38. ආයාගදායක ථේරාපදානය
“කථා කරන්නවුන් අතුරෙහි උතුම්වූ සිඛී බුදුරජාණන් වහන්සේ පිරිනිවි කල්හි මම සතුටුවූයේ, සතුටු සිතින් උතුම් ථූපය වැන්දෙමි.
“මම එකල්හි වඩුවන් සමග කථාකොට මුදල් දී සතුටුවූයේ, සතුටු සිතින් ආයාගයක් (දිගු සලක්) කරවීමි.
“ඒ හේතුවෙන් මම අට කපක් නොකඩකොට දෙව්ලොව විසීමි. සෙසු කල්පයන්හි මිශ්‍ර ලෙස සැරි සැරීමි.
“මාගේ කයෙහි විෂ ඇතුළු නොවේ. ආයුධ මා නොනසත්. දියෙහි මම නොමැරෙමි. ආයාග දානයාගේ මේ විපාකයයි.
“ඉදින් මම වැස්ස කැමතිවෙම් නම් මහ වැසි වසින්නේය. දෙවියෝද මාගේ වසඟයට පැමිණෙත්. පුණ්‍ය කර්මයාගේ මේ විපාකයයි.
“මම තිස් වරක් සත් රුවනින් යුක්තවූ සක්විති රජ වීමි. මට කිසිවෙක් අවඥා නොකෙරෙත්. පුණ්‍ය කර්මයාගේ මේ විපාකයයි.
“මින් තිස් එක්වන කල්පයෙහි මම යම් ආයාගයක් කරවීම්ද, ඒ හේතුවෙන් දුගතියක් නොදනිමි. ආයාග දානයාගේ මේ විපාකයයි.
“මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් ආයාගදායක තෙරුන් වහන්සේ මෙම ගාථාවන් වදාළ සේක.
ආයාගදායක තෙරුන්ගේ අපදානය අටවැනියි.
39. ධම්මචක්කික ථේරාපදානය
“සිද්‍ධාර්ත්‍ථ භාග්‍යවතුන් වහන්සේගේ ධර්‍මාසනය ඉදිරියෙහි මා විසින් මැනවින් කරණ ලද, නුවණැත්තවුන් විසින් වර්‍ණනා කරණ ලද ධර්ම චක්‍රයක් තබන ලදී.
“මනොඥවූ වර්‍ණවූයේ වාහනද ඇත්තේ බබළමි. මා අනුව පවතින්නාවූ බොහෝ දෙනා නිරතුරුවම මා පිරිවරත්.
“මම හැමකල්හි සැටදහසක් තූර්‍ය්‍යයන්ගෙන් පරිවරණය කරමි. පිරිවර කරණකොටගෙන බබළමි. පුණ්‍ය කර්මයාගේ මේ පලයයි.
“මින් සිව් අනූවන කල්පයෙහි මම යම් ධර්ම චක්‍රයක් තැබූයෙම්ද, ඒ හේතුවෙන් දුගතියක් නොදනිමි. ධර්‍මචක්‍ර දානයාගේ මේ විපාකයයි.
“මින් එකොළොස්වන කල්පයෙහි සහස්සරාජ නම්වූ, ජනාධිපතිවූ, මහත් බල ඇති සක්විති රජවරු අටදෙනෙක් වූහ.
“මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් ධම්මචක්කික තෙරුන් වහන්සේ මෙම ගාථාවන් වදාළ සේක.
ධම්මචක්කික තෙරුන්ගේ අපදානය නවවැනියි.
40. කප්පරුක්ඛිය ථේරාපදානය
“මම සිද්‍ධාර්ත්‍ථ භාග්‍යවතුන් වහන්සේගේ ශ්‍රේෂ්ඨ ස්ථූපය ඉදිරියෙහි විසිතුරු දුහුල් එල්වා කප් රුකක් තැබීමි.
“දිව්‍යවූ හෝ, මනුෂ්‍යවූ හෝ, යම් යම් යෝනියක උපදිම්ද, මාගේ දොරටුව හොබවමින් කප් රුකක් එහි පිහිටයි.
“මමද, මා ඇසුරු කළ යම් කිසි පිරිසක් වෙත් නම් ඔවුහුද යන අපි හැම කල්හි එම කප් රුකින් දුහුල් ගෙන හැඳීමු.
“මින් සිව් අනූවන කපෙහිවූ එකල්හි යම් කප් රුකක් තැබීම්ද, ඒ හේතුවෙන් දුගතියක් නොදනිමි. කල්ප වෘක්‍ෂ දානයාගේ මේ විපාකයයි.
“මෙයින් සත්වෙනි කල්පයෙහි සත් රුවනින් යුත් මහත් බල ඇති සුචෙළ නම්වූ ක්ෂත්‍රිය සක්විති රජවරු අට දෙනෙක් වූහ.
“මේ සිව් පිළිසිඹියාවෝද, අෂ්ට විමොක්‍ෂයෝද, ෂඩභිඥාවෝද සාක්‍ෂාත් කරණ ලදී. බුදුරජාණන් වහන්සේගේ සසුනද කරණලදී.
මෙහි මේ අයුරින් ආයුෂ්මත් කප්පරුක්ඛිය තෙරුන් වහන්සේ මෙම ගාථාවන් වදාළ සේක.
කප්පරුක්ඛිය තෙරුන්ගේ අපදානය දසවැනියි.
උද්දානය:
කුණ්ඩධාන, සාගත, කච්චාන, උදායි, මොඝරාජ, අධිමුත්ත, ලසුණදායක, ආයාගී, ධම්මචක්කික සහ දසවැනි කප්පරුක්ඛිය ද වෙති. ගාථාවෝ එක්දහස් දෙසියයක් වෙත්.
කුණ්ඩධාන වර්ගය සිව්වැනියි.