7. 1. 1. 7.
7. උග්ගමහාමත්ත සූත්රය
[සැවැත් නිදානයයි]
7. “ඉක්බිත්තෙන් උග්ග නම් රාජ මහාමාත්යතෙම භාග්යවතුන් වහන්සේ යම් තැනෙක්හිද, එතැන්හි පැමිණියේය. පැමිණ, භාග්යවතුන් වහන්සේට වැඳ, එකත්පසෙක සිටියේය. එකත්පසෙක සිටියාවූ උග්ග රාජ මහාමාත්ය තෙම, භාග්යවතුන් වහන්සේට මෙසේ සැළකළේය.
“ස්වාමිනි, ආශ්චර්ය්යයකි. ස්වාමීනි, පුදුමයකි. රොහනෙය්ය නම් මිගාර තෙම යම්තාක් ආඪ්යද, යම්තාක් මහත් ධන ඇත්තේද, යම්තාක් මහා භෝග ඇත්තේ වෙයිද,
ස්වාමීනි, රෝහනෙය්ය නම් මිගාරතෙම. කොපමණ ආඪ්යවූයේද, කොපමණ මහත් ධන ඇත්තේද, කොපමණ මහා භෝග ඇත්තේද,
ස්වාමීනි, රන් පමණක් ම ලක්ෂයක් (සියය දහසක්) ඇත. රිදී ගැන කවර කතා ද?”
“උග්ගය, ඒ ධනය ඇත්තේමය. ඒ ධනය නැතැයි මම නොකියමි. උග්ගය, එසේ නමුදු ඒ ධනය ගින්නෙන්ද, ජලයෙන්ද, රජුන්ගෙන්ද, සොරුන්ගෙන්ද, අප්රිය දායාදයන්ගෙන්ද සාධාරණ වන්නේය.
“උග්ගය, මේ ධනයෝ සත්දෙන ජලයෙන්ද, ගින්නෙන්ද, රජුන්ගෙන්ද, සොරුන්ගෙන්ද, අප්රිය දායාදයන්ගෙන්ද අසාධාරණ වෙති. ඒ සත කවරහුද?
ශ්රද්ධා ධනය, ශීල ධනය, හිරි ධනය, ඔත්තප්ප ධනය, ශ්රුත ධනය, ත්යාග ධනය, ප්රඥා ධනය යනුයි. උග්ගය, මේ ධනයෝ සත්දෙන ජලයෙන්ද, ගින්නෙන්ද, රජුන්ගෙන්ද, සොරුන්ගෙන්ද, අප්රිය දායාදයන්ගෙන්ද අසාධාරණ වෙති.
11. ශ්රද්ධා ධනය, ශීල ධනය, හිරි ධනය, ඔත්තප්ප ධනය, ශ්රුත ධනය, ත්යාග ධනය, සත්වැනි ධනය වන ප්රඥා ධනය ද යන මේ ධන සතකි.
12. යම් ස්ත්රියකට හෝ පුරුෂයෙකුට හෝ මේ ධන ඇත්නම්, ඔහු ඒකාන්තයෙන්ම ලෝකයෙහි මහා ධනවතෙකි; දෙවියන් හා මිනිසුන් අතර කිසිවෙකුට ඔහු පරාජය කළ නොහැක.
13. එහෙයින් නුවණැත්තා බුදුරජාණන් වහන්සේලාගේ සසුන සිහි කරමින් ශ්රද්ධාවෙහිද, ශීලයෙහිද, පැහැදීමෙහිද (ප්රසාදයෙහිද), ධර්මය දැකීමෙහිද යෙදෙන්නේය.
7. 1. 1. 8.
8. සත්ත සංයෝජන සූත්රය
[සැවැත් නිදානයයි]
8. “මහණෙනි, මේ සංයෝජනයෝ සතක් වෙති.
“කවර සතක්ද? අනුනය සංයෝජනය, පටිඝ සංයෝජනය, දිට්ඨි සංයෝජනය, විචිකිච්ඡා සංයෝජනය, මාන සංයෝජනය, භවරාග සංයෝජනය, අවිජ්ජා සංයෝජනය,
මහණෙනි, මේ සංයෝජනයෝ සතක් වෙති.”
