“ස්වාමීනි, ඇතුල් ගමෙහි යම් තැනෙක අත්සුනුකඩයක්ද, කැඳ සල්පිලක්ද ඇත්තේද, යම් තැනෙක්හි මල් පිපුනාවූ කොබෝලීල ගසකුත් වේද, එහි සිට ගම් අතකින් අනුභව කෙරෙම්ද, ඒ අනිත්මග කියමි. යම් අතකින් අනුභව නොකෙරෙම්ද, ඒ අතින් නොයායුතුයයි කියමි. යවමැදුම්ගම අපගේ ගෙදරට මේ මගවේ. මේ සැඟවුනු මාර්ගය දැනගණුමැනවැයි” අමරාදේවි කීවාය.
ඡන්නපථ ප්‍රශ්නය.
1 “මහරජ, යමෙක් අත්වලින් පා වලින් ගසයිද, මුහුණට අනියිද මෙසේ කරන්නාවූ හෙතෙම ඒකාන්තයෙන් ප්‍රියයෙක් වේද, එයින් කවරෙකු දක්නෙහිදැයි” රජතෙම ඇසීය.
2 “කවරෙක් නම් ඇවිලගත් ගිනි ඇති කල්හි ගිනි සෙවීමෙහි ඇවිදිමින් රාත්‍රි කාලයෙහි කණමැදිරියෙකු දැක ගිනියයි හඟීද,
3 “හෙතෙම මේ කණමැදිරියා මත්තෙහි ගොම වැරටීද තණ පර්ණලාද එක්කොට විපරීත සංඥාවෙන් ගිනි පිඹින්නේ ගිනි දල්වන්ට නොහැකිවීද,
4 “එපරිද්දෙන්ම අනුපාය වශයෙන් සොයන්නාවූ අඥනතෙම අර්ථය නොලබයි. යම් ගව අඟකින් කිරි නො ලබාද, ගවයන්ගේ ඒ අඟින් දොවන්නාවූ පුරුෂයා මෙනි.
5 “නානාප්‍රකාරවූ උපායවලින් මිනිස්සු අර්ථයට පැමිණෙත්. අමිත්‍රයන්ට නිග්‍රහ කිරීමෙන්ද, මිත්‍රයන් සංග්‍රහ කිරීමෙන්ද,
6 “සේනාවන්හි ප්‍රධානවූ ඇමැතියන් ලැබීමෙන්ද, විශ්වාස ඇමැතියන්ගේ උපක්‍රමයෙන්ද, යන උපායවලින් රජවරු ලෝකයෙහි පෘථිවිය හිමකොටගෙණ වාසය කරත්”
ඛජ්ජොපණක ප්‍රශ්නය.
1 “සේනක පණ්ඩිතතෙම කියනලද්දේ සැබෑවක්මය. මහත් ප්‍රඥා ඇත්තාවූ යම්බඳුවූ ඔබද මද ව්‍යඤ්ජන ඇති බත අනුභව කරන්නෙහිද, ශ්‍රී තොමෝ යම්බඳුයයි කීද ඕතොමෝ එබඳුමය. ඔබගේ ධෛර්‍ය්‍යයද, ප්‍රඥාවද අභාවයාගේ වසඟයට ගියාවූ ඔබ නොරකීයයි” ඇමතිතෙම කීයේය.
2 “සැපය දුකින් මුහුකුරුවන්නාවූ කල් නොකල් සොයමින් කැමැත්ත සැඟවූ පුරුෂතෙම අභිවෘද්ධිහුගේ දොරටු අරින්නේ වෙයි. එහෙයින් මම යවසාලේ බතින් සතුටුවන්නෙමි.
3 “වීර්‍ය්‍යකිරීමට සුදුසු කාලයද දැන නුවණින් මාගේ අර්ථය මුහුකුරුවා සිංහවිජෘම්භනයෙන් විජෘම්භනය කරන්නෙමි. ඒ සමෘද්ධියෙන් යුක්තවූ මා නැවතද දක්නෙහි යයි” මහෞෂධතෙම කීයේය.
4 “පණ්ඩිතය, ඇතැම්හු වනාහි සැප ඇත්තාවූ පව් නොකරත්. නැවත සමහරු අපකීර්තිය ලැබීමට භයින් පව් නොකරත්. නුඹ වනාහි සමර්ථවූයේම මහත් අර්ථ සිතන්නේද කවර කාරණයකින් මට දුකක් නොකෙරෙහිදැයි” රජතෙම ඇසීය.
5 “පණ්ඩිතයෝ තමන්ගේ සැපය හේතුකොටගෙණ පාපකර්ම නොකරත්. දුකින් ස්පර්ශ කරණ ලද්දාහු සම්පත්තියෙන් ගිලිහුනාහුද සත්පුරුෂයෝ ඡන්දයෙන්ද ද්වේෂයෙන්ද සුචරිත ධර්මය අත්නොහරිත්යයි” මහෞෂධතෙම කීයේය.
6 “ක්ෂත්‍රියතෙම මෘදුවූ හෝ දරුණුවූ හෝ යම්කිසි ආකාරයකින් බැගෑපත්වූ තමන් සම්පත්තියෙහි නගාසිටුවන්නේය පසුව සුචරිත ධර්මයෙහි හැසිරෙන්නේයයි” රජ තෙම කීයේය.