5. 2. 1. 9.
බුඩ්ඪ පබ්බජිත සූත්‍රය [පඨම]
[සැවැත් නුවර නිදානයි]
9. “මහණෙනි, කරුණු පසකින් යුක්තවූ මහළුව පැවිදිවූ තැනැත්තේ දුර්ලභ වේ. කවර පසකින්ද යත්,
“මහණෙනි, සියුම් කාරණා දන්නාවූ වෘද්‍ධ ප්‍රවෘජිත තෙම දුර්ලභ වේ. ශ්‍රමණ කල්පයෙන් යුක්තවූයේ දුර්ලභ වේ. බොහෝ ඇසූ පිරූ තැන් ඇත්තේ දුර්ලභ වේ. ධර්මකථික වූයේ දුර්ලභ වේ. විනයධර වූයේ දුර්ලභ වේ.
“මහණෙනි, කරුණු පසකින් යුක්තවූ මහළුව පැවිදිවූ තැනැත්තේ දුර්ලභ වේ.
5. 2. 1. 10.
බුඩ්ඪ පබ්බජිත සූත්‍රය [දුතිය]
[සැවැත් නුවර නිදානයි]
10. “මහණෙනි, කරුණු පසකින් යුක්තවූ මහළුව පැවිදිවූ තැනැත්තේ දුර්ලභ වේ. කවර පසකින්ද යත්,
“මහණෙනි, කීකරුවූ මහළුව පැවිදිවූ තැනැත්තේ දුර්ලභ වේ.. මනාකොට ගන්නා ලද ගැනීම් ඇත්තේ දුර්ලභ වේ. පැදකුණු කිරීමෙන් අවවාද ගන්නේ දුර්ලභ වේ. ධර්මකථික වූයේ දුර්ලභ වේ. විනයධර වූයේ දුර්ලභ වේ.
“මහණෙනි, කරුණු පසකින් යුක්තවූ මහළුව පැවිදිවූ තැනැත්තේ දුර්ලභ වේ.
පළමුවැනි නීවරණ වර්ගය නිමි.
එහි උද්දානය:
ආවරණ (නීවරණ) සූත්‍රය, රාසි සූත්‍රය, අඞ්ග සූත්‍රය, සමය සූත්‍රය, මාතාපුත්ත සූත්‍රය, උපජ්ඣාය සූත්‍රය, ඨාන සූත්‍රය, ලිච්ඡවි කුමාර සූත්‍රය සහ අනෙක් (බුඩ්ඪපබ්බජිත) සූත්‍ර දෙක යි.
(7) 2. සඤ්ඤා වර්ගය
5. 2. 2. 1.
1. පඤ්ච සඤ්ඤා සූත්‍රය
[සැවැත් නුවර නිදානයි]
11. “මහණෙනි, වඩන ලද, බහුල වශයෙන් කරන ලද මේ සංඥා පස (විපාක වශයෙන්) මහත් ඵල ඇත්තාහු, මහත් අනුසස් ඇත්තාහු, නිවන පිහිට කොට ඇත්තාහු, නිවන කෙළවර කොට ඇත්තාහු වෙත්. කවර පසක් ද යත්:
අශුභ සංඥාව, මරණ සංඥාව, ආදීනව සංඥාව, ආහාරයෙහි පිළිකුල් සංඥාව, සියලු ලෝකයෙහි නොඇලීමේ (අනභිරත) සංඥාව යන පසයි.
“මහණෙනි, වඩන ලද, බහුල වශයෙන් කරන ලද මේ සංඥා පස මහත් ඵල ඇත්තාහු, මහත් අනුසස් ඇත්තාහු, නිවන පිහිට කොට ඇත්තාහු, නිවන කෙළවර කොට ඇත්තාහු වෙත්.”
5. 2. 2. 2.
[දෙවැනි සඤ්ඤා සූත්‍රය]
[සැවැත් නුවර නිදානයි]
12. “මහණෙනි, වඩනා ලද, බහුල වශයෙන් කරණ ලද මේ සංඥා පස මහත් ඵල ඇත්තාහු, මහත් අනුසස් ඇත්තාහු, නිවණට ප්‍රතිෂ්ටා වූවාහු, නිවන් කෙළවර කොට ඇත්තාහු වෙත්. කවර පසක්ද යත්?
අනිත්‍ය සංඥාය, අනාත්ම සංඥාය, මරණ සංඥාය, ආහාරයෙහි පිලිකුල් සංඥාය, සියලු ලෝකයෙහි නොඇලීම් සංඥාය යන පසයි.
“මහණෙනි, වඩනා ලද, බහුල වශයෙන් කරණ ලද මේ සංඥා පස මහත් ඵල ඇත්තාහු, මහත් අනුසස් ඇත්තාහු, නිවණට ප්‍රතිෂ්ටා වූවාහු, නිවන් කෙළවර කොට ඇත්තාහු වෙත්.
5. 2. 2. 3.
3. අරියවුද්‍ධි සූත්‍රය
[සැවැත් නුවර නිදානයි]
13. “මහණෙනි, වැඩීම් පසකින් වැඩෙන්නාවූ ආර්‍ය්‍ය ශ්‍රාවක තෙම ආර්‍ය්‍යවූ වැඩීමෙන් වැඩෙයි. කය පිළිබඳ සාරය ගන්නේද, උතුම් දෙය ගන්නේ වේ. කවර පසකින්ද යත්?
ශ්‍රද්‍ධාවෙන් වැඩේද, ශීලයෙන් වැඩේද, ශ්‍රුතයෙන් වැඩේද, ත්‍යාගයෙන් වැඩේද, ප්‍රඥාවෙන් වැඩේද යන පසිනි.
“මහණෙනි, වැඩීම් පසකින් වැඩෙන්නාවූ ආර්‍ය්‍ය ශ්‍රාවක තෙම ආර්‍ය්‍යවූ වැඩීමෙන් වැඩෙයි. කය පිළිබඳ සාරය ගන්නේද, උතුම් දෙය ගන්නේ වේ.
16. “මේ ලෝකයෙහි යම් ආර්‍ය්‍ය ශ්‍රාවකයෙක් ශ්‍රද්‍ධාවෙන් හා ශීලයෙන්ද, ප්‍රඥාවෙන් හා ත්‍යාගය, ශ්‍රුතය යන මෙයින් වැඩේද, එබඳුවූ, විචක්‍ෂණවූ, ඒ සත්පුරුෂ තෙම මෙලොවම ආත්මයාගේ උභය සාරය ගණීය” යි වදාළ සේක