4. 1. 9.
9. ධාතු සූත්රය
310. (මේ සූත්රයද මේ වර්ගයේ 1 වෙනි සූත්රය මෙන් ජේතවනාරාමයේදී දේශනා කරන ලදී.)
“මහණෙනි, පඨවී ධාතුව අනිත්යය, පෙරළෙන ස්වභාවය, වෙනස් වන ස්වභාවය. ආපෝ ධාතුව අනිත්යය, පෙරළෙන ස්වභාවය, වෙනස් වන ස්වභාවය. තේජෝ ධාතුව අනිත්යය, පෙරළෙන ස්වභාවය, වෙනස් වන ස්වභාවය. වායෝ ධාතුව අනිත්යය, පෙරළෙන ස්වභාවය, වෙනස් වන ස්වභාවය. ආකාශ ධාතුව අනිත්යය, පෙරළෙන ස්වභාවය, වෙනස් වන ස්වභාවය. විඤ්ඤාණ ධාතුව අනිත්යය, පෙරළෙන ස්වභාවය, වෙනස් වන ස්වභාවය. මහණෙනි, යමෙක් මේ ධර්මයන් මෙසේ අදහයි ද, නිශ්චය කරයි ද, මේ පුද්ගල තෙමේ ආර්ය මාර්ගයට පැමිණියා වූ, සත්පුරුෂ භූමියට පැමිණියා වූ, පෘථග්ජන භූමිය ඉක්මවූ සද්ධානුසාරී පුද්ගලයා යයි කියනු ලැබේ. හෙතෙම යම් කර්මයක් කොට නිරයෙහි හෝ තිරිසන් යෝනියෙහි හෝ ප්රේත ලෝකයෙහි හෝ උපදින්නේ ද, ඒ කර්මය කිරීමට නුසුදුසු වෙයි. යම්තාක් සෝවාන් ඵලය සාක්ෂාත් නොකරයි ද, ඒතාක් කළුරිය කිරීමට නුසුදුසු වෙයි. මහණෙනි, යමෙකුට වනාහි මේ ධර්මයෝ ප්රඥාවෙන් ප්රමාණවත් ලෙස සලකා පිළිගැනීමට ඉවසත් ද, මේ පුද්ගල තෙමේ ආර්ය මාර්ගයට පැමිණියා වූ, සත්පුරුෂ භූමියට පැමිණියා වූ, පෘථග්ජන භූමිය ඉක්මවූ ධම්මානුසාරී පුද්ගලයා යයි කියනු ලැබේ. හෙතෙම යම් කර්මයක් කොට නිරයෙහි හෝ තිරිසන් යෝනියෙහි හෝ ප්රේත ලෝකයෙහි හෝ උපදින්නේ ද, ඒ කර්මය කිරීමට නුසුදුසු වෙයි. යම්තාක් සෝවාන් ඵලය සාක්ෂාත් නොකරයි ද, ඒතාක් කළුරිය කිරීමට නුසුදුසු වෙයි. මහණෙනි, යමෙක් මේ ධර්මයන් මෙසේ දනියි ද, දකියි ද, හෙතෙමේ අපායෙහි නොවැටෙන ස්වභාව ඇති, නියත වූ, අර්හත්වයට ඒකාන්තයෙන් පැමිණෙන්නා වූ සෝවාන් පුද්ගලයා යයි කියනු ලැබේ.”
4. 1. 10.
10. ඛන්ධ සූත්රය
311. (මේ සූත්රයද මේ වර්ගයේ 1 වෙනි සූත්රය මෙන් ජේතවනාරාමයේදී දේශනා කරන ලදී.)
“මහණෙනි, රූපය අනිත්යය, පෙරලෙන ස්වභාවය, වෙනස්වන ස්වභාවය.
වේදනාව අනිත්යය, පෙරලෙන ස්වභාවය, වෙනස්වන ස්වභාවය, සඤ්ඤාව අනිත්යය පෙරලෙන ස්වභාවය. වෙනස්වන ස්වභාවය, සංස්කාරයෝ අනිත්යය, පෙරලෙන ස්වභාවය, වෙනස්වන ස්වභාවය. විඤ්ඤාණය අනිත්යය, පෙරලෙන ස්වභාවය, වෙනස්වන ස්වභාවය.
“මහණෙනි, යමෙක් මේ ධර්මයන් මෙසේ අදහයිද, ශ්රද්ධාව කරණකොට මිදෙයිද, මේ පුද්ගලතෙමේ ආර්ය මාර්ගයට පැමිණියාවූ සත්පුරුෂ භූමියට පැමිණියාවූ පෘථග්ජන භූමිය ඉක්මවූ සෝවාන් පුද්ගලයායයි කියනු ලැබේ. හෙතෙම යම් කර්මයක් කොට නිරයෙහි හෝ තිරිසන් යෝනියෙහි හෝ ප්රේත ලෝකයෙහි හෝ උපදින්නේද, ඒ කර්මය කිරීමට නුසුදුසු වෙයි. යම්තාක් සෝවාන් ඵලයට නොපැමිණියේද, ඒතාක් කළුරිය කිරීමට නුසුදුසු වෙයි.
“මහණෙනි, යමෙකුට වනාහි මේ ධර්මයෝ මෙසේ ප්රඥාව කරණකොට ගෙන ප්රමාණ වශයෙන් දැකීමට පැමිණෙත්ද, මේ පුද්ගලතෙමේ ආර්ය මාර්ගයට පැමිණියාවූ සත්පුරුෂ භූමියට පැමිණියාවූ පෘථග්ජන භූමිය ඉක්මවූ ධම්මානුසාරී පුද්ගලයායි කියනු ලැබේ. “හෙතෙම යම් කර්මයක්කොට නිරයෙහි හෝ තිරිසන් යෝනියෙහි හෝ ප්රේත ලෝකයෙහි හෝ උපදින්නේද, ඒ කර්මය කිරීමට නුසුදුසු වෙයි. යම්තාක් සෝවාන් ඵලයට නොපැමිණේද ඒතාක් කළුරිය කිරීමට නුදුසුසු වෙයි.
“මහණෙනි, යමෙක් මේ ධර්මයන් මෙසේ දනියිද, දකියිද හෙතෙමේ අපායෙහි නොවැටීම ස්වභාවකොට ඇත්තාවූ නියතවූ අර්හත්වයට ඒකාන්තයෙන් පැමිණෙන්නාවූ සෝවාන් පුද්ගලයායයි කියනු ලැබේ.”
චක්ඛු වර්ගය පළමුවැනියි.
එහි උද්දානය:
චක්ඛු සූත්රය, රූප සූත්රය, විඤ්ඤාණ සූත්රය, ඵස්ස සූත්රය, වේදනා සූත්රය, සඤ්ඤා සූත්රය, චෙතනා සූත්රය, තණ්හා සූත්රය, ධාතු සූත්රය සහ ඛන්ධ සූත්රය දැයි මේ වර්ගයෙහි සූත්ර දසයක් වෙත්.
ඔක්කන්තසංයුත්තං (ඔක්කන්තිකසංයුත්තං (පී. ක.)) සමත්තං.