3. 2. 10.
10. සංඛාරුප්පත්ති සූත්රය
මා විසින් මෙසේ අසන ලදී. එක් සමයක භාග්යවතුන් වහන්සේ සැවැත් නුවර සමීපයෙහිවූ, අනේපිඬු සිටුහු විසින් කරවන ලද ජේතවනාරාමයෙහි වාසය කරති. එහිදී භාග්යවතුන් වහන්සේ “මහණෙනි, කියා භික්ෂූන්ට ආමන්ත්රණය කළහ. ඒ භික්ෂූහු ‘භාග්යවතුන් වහන්සේ යැයි’ උත්තර දුන්හ. භාග්යවතුන් වහන්සේ මෙය වදාළසේක.
“මහණෙනි, (මම) තොපට සංස්කාරයන්ගේ ඇතිවීම දේශනා කරන්නෙමි. එය අසව්, මනාකොට මෙනෙහි කරව්. කියන්නෙමි.” “එසේය ස්වාමීනියි” ඒ භික්ෂූහු උත්තර දුන්හ. භාග්යවතුන් වහන්සේ මෙය වදාළ සේක.
“මහණෙනි, මේ ශාසනයෙහි මහණතෙම ශ්රද්ධාවෙන් යුක්තවූයේ වෙයිද, ශීලයෙන් යුක්තවූයේ වෙයිද, බහුශ්රැත භාවයෙන් යුක්තවූයේ වෙයිද, ත්යාගයෙන් යුක්ත වූයේ වෙයිද, ප්රඥාවෙන් යුක්තවූයේ වෙයිද, ඔහුට මම මේ ශරීරය බිඳීමෙන් මරණින් පසු ක්ෂත්රිය මහාසාරයන් හා එක්වීමට (උප්පත්ති වශයෙන්) පැමිණෙම් නම් ඉතා හොඳයයි සිත් වන්නේය. හෙතෙම ඒ සිත තබයිද ඒ සිත පිහිටුවයිද ඒ සිත වඩයිද, මෙසේ වඩන ලද මෙසේ පුරුදු කරනලද ඒ ප්රාර්ථනාව සහිත ශ්රද්ධාදි ධර්මයෝ එහි ඉපදීම පිණිස පවතිත්. මහණෙනි, මේ මාර්ගය මේ ප්රතිපදාව එහි ඉපදීම පිණිස පවතී.
“මහණෙනි, නැවතද මහණතෙම ශ්රද්ධාවෙන් යුක්ත වූයේ වෙයිද, ශීලයෙන් යුක්තවූයේ වෙයිද, බහුශ්රැත භාවයෙන් යුක්තවූයේ වෙයිද ත්යාගයෙන් යුක්ත වූයේ වෙයිද, ප්රඥාවෙන් යුක්තවූයේ වෙයිද, ඒ මහණහට ශරීරය බිඳීමෙන් මරණින් පසු මම බ්රාහ්මණ මහාසාරයන් එක්වීමට පැමිණෙන්නෙම් නම් ඉතා හොඳයයි සිතන්නේද ඒ සිත තබන්නේද ඒ සිත පිහිටුවයිද ඒ සිත වඩයිද මෙසේ වඩනලද මෙසේ පුරුදු කරන ලද ඒ ප්රාර්ථනාව සහිත ශ්රද්ධාදි ධර්මයෝ එහි ඉපදීම පිණිස පවතිත්. මහණෙනි, මේ මාර්ගය මේ ප්රතිපදාව එහි ඉපදීම පිණිස පවතී. “මහණෙනි, නැවතද මහණතෙමේ ශ්රද්ධාවෙන් යුක්ත වූයේ සීලයෙන් යුක්තවූයේ ත්යාගයෙන් යුක්තවූයේ බහුශ්රැතයෙන් යුක්තවූයේ ප්රඥාවෙන් යුක්තවූයේ වෙයිද, ඔහුට මම ශරීරය බිඳීමෙන් මරණින් මතු ගෘහපති මහාසාර කුලයෙහි උපදින්නෙම් නම් හොඳයයි සිත්වන්නේය. හෙතෙම ඒ සිත තබයිද ඒ සිත පිහිටුවයිද ඒ සිත වඩයිද මෙසේ වඩන ලද මෙසේ පුරුදු කරන ලද ඒ ප්රාර්ථනාව සහිත ශ්රද්ධාදි ධර්මයෝ ගෘහපති මහාසාර කුලයෙහි ඉපදීම පිණිස ඒ මහණහට හේතුවෙත්. මහණෙනි, මේ මාර්ගය, මේ ප්රතිපදාව, ඒ ගෘහපති මහාසාර කුලයෙහි ඉපදීම පිණිස පවතියි.
