අයමෙත්ථ රූප විභාගො.

29. කම්මං චිත්තං උතු ආහාරොචෙති චත්තාරි රූප සමුට්ඨානානි නාම.

30. තත්ථ කාමාවචරං රූපාවචරං චෙති පඤ්චවීසති විධම්පි කුසලාකුසලකම්මමභිසඞ්ඛතං අජ්ඣත්තික සන්තානෙ කම්මසමුට්ඨාන රූපං පටිසන්ධිමුපාදාය ඛණෙ ඛණෙ සමුට්ඨාපෙති.

31. ආරුප්පවිපාක ද්විපඤ්ච විඤ්ඤාණ වජ්ජිතං පඤ්ච සත්තති විධම්පි චිත්තං චිත්තසමුට්ඨාන රූපං පඨමභවඞ්ග-මුපාදාය ජායන්ත මෙව සමුට්ඨාපෙති. 32. තත්ථ අප්පණා ජවනං ඉරියාපථම්පි සන්නා මෙති.

33. වොට්ඨපන කාමාවචර ජවනාභිඤ්ඤා පන විඤ්ඤත්තිම්පි සමුට්ඨාපෙන්ති.

34. සොමනස්ස ජවනානි පනෙත්ථ තෙරස හසනම්පි ජනෙන්ති.

35. සීතුණ්හොතුසමඤ්ඤාතා තෙජොධාතු ඨිතිප්පත්තාව උතුසමුට්ඨානරූපං අජ්ඣත්තංච බහිද්ධාච යථාරහං සමුට්ඨාපෙති.

36. ඕජා සඞ්ඛාතො ආහාරො ආහාරසමුට්ඨානරූපං අජ්ඣොහරණකාලෙ ඨානප්පත්තොව සමුට්ඨාපෙති.

37. තත්ථ හදය ඉන්ද්‍රිය රූපානි කම්මජා නෙව.

38. විඤ්ඤත්තිද්වයං චිත්තජමෙව.

39. සද්දො චිත්තොතුජො

40. ලහුතාදිත්තයං උතුචිත්තාහාරෙහි සම්භොති.

41. අවිනිබ්භොගරූපානි චෙව ආකාසධාතුව චතූහි සම්භූතානි.

42. ලක්ඛණ රූපානි න කුතොචි ජායන්ති.