5. 1.
1. ශික්ෂාපද පැනවීමට සුදුසු කාලය දන්නා වූ, ශික්ෂාපද පැනවීමට කරුණු දකින්නා වූ ඒ භාග්යවත් අර්හත් සම්මා සම්බුද්ධයන් වහන්සේ විසින් දැන දැන බොරු කීම පිළිබඳ පාචිත්තිය ශික්ෂාපදය පනවන ලද්දේ කොහිදී ද යත්: සැවැත් නුවරදී පනවන ලදී.
කවරෙකු අරභයා ද යත්: හත්ථක ශාක්යපුත්රයන් අරභයා ය.
කිනම් කරුණක් නිසා ද යත්: ආයුෂ්මත් හත්ථක ශාක්යපුත්රයන් තීර්ථකයන් (අන්ය ආගමිකයන්) සමග කතාබහ කරමින් ප්රතික්ෂේප කොට පසුව පිළිගත්තේ ය, පිළිගෙන පසුව ප්රතික්ෂේප කළේ ය. ඒ කරුණ නිසා ය.
පැනවීම එකකි.
ඇවැත් හටගන්නා ආකාර හය අතුරෙන් ආකාර තුනකින් හටගනී: සමහර විට කයෙන් ද සිතින් ද හටගනී, වචනයෙන් හට නොගනී. සමහර විට වචනයෙන් ද සිතින් ද හටගනී, කයෙන් හට නොගනී. සමහර විට කයෙන් ද වචනයෙන් ද සිතින් ද හටගනී. -පෙ-
2. (ජාතිය ආදිය නිසා) අපහාස කොට බැණීම පිළිබඳ පාචිත්තිය ශික්ෂාපදය පනවන ලද්දේ කොහිදී ද යත්: සැවැත් නුවරදී පනවන ලදී.
කවරෙකු අරභයා ද යත්: ෂඩ්වර්ගික (හය නමකගෙන් යුත් කණ්ඩායමේ) භික්ෂූන් අරභයා ය.
කිනම් කරුණක් නිසා ද යත්: ෂඩ්වර්ගික භික්ෂූහු සිල්වත් යහපත් භික්ෂූන් සමග රණ්ඩු කරමින් ඒ සිල්වත් යහපත් භික්ෂූන්ට අපහාස කොට බැන්නෝ ය. ඒ කරුණ නිසා ය.
පැනවීම එකකි.
ඇවැත් හටගන්නා ආකාර හය අතුරෙන් ආකාර තුනකින් හටගනී. -පෙ-
3. භික්ෂූන් අතර බිඳීම් ඇති කරන කේලාම් කීම පිළිබඳ පාචිත්තිය ශික්ෂාපදය පනවන ලද්දේ කොහිදී ද යත්: සැවැත් නුවරදී පනවන ලදී.
කවරෙකු අරභයා ද යත්: ෂඩ්වර්ගික භික්ෂූන් අරභයා ය.
කිනම් කරුණක් නිසා ද යත්: ෂඩ්වර්ගික භික්ෂූහු රණ්ඩු ඇති වූ, කලහ ඇති වූ, විවාදයට පැමිණි භික්ෂූන් අතර, එකිනෙකා කෙරෙහි ඇති ප්රිය බව නැති කරන කේලාම් ගෙන ගියෝ ය. ඒ කරුණ නිසා ය.
පැනවීම එකකි.
ඇවැත් හටගන්නා ආකාර හය අතුරෙන් ආකාර තුනකින් හටගනී. -පෙ-
4. උපසම්පදාව නොලත් අයෙකු (අනුපසම්පන්නයෙකු) සමග පද වශයෙන් (පදයෙන් පදය එක්ව කියවමින්) ධර්මය කියන්නා පිළිබඳ පාචිත්තිය ශික්ෂාපදය පනවන ලද්දේ කොහිදී ද යත්: සැවැත් නුවරදී පනවන ලදී.
කවරෙකු අරභයා ද යත්: ෂඩ්වර්ගික භික්ෂූන් අරභයා ය.
කිනම් කරුණක් නිසා ද යත්: ෂඩ්වර්ගික භික්ෂූහු උපාසකයන් සමග පද වශයෙන් ධර්මය කීවෝ ය. ඒ කරුණ නිසා ය.
පැනවීම එකකි.
ඇවැත් හටගන්නා ආකාර හය අතුරෙන් ආකාර දෙකකින් හටගනී: සමහර විට වචනයෙන් හටගනී, කයෙන් හට නොගනී, සිතින් හට නොගනී. සමහර විට වචනයෙන් ද සිතින් ද හටගනී, කයෙන් හට නොගනී. -පෙ-
5. උපසම්පදාව නොලත් අයෙකු සමග දෙතුන් රැයකට වඩා එකම තැනක නිදාගන්නා පිළිබඳ පාචිත්තිය ශික්ෂාපදය පනවන ලද්දේ කොහිදී ද යත්: ආළවි නුවරදී පනවන ලදී.
කවරෙකු අරභයා ද යත්: බොහෝ භික්ෂූන් අරභයා ය.
කිනම් කරුණක් නිසා ද යත්: බොහෝ භික්ෂූහු උපසම්පදාව නොලත් අයෙකු සමග එකම තැනක නිදාගත්තෝ ය. ඒ කරුණ නිසා ය.
පැනවීම එකකි, අනුපැනවීම (පසුව එකතු කළ පැනවීම) එකකි.
ඇවැත් හටගන්නා ආකාර හය අතුරෙන් ආකාර දෙකකින් හටගනී: සමහර විට කයෙන් හටගනී, වචනයෙන් හට නොගනී, සිතින් හට නොගනී. සමහර විට කයෙන් ද සිතින් ද හටගනී, වචනයෙන් හට නොගනී. -පෙ-
6. කාන්තාවක් සමග එකම සෙනසුනෙහි (වාසස්ථානයෙහි) නිදාගන්නා පිළිබඳ පාචිත්තිය ශික්ෂාපදය පනවන ලද්දේ කොහිදී ද යත්: සැවැත් නුවරදී පනවන ලදී.
කවරෙකු අරභයා ද යත්: ආයුෂ්මත් අනුරුද්ධ තෙරුන් අරභයා ය.
කිනම් කරුණක් නිසා ද යත්: ආයුෂ්මත් අනුරුද්ධ තෙරුන් කාන්තාවක් සමග එකම සෙනසුනෙහි නිදාගත්හ. ඒ කරුණ නිසා ය.
පැනවීම එකකි.
ඇවැත් හටගන්නා ආකාර හය අතුරෙන් ආකාර දෙකකින් හටගනී. -පෙ- එළු ලොම් ශික්ෂාපදයේ ඇවැත හටගන්නා ආකාරයට (එළකලෝම සමුට්ඨානයට) අයත් ය.