“මහණෙනි, නැවතද මහණතෙම ශ්රද්ධාවෙන් යුක්ත වූයේ ශීලයෙන් යුක්තවූයේ බහුශ්රැත භාවයෙන් යුක්තවූයේ ත්යාගයෙන් යුක්තවූයේ ප්රඥාවෙන් යුක්තවූයේ වෙයිද, ඔහු විසින් චාතුර්මහාරාජික දෙවියෝ දීර්ඝායුෂ ඇත්තෝය, වර්ණ ඇත්තෝය, බොහෝ සැප ඇත්තෝයයි අසන ලද්දේ වෙයි. ඔහුට මම කය බිඳීමෙන් මරණින් පසු චාතුර්මහාරාජික දෙවියන් හා එක්වීමට පැමිණෙම් නම්, ඉතා හොඳයයි සිත් වන්නේය. හෙතෙම ඒ සිත තබයිද ඒ සිත පිහිටුවයිද ඒ සිත වඩයිද මෙසේ වඩනලද, මෙසේ පුරුදු කරනලද ඒ ප්රාර්ථනාව සහිත ශ්රද්ධාදී ධර්මයෝ ඒ දෙව්ලොව ඉපදීම පිණිස පවතිත්. මහණෙනි, මේ මාර්ගය, මේ ප්රතිපදාව ඒ දෙව්ලොව ඉපදීම පිණිස පවතියි.
තවද මහණෙනි, භික්ෂුව ශ්රද්ධාවෙන් යුක්ත වෙයි, ශීලයෙන් යුක්ත වෙයි, බහුශ්රැත භාවයෙන් යුක්ත වෙයි, ත්යාගයෙන් යුක්ත වෙයි, ප්රඥාවෙන් යුක්ත වෙයි. ඔහු විසින් ‘තව්තිසා දෙවියෝ -පෙ- යාම දෙවියෝ -පෙ- තුසිත දෙවියෝ -පෙ- නිර්මාණරතී දෙවියෝ -පෙ- පරනිර්මිත වසවර්ති දෙවියෝ දීර්ඝායුෂ ඇත්තෝය, වර්ණ ඇත්තෝය, බොහෝ සැප ඇත්තෝය’ යි අසන ලද්දේ වෙයි. ඔහුට මෙසේ සිතෙයි: “අහෝ, මම කය බිඳී මරණින් පසු පරනිර්මිත වසවර්ති දෙවියන් සමඟ එක්ව උපදින්නෙම් නම් මැනවි!” හෙතෙම ඒ සිත තබයි, ඒ සිත පිහිටුවයි, ඒ සිත වඩයි. මෙසේ වඩන ලද, මෙසේ බහුල වශයෙන් පුරුදු කරන ලද ඔහුගේ ඒ සංස්කාරයෝ ද විහාරයෝ ද එහි ඉපදීම පිණිස පවතිත්. මහණෙනි, මේ මාර්ගය, මේ ප්රතිපදාව එහි ඉපදීම පිණිස පවතියි.
