ඒ තෙරුන් වහන්සේ ඇත්ගම එක් වීථියෙක සිඟා ගෙන ඒ චළඳා ලා නැවත අනික් වීථියක සිඟා ලත් රළු බත් වෙහෙරට ගෙන ගොස් පිරිමසා තබා ලා දවස් පතා සිඟීම් නම් දුකැ’යි කීප දවසක් ධ්‍යාන සුවයෙන් දවස් යවා ලා ආහාරානුභව ය වුව මනා කලට පිළිගත් දවස් පෙරවරු පමණකුත් ඉක්මා පූ හෙයින් සන්නිධි වූවා සිඛ පද නොපැන වූ හෙයින් වළඳන සේක. වහන්දෑ දැන බුදුන්ට එපව ත් දැන් වූ සේක. බුදුහු එ බන්ද හරනා ලෙසට සිඛ පද පනවා ලා තෙරුන් වහන්සේ ආදිකම්මික හෙයින් ඔබ නිරාපත්ති කෙරෙමින් විනය සන්නිධි හරවා ලා බණ වදාරණ බුදුහු “මහණෙනි, යම් කෙනකුන්ට මත්තෙහි භවොත්පත්තියෙක් නැත් නම් විපාක දානයෙහි සමර්ථ වූ කර්මසන්නිචය හෙවත් පුරාකෘත කුශලාකුශල කර්‍මයන් රහත් මඟින් නසා පී හෙයින් නැත් ද−
නැවත වෙහෙර වසන භික්ෂූන්ට එක් උක් සකුරු කැටියක් හා උක් සකුරු පිඬි සතරක් කළ කල ඉන් භාගයක් විතර ගිතෙල් හා සාල් නැළියක් විතර බෙහෙත් නිසා තබන්නවුන්ට ප්‍රත්‍යය සන්නිචය නැති හෙයින් ඊට වඩා නො තිබීමෙන් ප්‍රත්‍යය සන්නිවය ත් නැත් ද, යම් කෙනෙක් අනුභව කරණ දෙය ‘මේ කැඳය, මේ අවුළුපත ය, මේ බත ය, මේ මාළු ය’යි දැන පිළිකුල් මෙනෙහි කොට දිවි රැක සිල් රැකෙන හෙයින් දිවි රක්නා සඳහා රස තෘෂ්ණාව හැර අනුභව කෙරෙද්ද, නැවත යම් රහත් කෙණකුන්ට රාගාදී කෙළෙසුන් නැති හෙයින් හා ඉන් මිඳෙනු හෙයින් සුඤ්ඤත විමොක්‍ෂ නම් වූ ද රාගාදීන් නිමිත්ත රහිත හෙයින් හා ඉන් මිඳුණු හෙයින් හා අනිමිත්තවිමොක්‍ෂ නම් වූ ද රාගාදී ප්‍රණිධි නැති හෙයින් හා ඉන් මිඳුණු හෙයින් අප්‍රණිහිත විමොක්‍ෂ නම් වූ ත් නිවන් ඵල සමවතට සම වැදීම් වශයෙන් අරමුණු කරන්නවුන්ට ගෝචර ද, ඒ ඔවුන්ගේ භව යොනි ගති ආදියෙහි ගමනක් නැති හෙයින් අහස යන පක්ෂීන්ගේ ගමන ඇත ත් පියවර ඔබා ගිය තැනක් නො පෙනෙන්නා සේ අසෝ අත ගියහ යි ගමනක් ම අනුපධිශෙෂ නිර්‍වාණ ධාතුවේ පටන් නැති හෙයින් දත නො හැක්කැ”යි වදාළ සේක. දේශනා කෙළවර බොහෝ දෙන නිවන් දුටහ.
එ හෙයින් නුවණැත්තවුන් විසින් වස්තුසන්නිචය නැති ව කුශල සන්නිචය කොට ගෙන භව සැපත් වළඳා කෙළවර රහත් වීමෙන් කුසල සන්නිචයත් හළ යුතු.
________