අයමෙත්ථ රූප සමුද්දෙසො.

18. සබ්බඤ්ච පනෙතං රූපං අහෙතුකං සප්පච්චයං

සාසවං සඞ්ඛතං ලොකියං කාමාවචරං අනාරම්මණං

අප්පහාතබ්බමෙවාති එකවිධම්පි අජ්ඣත්තික බාහිරාදිවසෙන

බහුධා භෙදං ගච්ඡති.

19. කථං? පසාද සඞ්ඛාතං පඤ්චවිධංපි අජ්ඣත්තික

රූපං නාම ඉතරං බාහිර රූපං.

20. පසාද හදය සඞ්ඛාතං ඡබ්බිධම්පි වත්ථු රූපං නාම,

ඉතරං අවත්ථු රූපං

21. පසාද විඤ්ඤත්ති සඞ්ඛාතං සත්තවිධම්පි ද්වාර රූපං නාම, ඉතරං අද්වාර රූපං.

22. පසාද භාව ජීවිත සඞ්ඛාතං අට්ඨවිධම්පි ඉන්ද්‍රිය රූපං නාම, ඉතරං අනින්ද්‍රිය රූපං.

23. පසාද විසය සඞ්ඛාතං ද්වාදසවිධම්පි ඔළාරික රූපං සන්තිකෙ රූපං, සප්පටිඝරූපඤ්ච, ඉතරං සුඛුම රූපං, දූරෙ රූපං අප්පටිඝරූපඤ්ච.

24. කම්මජං උපාදින්න රූපං ඉතරං අනුපාදින්න රූපං.

25. රූපායතනං සනිදස්සන රූපං, ඉතරං අනිදස්සන රූපං.

26. චක්ඛාදිද්වයං අසම්පත්ත වසෙන, ඝාණාදිත්තයං සම්පත්ත වසෙනාති පඤ්චවිධම්පි ගොචරග්ගාහික රූපං නාම. ඉතරං අගොචරග්ගාහික රූපං.

27. වණ්ණො, ගන්ධො, රසො, ඔජා භූතචතුක්කඤ්චෙති අට්ඨවිධම්පි අවිනිබ්භොග රූපං, ඉතරං විනිබ්භොග රූපං.