තව ද රහතන්ට භය නැති නියා ව හඟවන්ට අඟුල්මල් මහ තෙරුන් වහන්සේ ගේ වත කියමු.
කෙ සේ ද යත්-
මල්ලිකා බිසොවුන් ගේ නියෝගයෙන් දුෂ්ට ඇතා අඟුල්මල් මහ තෙරුන් වහන්සේට කුඩය අල්වා ගෙන සිටියා බලා ‘ඇවැත්නි, බා ගියේ ඇත් දැ’යි විචාළ කල්හි ‘භයෙක් නැතැ’යි කී හෙයින් ‘ස්වාමීනි, අඟුල්මල් තෙරහු නැත්ත කියා රහත් නියාවක් හඟවති’ යි වහන්දෑ ත් බුදුන්ට දැන් වූ සේක. ඔබ රහත් හෙයින් භය නැති නියා ව බුදුහු වදාරන සේක් යම් කෙනෙක් තැති ගැන්මෙක් නැති බැවින් වෘෂභ රාජයක්හු වැන්නෝ ද, ශීල සමෘද්ධ්‍යාදි උත්තම ගුණ යෝගයෙන් උතුම් වූහු ද, වඩන ලද චතුර් විධ සම්‍යක් ප්‍රධාන වීර්‍ය්‍ය ඇත්තෝ ද, මහත් වූ ශීලස්කන්ධාදීන් ගවේෂණ ය කෙරෙත් ද, තුන් මරුන් දිනා සිටියෝ ද, අර්හත් මාර්‍ග ඥාන නමැති පැණින් කෙලෙස් කුණු සෝධා නගා සිටියෝ ද, චතුරාර්‍ය්‍ය සත්‍ය ය දත්හු ද, උන් උතුමැයි කියමි. අඟුල්මල් තෙරුනු ත් මෙ බඳු තරම් ඇති හෙයින් උන්ට භය නැති හෙයින් ම පුත්හු තමන්ට භය නැතැ’යි කිවු ය’යි වදාළ සේක. දේශනා කෙළවර බොහෝ දෙන නිවන් දුටහ.
එ හෙයින් නුවණැත්තවුන් විසින් සසර භය නුව මනා වී නම් රහත් වීමට ම උත්සාහ කටයුතු.