4. 5. 2. 1.
1. පරිසදූසනා සූත්‍රය
[සැවැත් නුවර නිදානයි]
211. “මහණෙනි, පිරිස් දූෂ්‍ය කරන්නෝ මේ සතර දෙනෙකි. කවර සතර දෙනෙක්ද යත්,
මහණෙනි, දුශ්ශීලවූ, ලාමක ස්වභාව ඇති භික්‍ෂුව පිරිස් දූෂ්‍ය කරන්නෙකි. මහණෙනි, දුශ්ශීලවූ, ලාමක ස්වභාව ඇති භික්‍ෂුණිය පිරිස් දූෂිකාවකි. මහණෙනි, දුශ්ශීලවූ, ලාමක ස්වභාව ඇති උපාසක තෙමේ පරිස දූෂකයෙකි. මහණෙනි, දුශ්ශීලවූ, ලාමක ස්වභාව ඇති උපාසිකාව පරිස දූෂකයෙකි. මහණෙනි, මේ සතර දෙන පරිස දූෂකයෝයි.
“මහණෙනි, පිරිස් හොබවන්නෝ මේ සතර දෙනෙකි. කවර සතර දෙනෙක්ද යත්.
මහණෙනි, සිල්වත් යහපත් ස්වභාව ඇති භික්‍ෂුව පිරිස් හොබවන්නෙකි. මහණෙනි, සිල්වත් යහපත් ස්වභාව ඇති භික්‍ෂුණිය පිරිස් හොබවන්නියකි. මහණෙනි, සිල්වත් යහපත් ස්වභාව ඇති උපාසක තෙම පිරිස් හොබවන්නෙකි. මහණෙනි, සිල්වත් යහපත් ස්වභාව ඇති උපාසිකාව පිරිස් හොබවන්නියකි. මහණෙනි, මේ සතරදෙන පිරිස් හොබවන්නාහුය.”
4. 5. 2. 2.
2. සුචරිත දුච්චරිත සූත්‍රය
212. “මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ නිරයෙහි වේ. කවර සතරකින්ද යත්,
“කාය දුශ්චරිතයෙන්ද, වාක් දුශ්චරිතයෙන්ද, මනො දුශ්චරිතයෙන්ද, මිථ්‍යාදෘෂ්ටියෙන්ද යන සතරිනි. [මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ නිරයෙහි වේ.]
“මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ ස්වර්‍ගයෙහි වේ. කවර සතරකින්ද යත්?
“කාය සුචරිතය, වාක් සුචරිතය, මනො සුචරිතය, සම්‍යක් දෘෂ්ටිය යන සතරිනි. [මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ ස්වර්‍ගයෙහි වේ.]
4. 5. 2. 3.
3. අකතඤ්ඤුතා සූත්‍රය
213. “මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ නිරයෙහි වේ. කවර සතරකින්ද යත්,
“කවර සතරකින්ද යත්, කාය දුශ්චරිතය, වාක් දුශ්චරිතය, මනො දුශ්චරිතය, කෙළෙහි ගුණ නොදන්නා අකෘතඥතාවය සතරයි. [මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ නිරයෙහි වේ.]
“මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ ස්වර්‍ගයෙහි වේ. කවර සතරකින්ද යත්?
“කවර සතර දෙනෙක්ද යත්, කාය සුචරිතය, වාක් සුචරිතය, මනො සුචරිතය, කෙළෙහි ගුණ දන්නා සුළු කෘතඥතාවය යන සතරයි.” [මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ ස්වර්‍ගයෙහි වේ.]
4. 5. 2. 4.
4. පාණඝාතාදී සූත්‍රය
214. “මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ නිරයෙහි වේ. කවර සතරකින්ද යත්,
“සතුන් මරන්නේ වේද, නුදුන් දේ ගන්නේ වේද, කාමයන්හි වරදවා හැසිරෙන්නේද, බොරු කියන්නේ වේද, [මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ නිරයෙහි වේ.]
“මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ ස්වර්‍ගයෙහි වේ. කවර සතරකින්ද යත්?
“සතුන් මැරීමෙන් වෙන්වූයේ වේද, නුදුන් දෙය ගැනීමෙන් වෙන්වූයේ වේද, කාමයන්හි වරදවා හැසිරීමෙන් වෙන්වූයේ වේද, බොරු කීමෙන් වෙන්වූයේ වේද, [මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ ස්වර්‍ගයෙහි වේ.]
4. 5. 2. 5.
5. මිච්ඡාමග්ගඞ්ග සූත්‍රය
215. “මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ නිරයෙහි වේ. කවර සතරකින්ද යත්,
“මිත්‍යාදෘෂ්ටික වේද, මිත්‍යා සංකප්ප (කල්පනා) ඇත්තේ වේද, මිත්‍යා වචන ඇත්තේ වේද, මිත්‍යා කර්‍මාන්ත ඇත්තේ වේද, [මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ නිරයෙහි වේ.]
“මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ ස්වර්‍ගයෙහි වේ. කවර සතරකින්ද යත්?
“සම්‍යක් දෘෂ්ටික වේද, සම්‍යක් සංකල්පනා ඇත්තේ වේද, සම්‍යක් වචන ඇත්තේ වේද, සම්‍යක් කර්‍මාන්ත ඇත්තේ වේද, [මහණෙනි, කරුණු සතරකින් යුක්තවූයේ ගෙන එන ලද්දක් බහා තබන ලද්දේ යම් සේද, එසේ ස්වර්‍ගයෙහි වේ.]