තව ද සාමාන්‍යයෙන් සියලු ම අකුසලින් දුරුව සාමාන්‍යයෙන් සියලු ම කුසල්හි යෙදෙනු සඳහා ආගන්තුක පන්සියක් දෙනා වහන්සේ ගේ වස්තුව දක්වමු.
කෙ සේ ද යත් -
පන් සියක් පමණ වහන්දෑ කොසොල් රට වස් වැස ලා අන්තයෙහි බුදුන් වඳනට යෑම අවශ්‍යයෙන්ම කළමනා හෙයින් දෙව්රම් වෙහෙරට ගොසින් බුදුන් වැඳ එකත් පස් ව හුන් සේක. බුදුහු ඒ වහන්දෑගේ තරමට අනුකූල ලෙසට බණ වදාරන සේක් ‘මහණෙනි, නුවණැත්තෝ තුමූ සත්‍ව ප්‍රාණහර විෂ මෙන් සලකා සියලු ම ලඝු තරම් වුවත්, බලවත් තරම් වුවත් අකුසල ය නො කිරීම් වසයෙන් හැර මහණ වන්ට අවුත් මහණ වූ තැන් පටන් රහත් වන තැන් දක්වා කාය සුචරිතාදි සියලු ම කුසල ය වඩන්නෝ ය. ඒ කුසල ය වඩන්නේ කුමක් නිසා ද යත්- තෘෂ්ණාව නම් සියලු ම දුකට මුල් කාරණ හෙයින් ඒ හැර නිවන් නම් ලොවී ලොවුතුරා සැපයට කාරණ හෙයින් නිවන් පතා ඊට පැමිණෙන පිණිස කුසල් කරන්නෝ ය. කුසල් කරණ කල ත් රූප ශබ්දාදි වූ වස්තු කාම සැප ත් තත් තත් විෂය වූ ක්ලේශකාමය ත් හැර යම් දෙයෙක්හි ඇල්ම කරවා මුත් කට නොහැක්කේ වී නම් එසේ වූ නිවන්හි ඇලුම් කොට නිවන් පතා කළ කුසලින් සියල්ලක් ම සිද්ධ වන හෙයින් තර ව නිවන් කැමැති වන්නාහ.
නැවත නුවණැත්තෝ තුමූ යම් කෙලෙස් සිතෙක් ඇති නම් ඒ කෙලෙස් සිත් සතන් කෙලෙසන හෙයින් තදඞ්ගාදි වසයෙන් පස් නීවරණයන් දුරු කිරීමෙන් සිත ත් නිර්‍මල කෙරෙති. එ සේ නිර්‍මල කොට ගත්සිත යම් කෙනකුන් විසින් මාර්ගොත්පාදන-ඵලොත්පා දනයට කාරණ වූ ස්මෘති ආදිවූ ධර්‍මයන් සත් දෙනා විෂයෙහි මනාකොට හවන ලද්දේ වී නම් එ සේ හැවීම හේතු කොට චතුර්විධ වූ උපාදානයෙන් කිසිවකුත් නොගෙන භවොත්පත්තිය හැරීමෙහිත් ඇලෙති. මෙ ලෙසින් ක්‍ෂය කරණ ලද ආශ්‍රවයන් ඇති මාර්‍ගඥාන
ශෝහාවෙන් ශෝභාවත් වූ ඔහු රහත් වූ තැන් පටන් කෙලෙස් වට කම්වට ගෙවා පී හෙයින් හා චුති චිත්ත නිරෝධයෙන් විපාක වෘත්තය ගෙවා පී හෙයින් නිර්වාණ ධාතු දෙකින්ම පිරිනිවියාහු නම් වෙතී’ වදාළ සේක. දේශනා කෙළවර බොහෝ දෙන නිවන් පුර වන්හ.
එ හෙයින් නුවණැත්තවුන් විසින් යම් සේ වේයෝ තමන් වසා පස්කඳු බැඳ ගෙන තුමූ සැඟ වී ගොදුරු සොයා එත් ද, එ මෙන් අකුසල් නො වදනා ලෙසට පින්කම් සෙවින්නෙන් වැසී ගෙන, තව ද යම් සේ බළලෙක් කොතැනට ගිය ත් මීයන් සොයා ද එ පරිද්දෙන් කොතැනට පැමිණ ත් සසරින් මිඳෙන්ට උපදෙස් ම සොයමින්, තව ද, යම් සේ බළලා දුර නො ගොස් ආසන්නයෙන් ම ගොදුරු සොයා ද - එ මෙන් මිනිස් ලොව ආයු දෙව් ලොව ආයු දුටු කලට ඉතා බොහෝ නො වන හෙයින් මරණාසන්න කොට සිතීමෙන් මරණ සී භාවනායෙහි ත් හැසිර කාය ජීවිත නිරපෙක්‍ෂ ව සුචරිත පුරා නිවන් සිද්ධ කටයුතු.