අයමෙත්ථ රූපසමුට්ඨාන නයො.

44. එකුප්පාදා එකනිරොධා එකනිස්සයා සහවුත්තිනො එකවීසති රූපකලාපා නාම.

45. තත්ථ ජීවිතං අවිනිබ්භොග රූපඤ්ච චක්ඛුනාසහ චක්ඛුදසකන්ති පවුච්චති. තථා සොතාදීහි සද්ධිං සොතදසකං, ඝානදසකං, ජිව්හාදසකං, කායදසකං, ඉත්ථිභාවදසකං, පුම්භාවදසකං, වත්ථුදසකඤ්චෙති යථාක්කමං යොජෙතබ්බං අවිනිබ්භොග රූපමෙව ජීවිතෙන සහ ජීවිත නවකංති පවුච්චති. ඉමෙ නව කම්ම සමුට්ඨාන කලාපා.

46. අවිනිබ්භොග රූපං පන සුද්ධට්ඨකං තදෙව කායවිඤ්ඤත්තියා සහ කායවිඤ්ඤත්ති නවකං, වචීවිඤ්ඤත්ති සද්දෙහිච සහ වචීවිඤ්ඤත්තිදසකං, ලහුතාදීහි සද්ධිං ලහුතාදෙකාදසකං, කායවිඤ්ඤත්ති ලහුතාදිද්වාදසකං, වචීවිඤ්ඤත්ති සද්දලහුතාදිතෙරසකං චෙති ඡ චිත්ත සමුට්ඨාන කලාපා.

47. සුද්ධට්ඨකං, සද්ද නවකං ලහුතාදෙකාදසකං, සද්දලහුතාදිද්වාදසකං චෙති චත්තාරො, උතුසමුට්ඨාන කලාපා.

48. සුද්ධට්ඨකං, ලහුතාදෙකාදසකං චෙති ද්වෙ ආහාර සමුට්ඨාන කලාපා.

49. තත්ථ සුද්ධට්ඨකං, සද්ද නවකං චෙති ද්වෙ උතුසමුට්ඨාන කලාපා බහිද්ධාපි ලබ්භන්ති, අවසෙසාපන සබ්බෙපි අජ්ඣත්තිකමෙවාති.