඨි ඇවැත සඳහා, පළමු ඇවැත පටන් ගෙන මට සමෝධාන පරිවාසය දුන්නේ ය. ඒ මම පරිවාසය වාසය කොට අවසන් කොට, මානත්තයට සුදුසු ව සිටියදී, ඒ අතරතුර පස් දිනක් සැඟවූ එක් සඤ්චේතනික සුක්කවිසට්ඨි ඇවැතකට පැමිණියෙමි. ඒ මම පස් දිනක් සැඟවූ, අතරතුර පැමිණි ඒ එක් සඤ්චේතනික සුක්කවිසට්ඨි ඇවැත සඳහා සංඝයාගෙන් මූලායපටිකස්සනය ඉල්ලුවෙමි. සංඝයා පස් දිනක් සැඟවූ, අතරතුර පැමිණි ඒ එක් සඤ්චේතනික සුක්කවිසට්ඨි ඇවැත සඳහා මට මූලායපටිකස්සනය කළේ ය. ඒ මම පස් දිනක් සැඟවූ, අතරතුර පැමිණි ඒ එක් සඤ්චේතනික සුක්කවිසට්ඨි ඇවැත සඳහා, පළමු ඇවැත පටන් ගෙන සමෝධාන පරිවාසය සංඝයාගෙන් ඉල්ලුවෙමි. සංඝයා පස් දිනක් සැඟවූ, අතරතුර පැමිණි ඒ එක් සඤ්චේතනික සුක්කවිසට්ඨි ඇවැත සඳහා, පළමු ඇවැත පටන් ගෙන මට සමෝධාන පරිවාසය දුන්නේ ය. ඒ මම පරිවාසය වාසය කොට අවසන් කළ පසු, ඇවැත් තුන සඳහා සංඝයාගෙන් සය රැයක මානත්තය ඉල්ලුවෙමි. සංඝයා ඇවැත් තුන සඳහා මට සය රැයක මානත්තය දුන්නේ ය. ඒ මම මානත්තය පුරමින් සිටියදී, ඒ අතරතුර පස් දිනක් සැඟවූ එක් සඤ්චේතනික සුක්කවිසට්ඨි ඇවැතකට පැමිණියෙමි. ඒ මම පස් දිනක් සැඟවූ, අතරතුර පැමිණි ඒ සඤ්චේතනික සුක්කවිසට්ඨි ඇවැත සඳහා සංඝයාගෙන් මූලායපටිකස්සනය ඉල්ලුවෙමි. සංඝයා පස් දිනක් සැඟවූ, අතරතුර පැමිණි ඒ සඤ්චේතනික සුක්කවිසට්ඨි ඇවැත සඳහා මට මූලායපටිකස්සනය කළේ ය.