1. 7. 2.
දුතිය මිගජාල සූත්‍රය
64. එකල්හි ආයුෂ්මත් මිගජාල ස්ථවිරතෙම භාග්‍යවතුන් වහන්සේ යම් තැනෙක්හිද, එතැනට පැමිණියේය. පැමිණ, භාග්‍යවතුන් වහන්සේට වැඳ, එකත්පසෙක හුන්නේය. එක් පසෙක හුන්නාවූ ආයුෂ්මත් මිගජාල ස්ථවිර තෙම භාග්‍යවතුන් වහන්සේට මෙය සැළ කෙළේය. “ස්වාමීනි, මම භාග්‍යවතුන් වහන්සේගේ යම් ධර්‍මයක් අසා, එකලාව, සමූහයෙන් වෙන්ව, අප්‍රමාදව, කෙලෙස් තවන වීර්‍ය්‍යයෙන් යුක්තව, ආත්ම පරිත්‍යාගයෙන් යුක්තව වාසය කරන්නෙම්ද, භාග්‍යවතුන් වහන්සේ මට එබඳු ධර්‍මයක් දේශනා කරන්නේ නම් මැනව” කියායි.
“මිගජාල, චක්ඛු විඤ්ඤාණයෙන් (ඇසින්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ රූප ඇත්තාහ. ඉදින් මහණ තෙමේ එය පතයි ද, ගුණ වනයි ද, (එහි) ගැලී සිටියි ද, එය පතන, ගුණ වනන, (එහි) ගැලී සිටින ඔහුට තෘෂ්ණා සතුට උපදියි. මිගජාල, තෘෂ්ණා සතුට හටගැනීමෙන් දුක හටගැනීම වේ යයි කියමි. -පෙ-
“මිගජාල, ජිව්හා විඤ්ඤාණයෙන් (දිවෙන්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ රස ඇත්තාහ. -පෙ- මනෝ විඤ්ඤාණයෙන් (සිතින්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ ධර්ම ඇත්තාහ. ඉදින් මහණ තෙමේ එය පතයි ද, ගුණ වනයි ද, (එහි) ගැලී සිටියි ද, එය පතන, ගුණ වනන, (එහි) ගැලී සිටින ඔහුට තෘෂ්ණා සතුට උපදියි. මිගජාල, තෘෂ්ණා සතුට හටගැනීමෙන් දුක හටගැනීම වේ යයි කියමි.
“මිගජාල, චක්ඛු විඤ්ඤාණයෙන් (ඇසින්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ රූප ඇත්තාහ. ඉදින් මහණ තෙමේ එය නොපතයි ද, ගුණ නොවනයි ද, (එහි) ගැලී නොසිටියි ද, එය නොපතන, ගුණ නොවනන, (එහි) ගැලී නොසිටින ඔහුගේ තෘෂ්ණා සතුට නිරුද්ධ වෙයි. මිගජාල, තෘෂ්ණා සතුට නිරුද්ධ වීමෙන් (සසර) දුක නිරුද්ධ වීම වේ යයි කියමි. -පෙ-
“මිගජාල, ජිව්හා විඤ්ඤාණයෙන් (දිවෙන්) දත යුතු රස -පෙ- මිගජාල, මනෝ විඤ්ඤාණයෙන් (සිතින්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ ධර්ම ඇත්තාහ. ඉදින් මහණ තෙමේ එය නොපතයි ද, ගුණ නොවනයි ද, (එහි) ගැලී නොසිටියි ද, එය නොපතන, ගුණ නොවනන, (එහි) ගැලී නොසිටින ඔහුගේ තෘෂ්ණා සතුට නිරුද්ධ වෙයි. මිගජාල, තෘෂ්ණා සතුට නිරුද්ධ වීමෙන් (සසර) දුක නිරුද්ධ වීම වේ යයි කියමි” යි වදාළ සේක. ඉක්බිති ආයුෂ්මත් මිගජාල තෙරුන් වහන්සේ භාග්‍යවතුන් වහන්සේගේ දේශනාව සතුටින් පිළිගෙන, අනුමෝදන් වී, හුනස්නෙන් නැගිට, භාග්‍යවතුන් වහන්සේට වැඳ, පැදකුණු කොට නික්ම වැඩියහ.
ඉක්බිති ආයුෂ්මත් මිගජාල ස්ථවිරතෙම හුදකලාව සමූහයාගෙන් වෙන්ව, අප්‍රමාදව, කෙලෙස් තවන වීර්‍ය්‍යයෙන් යුක්තව, ආත්මාලය දුරුකොට වාසය කරන්නේ නොබෝ කලකින්ම යමක් සඳහා කුලපුත්‍රයෝ මනාකොට ගිහිගෙයින් නික්ම ශාසනයෙහි පැවිදිවෙත්ද, මාර්‍ග බ්‍රහ්මචර්‍ය්‍යාව කෙළවරකොට ඇති ඒ උතුම් අර්ථය මේ ආත්මයෙහිම තෙමේ විශිෂ්ට ඥානයෙන් දැන ප්‍රත්‍යක්‍ෂකොට ඊට පැමිණ වාසය කෙළේය. “ජාතිය ක්‍ෂයවිය. බ්‍රහ්මචර්‍ය්‍යයාවෙහි හැසිර නිමවන ලද්දේය. සතර මගින් කළයුත්ත කරන ලදී. මේ ආත්මභාවය පිණිස කළයුතු අනිකක් නැතැයි විශේෂයෙන් දැනගත් සේක. ආයුෂ්මත් මිගජාල ස්ථවිර තෙමේ රහතුන් අතුරෙන් එක්තරා කෙනෙක්ද වූයේයයි වදාළ සේක.