ඉදමෙත්ථ භූමි චතුක්කං

15. අපායපටිසන්ධි කාමසුගති පටිසන්ධි රූපාවචරපටිසන්ධි අරූපාවචර පටිසන්ධි චෙති චතුබ්බිධා පටිසන්ධි නාම.

16. තත්ථ අකුසල විපාකොපෙක්ඛාසහගත සන්තීරණං අපායභූමියං ඔක්කන්තික්ඛණෙ පටිසන්ධි හුත්වා තතොපරං භවඞ්ගං පරියොසානෙ චවනං හුත්වා වොච්ඡිජ්ජති. අයමෙකාපාය පටිසන්ධි නාම.

17. කුසලවිපාකොපෙක්ඛාසහගත සන්තීරණං පන කාමසුගතියං මනුස්සානං චෙව ජච්චන්ධාදීනං, භුම්මස්සිතානංච විනිපාතිකා සුරානං පටිසන්ධි භවඞ්ග චුති වසෙන පවත්තති.

18. මහාවිපාකානි පන අට්ඨ සබ්බත්ථාපි කාම සුගතියං පටිසන්ධි භවඞ්ග චුතිවසෙන පවත්තන්ති.

19. ඉමා නව කාම සුගති පටිසන්ධියො නාම

20. සාපනායං දසවිධාපි කාමාවචර පටිසන්ධිච්චෙව සඞ්ඛං ගච්ඡති.

21. තෙසු චතුන්නං අපායානං මනුස්සානං විනිපාතිකාසුරානංච ආයුප්පමාණං ගණනාය නියමො නත්ථි.

22. චාතුම්මහාරාජිකානං පන දෙවානං දිබ්බානිපඤ්චවස්ස සතානි ආයුප්පමාණං, මනුස්සගණනාය නවුති වස්ස සත සහස්සප්පමාණං හොති.

23. තතො චතුග්ගුණං තාවතිංසානං තතො චතුග්ගුණං යාමානං තතො චතුග්ගුණං තුසිතානං, තතොචතුග්ගුණං නිම්මාන රතීනං, තතො චතුග්ගුණං පරනිම්මිත වසවත්තීනං.

25. පඨමජ්ඣාන විපාකං පඨමජ්ඣාන භූමියං පටිසන්ධි භවඞ්ග චුතිවසෙන පවත්තති.

26. තථා දුතියජ්ඣාන විපාකං තතියජ්ඣාන විපාකඤ්ච දුතියජ්ඣාන භූමියං.

27. චතුත්ථජ්ඣාන විපාකං තතියජ්ඣාන භූමියං.

28. පඤ්චමජ්ඣාන විපාකං චතුත්ථජ්ඣාන භූමියං.

29. අසඤ්ඤසත්තානං පන රූපමෙව පටිසන්ධිහොති. තථා තතො පරං පවත්තියං චවන කාලෙච රූපමෙව පවත්තිත්වා නිරුජ්ඣති.

30. ඉමා ඡ රූපාවචර පටිසන්ධියො නාම.

31. තෙසු බ්‍රහ්මපාරිසජ්ජානං දෙවානං කප්පස්ස තතියො භාගො ආයුප්පමාණං, බ්‍රහ්ම පුරොහිතානං උපඩ්ඪකප්පො, මහාබ්‍රහ්මානං එකොකප්පො.

32. පරිත්තාභානං ද්වෙකප්පානි, අප්පමාණාභානං චත්තාරි-කප්පානි, ආභස්සරානං අට්ඨකප්පානි.

33. පරිත්තසුභානං සොළසකප්පානි, අප්පමාණසුභානං ද්වත්-තිංසකප්පානි, සුභකිණ්හානං චතුසට්ඨි කප්පානි.

34. වෙහප්ඵලානං අසඤ්ඤසත්තානංච පඤ්චකප්පසතානි.

35. අවිහානං කප්පසහස්සානි, අතප්පානං ද්වෙකප්පසහස්සානි සුදස්සානං චත්තාරි කප්ප සහස්සානි, සුදස්සීනං අට්ඨකප්ප සහස්සානි අකනිට්ඨානං සොළස කප්ප සහස්සානි.

36. පඨමාරුප්පාදි විපාකානි පඨමාරුප්පාදි භූමීසු යථාක්කමං පටිසන්ධි භවඞ්ග චුතිවසෙන පවත්තන්ති. ඉමාචතස්සො ආරුප්පපටිසන්ධියො නාම.

37. තෙසුපන ආකාසානඤ්චායතනුපගානං දෙවානං වීසති කප්ප සහස්සානි ආයුප්පමාණං.

38. විඤ්ඤාණඤ්චායතනුපගානං දෙවානං චත්තාලීසකප්ප සහස්සානි

39. ආකිඤ්චඤ්ඤායතනුපගානං දෙවානං සට්ඨිකප්පසහස්සානි.

40. නෙවසඤ්ඤා නාසඤ්ඤායතනුපගානං දෙවානං චතුරාසීතිකප්ප සහස්සානි.