පළමුවන ශික්ෂාපදය යි.
8. 7. 2.
1. සැවැත් නුවරදී පැනවූ ශික්ෂාපදයයි – එකල්හි ෂඩ්වර්ගික භික්ෂූන් පයේ පාවහන් දමාගෙන සිටින අයට ධර්මය දේශනා කරති -පෙ-
“පයේ පාවහන් දමාගෙන සිටින, ගිලන් නොවූ අයෙකුට ධර්මය දේශනා නොකරන්නෙමි යි හික්මිය යුතුය.”
2. පයේ පාවහන් දමාගෙන සිටින, ගිලන් නොවූ අයෙකුට ධර්මය දේශනා නොකළ යුතුය. යමෙක් අනාදරයෙන් පාවහන් මත පා තබාගෙන සිටින හෝ, පාවහන් දමාගෙන සිටින හෝ, අඩක් දමාගෙන සිටින හෝ, ගිලන් නොවූ අයෙකුට ධර්මය දේශනා කරයි නම් දුක්කට ඇවැත් වේ.
3. ඇවැත් නැත: නොසිතා කරන්නාට -පෙ- මුලින්ම මේ වරද කළ තැනැත්තාට (ආදිකම්මිකයාට) ඇවැත් නැත.
දෙවන ශික්ෂාපදය යි.
8. 7. 3.
1. සැවැත් නුවරදී පැනවූ ශික්ෂාපදයයි – එකල්හි ෂඩ්වර්ගික භික්ෂූන් යානයක හිඳ සිටින අයට ධර්මය දේශනා කරති -පෙ-
“යානයක හිඳ සිටින, ගිලන් නොවූ අයෙකුට ධර්මය දේශනා නොකරන්නෙමි යි හික්මිය යුතුය.”
2. යාන නම්: වය්හ (වහලක් සහිත ගැල් වර්ගයක්) ය, රථ ය, ගැල ය, සන්දමානිකා (දෙපසින් ආවරණ ඇති රථ වර්ගයක්) ය, සිවිකා (දෝලා) ය, පාටඞ්කී (රෙද්දෙන් සෑදූ එල්ලෙන දෝලාවක්) ය.
යානයක හිඳ සිටින, ගිලන් නොවූ අයෙකුට ධර්මය දේශනා නොකළ යුතුය. යමෙක් අනාදරයෙන් යානයක හිඳ සිටින, ගිලන් නොවූ අයෙකුට ධර්මය දේශනා කරයි නම් දුක්කට ඇවැත් වේ.
ඇවැත් නැත: නොසිතා කරන්නාට -පෙ- මුලින්ම මේ වරද කළ තැනැත්තාට (ආදිකම්මිකයාට) ඇවැත් නැත.
තුන්වන ශික්ෂාපදය යි.
8. 7. 4.
1. සැවැත් නුවරදී පැනවූ ශික්ෂාපදයයි – ඒ කාලයේ ෂඩ්වර්ගික භික්ෂූන් යහනේ වැතිර සිටින්නාට දහම් දෙසති -පෙ-
“යහනේ වැතිර සිටින ගිලන් නොවූවාට දහම් නොදෙසන්නෙමි යි හික්මිය යුතු ය.”
2. යහනේ වැතිර සිටින ගිලන් නොවූවාට දහම් නොදෙසිය යුතු ය. යමෙක් අනාදරයෙන් අඩුම තරමින් බිම වැතිර සිටින ගිලන් නොවූවකුට වුව ද දහම් දෙසයි නම් දුක්කට ඇවැත් වේ.
3. ඇවැත් නැත: නොසිතා කරන්නාට -පෙ- මුලින්ම මේ වරද කළ තැනැත්තාට (ආදිකම්මිකයාට) ඇවැත් නැත.
හතරවන ශික්ෂාපදය යි.
8. 7. 5.
1. සැවැත් නුවරදී පැනවූ ශික්ෂාපදයයි – ඒ කාලයේ ෂඩ්වර්ගික භික්ෂූන් දණහිස් වටා අත් හෝ රෙදි බැඳගෙන (අකවටු අවුළුවා) හිඳ සිටින්නාට දහම් දෙසති -පෙ-
“දණහිස් වටා අත් හෝ රෙදි බැඳගෙන හිඳ සිටින ගිලන් නොවූවාට දහම් නොදෙසන්නෙමි යි හික්මිය යුතු ය.”
2. දණහිස් වටා අත් හෝ රෙදි බැඳගෙන හිඳ සිටින ගිලන් නොවූවාට දහම් නොදෙසිය යුතු ය. යමෙක් අනාදරයෙන් අත්වලින් දණහිස් බැඳගෙන හෝ රෙද්දකින් දණහිස් බැඳගෙන හෝ හිඳ සිටින ගිලන් නොවූවකුට දහම් දෙසයි නම් දුක්කට ඇවැත් වේ.
3. ඇවැත් නැත: නොසිතා කරන්නාට -පෙ- මුලින්ම මේ වරද කළ තැනැත්තාට (ආදිකම්මිකයාට) ඇවැත් නැත.
පස්වන ශික්ෂාපදය යි.
8. 7. 6.
1. සැවැත් නුවරදී පැනවූ ශික්ෂාපදයයි – ඒ කාලයේ ෂඩ්වර්ගික භික්ෂූන් හිස වෙළාගෙන සිටින්නාට දහම් දෙසති -පෙ-
“හිස වෙළාගෙන සිටින ගිලන් නොවූවාට දහම් නොදෙසන්නෙමි යි හික්මිය යුතු ය.”
2. හිස වෙළාගෙන සිටින්නා (වෙඨිතසීස) නම්: කෙස් කෙළවර නොපෙනෙන සේ හිස වෙළාගත් තැනැත්තා ය.
හිස වෙළාගෙන සිටින ගිලන් නොවූවාට දහම් නොදෙසිය යුතු ය. යමෙක් අනාදරයෙන් හිස වෙළාගෙන සිටින ගිලන් නොවූවකුට දහම් දෙසයි නම් දුක්කට ඇවැත් වේ.
ඇවැත් නැත: නොසිතා කරන්නාට, සිහිය නැතිව කරන්නාට, නොදන්නාට, ගිලන් වූවාට, කෙස් කෙළවර විවෘත කරවා දෙසන්නාට ඇවැත් නැත. ආපදාවලදී ද, සිහි විකල් වූවෙකුට ද, මුලින්ම මේ වරද කළ තැනැත්තාට (ආදිකම්මිකයාට) ද ඇවැත් නැත.
හයවන ශික්ෂාපදය යි.