8. 2. 6. 6.
කාමාධිවචන සූත්‍රය
[සැවැත් නිදානයි]
මහණෙනි, ‘බිය’ යන මෙය කාමයන්ට නමකි. මහණෙනි, ‘දුක’ යන මෙය කාමයන්ට නමකි. මහණෙනි, ‘රෝගය’ යන මෙය කාමයන්ට නමකි. මහණෙනි, ‘ගෙඩිය’ යන මෙය කාමයන්ට නමකි. මහණෙනි, ‘හුල’ යන මෙය කාමයන්ට නමකි. මහණෙනි, ‘සංග (බැම්ම)’ යන මෙය කාමයන්ට නමකි. මහණෙනි, ‘පංක (මඩ)’ යන මෙය කාමයන්ට නමකි. මහණෙනි, ‘ගර්‍භය’ යන මෙය කාමයන්ට නමකි.
මහණෙනි, කුමක් හෙයින් ‘බිය’ යනු කාමයන්ට නමක් වේද? මහණෙනි, යම් හෙයකින් කාමරාගයෙහි ඇලුනාවූ ඡන්දරාගයෙන් බැඳුනු මේ තෙමේ, මෙලොව බියෙන්ද නොමිදෙයි, පරලොව බියෙන්ද නොමිදෙයි, එබැවින් ‘බිය’ යනු කාමයන්ට නමකි.
මහණෙනි, කුමක් හෙයින් දුක යන මෙය කාමයන්ට නම් වේද... මහණෙනි, කුමක් හෙයින් රොගය යන මෙය කාමයන්ට නම් වේද... මහණෙනි, කුමක් හෙයින් ගෙඩිය යන මෙය කාමයන්ට නම් වේද... මහණෙනි, කුමක් හෙයින් හුල යන මෙය කාමයන්ට නම් වේද... මහණෙනි, කුමක් හෙයින් බැම්ම යන මෙය කාමයන්ට නම් වේද... මහණෙනි, කුමක් හෙයින් මඩ යන මෙය කාමයන්ට නම් වේද, මහණෙනි, යම් හෙයකින් කාමරාගයෙහි ඇලුනාවූ මේ තෙමේ ආශාවෙන් බැඳුනේ, මෙලොව බියෙන්ද නොමිදෙයි. පරලොව බියෙන්ද නොමිදෙයි. මේ නිසා මඩ යනු කාමයන්ට නමකි. මහණෙනි, කුමක් හෙයින් ගර්‍භය යන මෙය කාමයන්ට නම් වේද?
මහණෙනි, යම් හෙයකින් කාමරාගයෙහි ඇලුනාවූ මේ තෙමේ ඡන්දරාගයෙන් බැඳුනේ, මෙලොව ගර්භවාසයෙන්ද නොමිදෙයි, පරලොව ගර්භවාසයෙන්ද නොමිදෙයි, එබැවින් ‘ගර්භය’ යනු කාමයන්ට නමකි.
1. බියද, දුකද, රෝගයද, ගඩුවද, හුලද, සංගය (බැම්ම) ද, පංකය (මඩ) ද, ගර්භයද යන දෙකද, යන මොහු කාමයෝ යයි කියනු ලැබෙත්. යම් තැනක පෘථග්ජන සත්ත්වයා ඇලුනේ ද,
2. මිහිරි ස්වභාවයෙන් බැසගත්තේ, නැවත ගර්භවාසයට (ඉපදීමට) යෙයි. යම් හෙයකින් භික්ෂුව කෙලෙස් තවන වීර්‍ය්‍ය ඇත්තේ සම්පජන්නය (නුවණ) අත් නොහරි ද,
3. එබඳුවූ හෙතෙම මේ දුර්ග වූ මඩ වගුර ඉක්මවා, ජාති ජරාවන්ගෙන් යුක්තවූ, ගැහෙන්නාවූ ප්‍රජාව දෙස බලයි.
8. 2. 6. 7.
පඨම ආහුනෙය්‍ය භික්ඛු සූත්‍රය
[සැවැත් නිදානයි]
මහණෙනි, කරුණු අටකින් යුක්තවූ භික්ෂුව ආහුනෙය්‍ය වෙයි, පාහුනෙය්‍ය වෙයි, දක්ඛිණෙය්‍ය වෙයි, අඤ්ජලිකරණීය වෙයි, ලෝකයාට අනුත්තර පුණ්‍යක්ෂේත්‍රය වෙයි. කවර අටකින් ද යත්:
මහණෙනි, මේ ශාසනයෙහි භික්ෂුව සිල්වත් වෙයි -පෙ- ශික්ෂාපදයන්හි සමාදන් වී හික්මෙයි. බහුශ්‍රුත වෙයි -පෙ- නුවණින් (දෘෂ්ටියෙන්) මනාකොට අවබෝධ කළේ වෙයි. කල්‍යාණ මිත්‍රයන් ඇත්තේ, යහපත් සහායයන් ඇත්තේ, යහපත් අය කෙරෙහි නැමුණේ වෙයි. සම්‍යක් දර්ශනයෙන් යුක්ත වූ සම්මා දිට්ඨිකයෙක් (නිවැරදි දැක්ම ඇත්තෙක්) වෙයි. උසස් සිතට අයත් වූ, මෙලොවදීම සැපසේ වාසය කිරීම වූ ධ්‍යාන සතර කැමති සේ ලබන්නේ, දුකක් නැතිව ලබන්නේ, අපහසුවක් නැතිව ලබන්නේ වෙයි. නොයෙක් ආකාර වූ පෙර විසූ ජාතීන් සිහි කරයි. එනම්, එක් ජාතියක් ද, ජාති දෙකක් ද -පෙ- මෙසේ ආකාර සහිතව, නම් ගොත් ආදී විස්තර සහිතව නොයෙක් ආකාර වූ පෙර විසූ ජාතීන් සිහි කරයි. පිරිසිදු වූ, මිනිස් ඇස ඉක්මවා ගිය දිවැසින් -පෙ- කර්මය පරිදි උපදින සත්ත්වයන් දැනගනියි. ආශ්‍රවයන් ක්ෂය වීමෙන් -පෙ- ප්‍රත්‍යක්ෂ කොට, එයට පැමිණ වාසය කරයි. මහණෙනි, මේ කරුණු අටින් යුක්ත වූ භික්ෂුව ආහුනෙය්‍ය වෙයි -පෙ- ලෝකයාට අනුත්තර පුණ්‍යක්ෂේත්‍රය වෙයි.