අබ්‍යාකතො ධම්මො අබ්‍යාකතස්ස ධම්මස්ස විපාකපච්චයෙන පච්චයො, විපාකාබ්‍යාකතො එකො ඛන්‍ධො තිණ්ණන්නං ඛන්‍ධානං චිත්තසමුට්ඨානානඤ්ච රූපානං විපාකපච්චයෙන පච්චයො, තයො ඛන්‍ධා එකස්ස ඛන්‍ධස්ස චිත්තසමුට්ඨානානඤ්ච රූපානං විපාකපච්චයෙන පච්චයො, ද්වෙ ඛන්‍ධා ද්වින්නං ඛන්‍ධානං චිත්තසමුට්ඨානානඤ්ච රූපානං විපාකපච්චයෙන පච්චයො, පටිසන්‍ධික්ඛණෙ විපාකාබ්‍යාකතො එකො ඛන්‍ධො තිණ්ණන්නං ඛන්‍ධානං කටත්තා ච රූපානං විපාකපච්චයෙන පච්චයො, තයො ඛන්‍ධා එකස්ස ඛන්‍ධස්ස කටත්තා ච රූපානං විපාකපච්චයෙන පච්චයො, ද්වෙ ඛන්‍ධා ද්වින්නං ඛන්‍ධානං කටත්තා ච රූපානං විපාකපච්චයෙන පච්චයො. ඛන්‍ධා වත්‍ථුස්ස විපාකපච්චයෙන පච්චයො.