වීථිමුත්ත සඞ්ගහ විභාගො

2. චතස්සො භූමියො චතුබ්බිධා පටිසන්ධි චත්තාරිකම්මානි චතුධා මරණුප්පත්ති චෙති වීථිමුත්ත සඞ්ගහෙ චත්තාරි චතුක්කානි වෙදිතබ්බානි.

3. තත්ථ අපායභූමි කාමසුගතිභූමි රූපාවචරභූමි අරූපාවචර භූමි චෙති චතස්සො භූමියො නාම.

4. තාසු නිරයො තිරච්ඡානයොනි පෙත්තිවිසයො අසුරකායො චෙති අපායභූමි චතුබ්බිධා හොති.

5. මනුස්සා චාතුම්මහාරාජිකා තාවතිංසා යාමා තුසිතා නිම්මාණ රති පරනිම්මිත වසවත්තී චෙති කාමසුගති භූමි සත්තවිධා හොති.

6. සා පනායමෙකාදසවිධාපි කාමාවචර භූමිච්චෙව සඞ්ඛංගච්ඡති.

7. බ්‍රහ්මපාරිසජ්ජා බ්‍රහ්මපුරොහිතා මහාබ්‍රහ්මා චෙති පඨමජ්ඣාන භූමි.

8. පරිත්තාභා අප්පමාණාභා ආභස්සරා චෙති දුතියජ්ඣාන භූමි

9. පරිත්තසුභා අප්පමාණසුභා සුභකිණ්හා චෙති තතියජ්ඣාන භූමි.

10. වෙහප්ඵලා අසඤ්ඤසත්තා සුද්ධාවාසා චෙති චතුත්ථජ්ඣාන භූමීති රූපාවචර භූමි සොළස විධා හොති.

11. අවිහා අතප්පා සුදස්සා සුදස්සී අකනිට්ඨා චෙති සුද්ධාවාස භූමි පඤ්ච විධා හොති.

12. ආකාසානඤ්චායතන භූමි විඤ්ඤාණඤ්චායතන භූමි ආකිඤ්චඤ්ඤායතන භූමි නෙවසඤ්ඤානාසඤ්ඤායතන භූමි චෙති අරූපභූමි චතුබ්බිධාහොති.