7. 1. 1. 9.
9. සංයෝජන සමුච්ඡේද සූත්රය
[සැවැත් නිදානයයි]
9. “මහණෙනි, සංයෝජන සතක ප්රහාණය පිණිස, මුළුමනින් සිඳීම පිණිස බඹසර හැසිරෙනු ලැබේ. කවර සතක ද යත්:
අනුනය සංයෝජනයේ ප්රහාණය පිණිස, මුළුමනින් සිඳීම පිණිස බඹසර හැසිරෙනු ලැබේ. පටිඝ සංයෝජනයේ ප්රහාණය පිණිස -පෙ- දිට්ඨි සංයෝජනයේ -පෙ- විචිකිච්ඡා සංයෝජනයේ -පෙ- මාන සංයෝජනයේ -පෙ- භවරාග සංයෝජනයේ -පෙ- අවිජ්ජා සංයෝජනයේ ප්රහාණය පිණිස, මුළුමනින් සිඳීම පිණිස බඹසර හැසිරෙනු ලැබේ.
මහණෙනි, මේ සංයෝජන සතෙහි ප්රහාණය පිණිස, මුළුමනින් සිඳීම පිණිස බඹසර හැසිරෙනු ලැබේ.
“මහණෙනි, යම් හෙයකින් භික්ෂුවගේ අනූනය සංයෝජනයද නැවත නූපදින සේ මුලින් කපන ලද තල් ගසක් සේ කරණ ලදද, අභාවයට පමුණුවන ලද්දේද, පටිඝ සංයෝජනයද නැවත නූපදින සේ මුලින් කපන ලද තල් ගසක් සේ කරණ ලදද, අභාවයට පමුණුවන ලද්දේද, දිට්ඨි සංයෝජනයද නැවත නූපදින සේ මුලින් කපන ලද තල් ගසක් සේ කරණ ලදද, අභාවයට පමුණුවන ලද්දේද, විචිකිච්ඡා සංයෝජනයද නැවත නූපදින සේ මුලින් කපන ලද තල් ගසක් සේ කරණ ලදද, අභාවයට පමුණුවන ලද්දේද, මාන සංයෝජනයද නැවත නූපදින සේ මුලින් කපන ලද තල් ගසක් සේ කරණ ලදද, අභාවයට පමුණුවන ලද්දේද, භවරාග සංයෝජනයද නැවත නූපදින සේ මුලින් කපන ලද තල් ගසක් සේ කරණ ලදද, අභාවයට පමුණුවන ලද්දේද, අවිජ්ජා සංයෝජනයද නැවත නූපදින සේ මුලින් කපන ලද තල් ගසක් සේ කරණ ලදද, අභාවයට පමුණුවන ලද්දේද, මෙයින් භික්ෂුව තෘෂ්ණාව සින්දේය. සංයෝජනයන් දුරුකොට දුක් කෙළවර කළේය.
7. 1. 1. 10.
10. මච්ඡරිය සංයෝජන සූත්රය
[සැවැත් නිදානයයි]
10. “මහණෙනි, මේ සංයෝජන සතක් වෙයි. කවර සතක් ද යත්:
“කවර සතක්ද යත්? අනුනය සංයෝජනය, පටිඝ සංයෝජනය, දිට්ඨි සංයෝජනය, විචිකිච්ඡා සංයෝජනය, මාන සංයෝජනය, ඉස්සා සංයෝජනය, මච්ඡරිය සංයෝජනය
යන මේ සත සංයෝජනයෝ වෙති.”
පළමුවැනි ධන වර්ගය නිමි.
එහි උද්දානය (මාතෘකා):
පිය සූත්ර දෙක, බල සූත්ර දෙක, සංඛිත්ත ධන සූත්රය, විත්ථත ධන සූත්රය, උග්ග සූත්රය, සංයෝජන සූත්රය, සංයෝජනප්පහාන සූත්රය, මච්ඡරිය සංයෝජන සූත්රය යන දහයයි.