කුසලො ධම්මො කුසලස්ස ධම්මස්ස ඣානපච්චයෙන පච්චයො, කුසලානං ඣානඞ්ගානි, සම්පයුත්තකානං ඛන්‍ධානං ඣානපච්චයෙන පච්චයො.
කුසලො ධම්මො අබ්‍යාකතස්ස ධම්මස්ස ඣානපච්චයෙන පච්චයො, කුසලානි ඣානඞ්ගානි චිත්තසමුට්ඨානානං රූපානං ඣානපච්චයෙන පච්චයො.
කුසලො ධම්මො කුසලස්ස ච අබ්‍යාකතස්ස ච ධම්මස්ස ඣානපච්චයෙන පච්චයො, කුසලානි ඣානඞ්ගානි සම්පයුත්තකානං ඛන්‍ධානං චිත්තසමුට්ඨානානඤ්ච රූපානං ඣානපච්චයෙන පච්චයො.
අකුසලො ධම්මො අකුසලස්ස ධම්මස්ස ඣානපච්චයෙන පච්චයො. අකුසලානි ඣානඞ්ගානි සම්පයුත්තකානං ඛන්‍ධානං ඣානපච්චයෙන පච්චයො.
අකුසලො ධම්මො අබ්‍යාකතස්ස අකුසලස්ස ධම්මස්ස ඣානපච්චයෙන පච්චයො. අකුසලානි ඣානඞ්ගානි චිත්තසමුට්ඨානානං රූපානං ඣානපච්චයෙන පච්චයො.
අකුසලො ධම්මො අකුසලස්ස ච අබ්‍යාකතස්ස ච ධම්මස්ස ඣානපච්චයෙන පච්චයො, අකුසලානි ඣානඞ්ගානි සම්පයුත්තකානං ඛන්‍ධානං චිත්තසමුට්ඨානානඤ්ච රූපානං ඣානපච්චයෙන පච්චයො.
අබ්‍යාකතො ධම්මො අබ්‍යාකතස්ස ධම්මස්ස ඣානපච්චයෙන පච්චයො, විපාකාබ්‍යාකතානි කිරියාබ්‍යාකතානි ඣානඞ්ගානි සම්පයුත්තකානං ඛන්‍ධානං චිත්තසමුට්ඨානානඤ්ච රූපානං ඣානපච්චයෙන පච්චයො, පටිසන්‍ධික්ඛණෙ විපාකාබ්‍යාකතානි ඣානඞ්ගානි සම්පයුත්තකානං ඛන්‍ධානං කටත්තා ච රූපානං ඣානපච්චයෙන පච්චයො.