8. 1. 4. 7.
7. සප්පුරිසදාන සූත්‍රය
[සැවැත් නුවර නිදානයි]
37. “මහණෙනි, මේ අට සත්පුරුෂ දානයෝ වෙත්. කවර අටෙක්ද යත්?
පිරිසිදුව දෙයි. ප්‍රණීතව දෙයි. සුදුසු කාලයෙහි දෙයි. කැප දේ දෙයි. ප්‍රතිග්‍රාහකයන් හෝ දාන වස්තුව පරීක්‍ෂාකොට දෙයි. නිතර දෙයි. දෙන කල්හි සිත පහදවා දෙයි. දානය දුන් පසු සිත සතුටු කර ගනී. මහණෙනි, මේ අට සත්පුරුෂ දානයෝයි.
(1) බ්‍රහ්මචාරීවූ යහපත් පුණ්‍ය ක්‍ෂෙත්‍රයෙහි, පිරිසිදුව, ප්‍රණීතව, සුදුසු කාලයෙහි, කැපවූ ආහාරපාන නිතර දන් දෙයි.
බොහෝ ආමිස පරිත්‍යාග කොටද, විපිළිසර නොවන්නේය. මෙසේ දෙන ලද දානයන් බුද්‍ධාදී උතුමෝ වර්‍ණනා කරණ සේක.
(2) “මෙසේ ප්‍රඥාවන්තවූ, ශ්‍රද්‍ධාවන්තවූ, පණ්ඩිත තෙම (ලෝභ ද්වේෂාදියෙන්) මිදුන සිතින් පරිත්‍යාග කොට ව්‍යාපාද රහිතවූ සැප ඇති ලෝකයෙහි උපදී.”
8. 1. 4. 8.
8. මහා මෙඝොපම සූත්‍රය
[සැවැත් නුවර නිදානයි]
38. “මහණෙනි, කුලයෙක්හි සත්පුරුෂයෙක් උපදින්නේ නම්, බොහෝ ජනයාට වැඩ පිණිස, හිත පිණිස, සැප පිණිස වෙයි. මවු පියන්ට වැඩ පිණිස, හිත පිණිස, සැප පිණිස වෙයි. අඹු දරුවන්ට වැඩ පිණිස, හිත පිණිස, සැප පිණිස වෙයි. දාස කම්කරු පුරුෂයන්ට වැඩ පිණිස, හිත පිණිස, සැප පිණිස වෙයි. මිත්‍රාමාත්‍යයන්ට වැඩ පිණිස, හිත පිණිස, සැප පිණිස වෙයි. පෙර මළ ගිය නෑයන්ට වැඩ පිණිස, හිත පිණිස, සැප පිණිස වෙයි. රජහට වැඩ පිණිස, හිත පිණිස, සැප පිණිස වෙයි. දෙවියන්ට වැඩ පිණිස, හිත පිණිස, සැප පිණිස වෙයි. ශ්‍රමණ බ්‍රාහ්මණයන්ට වැඩ පිණිස, හිත පිණිස, සැප පිණිස වෙයි.
“මහණෙනි, යම් සේ වනාහි මහා මේඝය තෙම සියලු ශෂ්‍යයන් සමෘද්‍ධ කරමින් බොහෝ දෙනාට වැඩ පිණිස, හිත පිණිස, සැප පිණිස වේද, එපරිද්දෙන්ම වනාහි කුලයෙක්හි සත්පුරුෂයෙක් උපදින්නේ නම්, බොහෝ ජනයාට වැඩ පිණිස, හිත පිණිස, සැප පිණිස වෙයි. මවු පියන්ට වැඩ පිණිස, හිත පිණිස, සැප පිණිස වෙයි. අඹු දරුවන්ට වැඩ පිණිස, හිත පිණිස, සැප පිණිස වෙයි. දාස කම්කරු පුරුෂයන්ට වැඩ පිණිස, හිත පිණිස, සැප පිණිස වෙයි. මිත්‍රාමාත්‍යයන්ට වැඩ පිණිස, හිත පිණිස, සැප පිණිස වෙයි. පෙර මළ ගිය නෑයන්ට වැඩ පිණිස, හිත පිණිස, සැප පිණිස වෙයි. රජහට වැඩ පිණිස, හිත පිණිස, සැප පිණිස වෙයි. දෙවියන්ට වැඩ පිණිස, හිත පිණිස, සැප පිණිස වෙයි. ශ්‍රමණ බ්‍රාහ්මණයන්ට වැඩ පිණිස, හිත පිණිස, සැප පිණිස වෙයි.
(1) “ගිහිගෙයි වසන්නාවූ පණ්ඩිත පුරුෂ තෙම ඒකාන්තයෙන් බොහෝ දෙනාගේ හිත පිණිස, සැප පිණිස, (පිළිපන්නේ වේද), පළමුකොට දිවාරෑ දෙක්හි නොමැලිව මව්පියන් තමහට පළමු කළ උපකාර සිහි කරමින් (ආහාර, පාන, වස්ත්‍රාභරණාදී) ප්‍රත්‍යයෙන් පූජා කෙරේද,
අනගාරිය සංඛ්‍යාත මේ ශාසනයෙහි පැවිදිවූ, බ්‍රහ්මචාරීවූ, පියශීලී භික්‍ෂූන්ට, ධර්මය දැන, ශ්‍රද්‍ධාවෙන් යුක්තවූයේ පූජා කෙරේද,
රජහට හිතවත් වූයේ, දෙවියන්ට හිතවත් වූයේ, නෑයන්ටද, මිතුරන්ටද හිතවත් වූයේ වේද,
හෙතෙම සද්‍ධර්‍මයෙහි යහපත්ව පිහිටියේ, සියල්ලන්ට හිතවත් වූයේ වේද, හෙතෙම මසුරු මළ දුරුකොට ශාන්තවූ (දෙව්) ලොව භජනය කරන්නේය. (දෙව්ලොව උපදී.)”
8. 1. 4. 9.
9. අඨපුඤ්ඤාභි සන්‍ද සූත්‍රය
[සැවැත් නුවර නිදානයි]
39. “මහණෙනි, මේ පින් වැඩෙන්නාවූ, කුසල් වැඩෙන්නාවූ, සැප ගෙන දෙන්නාවූ, සුව ගෙන දෙන්නාවූ, සැප විපාක ඇත්තාවූ, දෙව්ලොව ඉපදීමට හේතුවූ, කුශල ධර්ම අට ඉෂ්ටවූ, කමණියවූ, මන වඩන්නාවූ, හිත සැප පිණිස පවතින්නාවූ (ධර්මයෝ) වෙත්.
“කවර ධර්ම අටෙක්ද යත්? මහණෙනි, මේ ශාසනයෙහි ආර්‍ය්‍ය ශ්‍රාවක තෙම බුදුන් සරණ ගියේ වෙයි. මහණෙනි, මේ පින් වැඩෙන්නාවූ, කුසල් වැඩෙන්නාවූ, සැප ගෙන දෙන්නාවූ, සුව ගෙන දෙන්නාවූ, සැප විපාක ඇත්තාවූ, දෙව්ලොව ඉපදීමට හේතුවූ, පළමුවන ධර්මය තෙම ඉෂ්ටවූ, කමණීයවූ, මන වඩන්නාවූ හිත සැප පිණිස පවත්නේ වෙයි.