කුසලො ධම්මො කුසලස්ස ධම්මස්ස ආහාරපච්චයෙන පච්චයො, කුසලා ආහාරා සම්පයුත්තකානං ඛන්‍ධානං ආහාරපච්චයෙන පච්චයො,
කුසලො ධම්මො අබ්‍යාකතස්ස ධම්මස්ස ආහාරපච්චයෙන පච්චයො, කුසලා ආහාරා චිත්තසමුට්ඨානානං රූපානං ආහාරපච්චයෙන පච්චයො.
කුසලො ධම්මො කුසලස්ස ච අබ්‍යාකතස්ස ච ධම්මස්ස ආහාරපච්චයෙන පච්චයො, කුසලා ආහාරා සම්පයුත්තකානං ඛන්‍ධානං චිත්තසමුට්ඨානානඤ්ච රූපානං ආහාරපච්චයෙන පච්චයො.
අකුසලො ධම්මො අකුසලස්ස ධම්මස්ස ආහාරපච්චයෙන පච්චයො, අකුසලා ආහාරා සම්පයුත්තකානං ඛන්‍ධානං ආහාරපච්චයෙන පච්චයො.
අකුසලො ධම්මො අබ්‍යාකතස්ස ධම්මස්ස ආහාරපච්චයෙන පච්චයො, අකුසලා ආහාරා චිත්තසමුට්ඨානානං රූපානං ආහාරපච්චයෙන පච්චයො.
අකුසලො ධම්මො අකුසලස්ස ච අබ්‍යාකතස්ස ච ධම්මස්ස ආහාරපච්චයෙන පච්චයො, අකුසලා ආහාරා සම්පයුත්තකානං ඛන්‍ධානං චිත්තසමුට්ඨානානඤ්ච රූපානං ආහාරපච්චයෙන පච්චයො.
අබ්‍යාකතො ධම්මො අබ්‍යාකතස්ස ධම්මස්ස ආහාරපච්චයෙන පච්චයො, විපාකාබ්‍යාකතා කිරියාබ්‍යාකතා ආහාරා සම්පයුත්තකානං ඛන්‍ධානං චිත්තසමුට්ඨානානඤ්ච රූපානං ආහාරපච්චයෙන පච්චයො, පටිසන්‍ධික්ඛණෙ විපාකාබ්‍යාකතා ආහාරා සම්පයුත්තකානං ඛන්‍ධානං කටත්තා ච රූපානං ආහාරපච්චයෙන පච්චයො, කබලිංකාරො ආහාරො ඉමස්ස කායස්ස ආහාරපච්චයෙන පච්චයො.