තව ද කළ පාප ය කෘත පුණ්‍යයන්ට පිණින් වැසෙන නියාව හඟවන්නමෝ අඟුල් මල් තෙරුන් වහන්සේගේ වස්තුව දක්වමු.

කෙසේද යත් -

උන් වහන්සේගේ උත්පත්ති කථාව අඞ්ගුලිමාල සූත්‍රයෙන් අසා දතයුතු. උන් වහන්සේ බුදුන් ළඟ මහණව රහත් වූ සේක. රහත් වූ අඟුල් මල් තෙරුන් වහන්සේ ‘යම් කෙනෙක් පෙර පමා වත් පසු ව නො පමා වූ නම් සඳ පරිද්දෙන් ඌ මෙලොව බබළවතී’ යනාදීන් උදන් අනා පිරිනිවි කල්හි ‘ඇවැත්නි, අඟුල්මල් තෙරහු කොයි උපන්නු දැ’යි ධර්‍ම සෙබෙහි කථාව ඉපැද වූ සේක. ධම් සභයට වැඩි බුදුහු මේ කථාව අසා වදාරා ‘මහණෙනි, ම පුත්තු පිරිනිවියහ’යි වදාළ සේක. ‘ස්වාමීනි, මිනී මැරීම ත් එක් පිනක් සේ මෙ තෙක් මිනී මරාපියා පිරිනිවී නියා ද? එසේ කලට, රහත් නොවන තැනක් නැති නියාවනැ’යි විචාළ සේක. ‘එ සේ ය, මහණෙනි, ඌ පෙර කල්‍යාණ මිත්‍ර කෙනකුන් නො ලදින් මෙතෙක් පව් කළහ. කල්‍යාණ මිත්‍ර කෙනකුන් සම්බ වීම ත් එ බඳු පින් ඇති කෙනකුට ය. දැන් කල්‍යාණ මිත්‍ර සමවායෙන් නො පමා වූයේ ය. එ හෙයින් ඒ කළ පාපය පිනින් වැසි නැ’යි වදාරා බණ වදාරන සේක් ‘පඤ්චානන්තරිය කර්මය හැර සෙසු පාපය යම් කෙනකුන්ට ආර්‍ය්‍ය මාර්ග කුශලයෙන් වැසේද, ඌ තුමූ රහත් මගින් මොහඳුරු සියලු ලෙසින් නැසූ හෙයින් මේ ස්කන්ධාදී වූ ලොව බබළවතී’ වදාළ සේක. දේශනා කෙළවර බොහෝ දෙන නිවන් දුටහ.

එහෙයින් නුවණත්තවුන් විසින් නො දන්නා අවස්ථාවෙහි පව හැසුරුණ ත් පින්කොට එයින් වඩා නිවන් දැක්මෙන් සිද්ධ වූ කුසල් අකුසල් දෙක ම වඳට බෙහෙත් දුන්නා සේ වඳ කරන්ට උත්සාහ කටයුතු.

_________