තව ද යම්කිසි කෙනෙක් සියලු ලෙසින්ම නිරුපද්‍රවයෝ වූ නම් උනු ත් බ්‍රාහ්මණ නියා ව හඟවන්ට මහා ප්‍රජාපතී දෑ ගේ වස්තුව දක්වමු.
කෙසේ ද යත්-
උන්දෑ ද වැළිත් පවිත්‍රශීලී කෙනකුන් සුවඳ මල් දමක් පිළි ගන්නා මෙන් සිය වස් ගිය මෙහෙණින්නනු ත් එ දවස් උපසම්පන්න භික්ෂූන් වැන්ද යුතු ය, යනාදීන් අෂ්ට ගරු ධර්‍ම ය පිළිගැන්මෙන් පන් සියයක් දෙනා හා සමග උපසම්පදාව ලත් දෑ ය. උන්දෑගේ උපසම්පදාවට ආචාර්‍ය්‍ය උපාධ්‍යාය තැන් නැත. ඒ නිසා පසු කථාවක් උපදනේ ‘මුන්දෑගේ උපසම්පදාවට ආචාර්‍ය්‍ය උපාධ්‍යාය තැනු ත් නැත. මහණ වීමෙහි සිවුරු දෙවා ගැන්මකු ත් නො වී ය. මහණත් මාලු පැවිද්දත් සැක කරන තරම් වුව’ යි මෙහෙණිනි වහන්දෑ බුදුන් ගෙන් විභාග නො දත් හෙයින් කුකුස් කොට ගෙන උන්දෑ හා සංවාස සම්භෝගත් නො කොට බුදුන්ට ත් දැන් වූ දෑ ය.
බුදුහු ත් ඒ අසා ‘හෙම්බා මෙහෙණිනි, අෂ්ට ගරු ධර්‍ම ය පිළිගැන්මෙන්ම මහණ ත් මාලු පැවිද්දත් මා ගෙන්ම ලත්හ. උන්ට ආචාර්‍ය්‍ය උපාධ්‍යායයෝ නම් මම් ම ය’ යි වදාරා කුකුස් හරවනු නිසා බණ වදාරන සේක් ‘හෙම්බා මෙහෙණින්නෙනි, යම් කෙනකුන්ට කා විසි මුනි තුන් දොරින් සිද්ධ වන තුන් දුසිරියෙක් නැත් නම් තුන් සුසිරි ම පිරේ නම ඌ නිරුපද්දයහ. නො දැන කුකුස් කළා නමුත් ඉනිබ්බ කුකුස් නො කොට හැක්කැ’යි වදාළ සේක. දේශනා කෙළවර බොහෝ දෙන නිවන් දුටහ.
එ හෙයින් සත් පුරුෂයන් විසින් තුන් දොරින් සිද්ධ වන අකුසලුත් දුරු කොට සිත් සතන් සෙමෙහි තබන්ට උත්සාහ කටයුතු.