තවද මහණෙනි, භික්ෂුව ශ්රද්ධාවෙන් යුක්ත වෙයි, ශීලයෙන් යුක්ත වෙයි, බහුශ්රැත භාවයෙන් යුක්ත වෙයි, ත්යාගයෙන් යුක්ත වෙයි, ප්රඥාවෙන් යුක්ත වෙයි. ඔහු විසින් ‘සහස්ස බ්රහ්මයා දීර්ඝායුෂ ඇත්තේය, වර්ණ ඇත්තේය, බොහෝ සැප ඇත්තේය’ යි අසන ලද්දේ වෙයි. මහණෙනි, සහස්ස බ්රහ්මයා දහසක් ලෝකධාතුව ආලෝකයෙන් පතුරුවා බැසගෙන (නොහොත් දැනගෙන) වාසය කරයි. එහි උපන් යම් සත්වයෝ වෙත් ද, ඔවුන් ද පතුරුවා බැසගෙන වාසය කරයි. මහණෙනි, ඇස් ඇති පුරුෂයෙක් එක් නෙල්ලි ගෙඩියක් අතෙහි තබාගෙන බලන්නේ යම් සේ ද, මහණෙනි, එසේම සහස්ස බ්රහ්මයා දහසක් ලෝකධාතුව පතුරුවා බැසගෙන වාසය කරයි. එහි උපන් යම් සත්වයෝ වෙත් ද, ඔවුන් ද පතුරුවා බැසගෙන වාසය කරයි. ඒ භික්ෂුවට මෙසේ සිතෙයි: “අහෝ, මම කය බිඳී මරණින් පසු සහස්ස බ්රහ්මයා සමඟ එක්ව උපදින්නෙම් නම් මැනවි!” හෙතෙම ඒ සිත තබයි, ඒ සිත පිහිටුවයි, ඒ සිත වඩයි. මෙසේ වඩන ලද, මෙසේ බහුල වශයෙන් පුරුදු කරන ලද ඔහුගේ ඒ සංස්කාරයෝ ද විහාරයෝ ද එහි ඉපදීම පිණිස පවතිත්. මහණෙනි, මේ මාර්ගය, මේ ප්රතිපදාව එහි ඉපදීම පිණිස පවතියි.
තවද මහණෙනි, භික්ෂුව ශ්රද්ධාවෙන් යුක්ත වෙයි, ශීලයෙන් යුක්ත වෙයි, බහුශ්රැත භාවයෙන් යුක්ත වෙයි, ත්යාගයෙන් යුක්ත වෙයි, ප්රඥාවෙන් යුක්ත වෙයි. ඔහු විසින් ‘ද්විසහස්ස බ්රහ්මයා -පෙ- තිසහස්ස බ්රහ්මයා -පෙ- චතුසහස්ස බ්රහ්මයා -පෙ- පඤ්චසහස්ස බ්රහ්මයා දීර්ඝායුෂ ඇත්තේය, වර්ණ ඇත්තේය, බොහෝ සැප ඇත්තේය’ යි අසන ලද්දේ වෙයි. මහණෙනි, පඤ්චසහස්ස බ්රහ්මයා ද පන්දහසක් ලෝකධාතුව ආලෝකයෙන් පතුරුවා බැසගෙන (නොහොත් දැනගෙන) වාසය කරයි. එහි උපන් යම් සත්වයෝ වෙත් ද, ඔවුන් ද පතුරුවා බැසගෙන වාසය කරයි. මහණෙනි, ඇස් ඇති පුරුෂයෙක් නෙල්ලි ගෙඩි පහක් අතෙහි තබාගෙන බලන්නේ යම් සේ ද, මහණෙනි, එසේම පඤ්චසහස්ස බ්රහ්මයා පන්දහසක් ලෝකධාතුව පතුරුවා බැසගෙන වාසය කරයි. එහි උපන් යම් සත්වයෝ වෙත් ද, ඔවුන් ද පතුරුවා බැසගෙන වාසය කරයි. ඒ භික්ෂුවට මෙසේ සිතෙයි: “අහෝ, මම කය බිඳී මරණින් පසු පඤ්චසහස්ස බ්රහ්මයා සමඟ එක්ව උපදින්නෙම් නම් මැනවි!” හෙතෙම ඒ සිත තබයි, ඒ සිත පිහිටුවයි, ඒ සිත වඩයි. මෙසේ වඩන ලද, මෙසේ බහුල වශයෙන් පුරුදු කරන ලද ඔහුගේ ඒ සංස්කාරයෝ ද විහාරයෝ ද එහි ඉපදීම පිණිස පවතිත්. මහණෙනි, මේ මාර්ගය, මේ ප්රතිපදාව එහි ඉපදීම පිණිස පවතියි.