කුසලො ධම්මො කුසලස්ස ධම්මස්ස අත්‍ථිපච්චයෙන පච්චයො, කුසලො එකො ඛන්‍ධො තිණ්ණන්නං ඛන්‍ධානං අත්‍ථිපච්චයෙන පච්චයො, තයො ඛන්‍ධා එකස්ස ඛන්‍ධස්ස අත්‍ථිපච්චයෙන පච්චයො, ද්වෙ ඛන්‍ධා ද්වින්නං ඛන්‍ධානං අත්‍ථිපච්චයෙන පච්චයො.
කුසලො ධම්මො අබ්‍යාකතස්ස ධම්මස්ස අත්‍ථිපච්චයෙන පච්චයො සහජාතං පච්ඡාජාතං සහජාතා කුසලා ඛන්‍ධා චිත්තසමුට්ඨානානං රූපානං අත්‍ථිපච්චයෙන පච්චයො. පච්ඡාජාතා කුසලා ඛන්‍ධා පුරෙජාතස්ස ඉමස්ස කායස්ස අත්‍ථිපච්චයෙන පච්චයො.
කුසලො ධම්මො කුසලස්ස ච අබ්‍යාකතස්ස ච ධම්මස්ස අත්‍ථිපච්චයෙන පච්චයො, කුසලො එකො ඛන්‍ධො තිණ්ණන්නං ඛන්‍ධානං චිත්තසමුට්ඨානානඤ්ච රූපානං අත්‍ථිපච්චයෙන පච්චයො, තයො ඛන්‍ධා එකස්ස ඛන්‍ධස්ස චිත්තසමුට්ඨානානඤ්ච රූපානං අත්‍ථිපච්චයෙන පච්චයො, ද්වෙ ඛන්‍ධා ද්වින්නං ඛන්‍ධානං චිත්තසමුට්ඨානානඤ්ච රූපානං අත්‍ථිපච්චයෙන පච්චයො.
අකුසලො ධම්මො අකුසලස්ස ධම්මස්ස අත්‍ථිපච්චයෙන පච්චයො, අකුසලො එකො ඛන්‍ධො තිණ්ණන්නං ඛන්‍ධානං අත්‍ථිපච්චයෙන පච්චයො, තයො ඛන්‍ධා එකස්ස ඛන්‍ධස්ස අත්‍ථිපච්චයෙන පච්චයො, ද්වෙ ඛන්‍ධා ද්වින්නං ඛන්‍ධානං අත්‍ථිපච්චයෙන පච්චයො.
අකුසලො ධම්මො අබ්‍යාකතස්ස ධම්මස්ස අත්‍ථිපච්චයෙන පච්චයො, සහජාතං, පච්ඡාජාතං, සහජාතා අකුසලා ඛන්‍ධා චිත්තසමුට්ඨානානං රූපානං අත්‍ථිපච්චයෙන පච්චයො, පච්ඡාජාතා අකුසලා ඛන්‍ධා පුරෙජාතස්ස ඉමස්ස කායස්ස අත්‍ථිපච්චයෙන පච්චයො.
අකුසලො ධම්මො අකුසලස්ස ච අබ්‍යාකතස්ස ච ධම්මස්ස අත්‍ථිපච්චයෙන පච්චයො, අකුසලො එකො ඛන්‍ධො තිණ්ණන්නං ඛන්‍ධානං චිත්තසමුට්ඨානනඤ්ච රූපානං අත්‍ථිපච්චයෙන පච්චයො, ද්වෙ ඛන්‍ධා ද්වින්නං ඛන්‍ධානං චිත්තසමුට්ඨානානඤ්ච රූපානං අත්‍ථිපච්චයෙන පච්චයො.
අබ්‍යාකතො ධම්මො අබ්‍යාකතස්ස ධම්මස්ස අත්‍ථිපච්චයෙන පච්චයො, සහජාතං පුරෙජාතං, පච්ඡාජාතං, ආහාරං, ඉන්‍ද්‍රියං.
සහජාතො විපාකාබ්‍යාකතො කිරියාබ්‍යාකතො එකො ඛන්‍ධො තිණ්ණන්නං ඛන්‍ධානං චිත්තසමුට්ඨානානඤ්ච රූපානං අත්‍ථිපච්චයෙන පච්චයො, තයො ඛන්‍ධා එකස්ස ඛන්‍ධස්ස චිත්තසමුට්ඨානානඤ්ච රූපානං අත්‍ථිපච්චයෙන පච්චයො, ද්වෙ ඛන්‍ධා ද්වින්නං ඛන්‍ධානං චිත්තසමුට්ඨානානඤ්ච රූපානං අත්‍ථිපච්චයෙන පච්චයො, පටිසන්‍ධික්ඛණෙ විපාකාබ්‍යාකතො එකො ඛන්‍ධො තිණ්ණන්නං ඛන්‍ධානං කටත්තා ච රූපානං අත්‍ථිපච්චයෙන පච්චයො, තයො ඛන්‍ධා එකස්ස ඛන්‍ධස්ස කටත්තා ච රූපානං අත්‍ථිපච්චයෙන පච්චයො, ද්වෙ ඛන්‍ධා ද්වින්නං ඛන්‍ධානං කටත්තා ච රූපානං අත්‍ථිපච්චයෙන පච්චයො, ඛන්‍ධා වත්‍ථුස්ස අත්‍ථිපච්චයෙන පච්චයො, වත්‍ථුඛන්‍ධානං අත්‍ථිපච්චයෙන පච්චයො. එකං මහාභූතං තිණ්ණන්නං මහාභූතානං අත්‍ථිපච්චයෙන පච්චයො, තයො මහාභූතා එකස්ස මහාභූතස්ස අත්‍ථිපච්චයෙන පච්චයො, ද්වෙ මහාභූතා ද්වින්නං මහාභූතානං අත්‍ථිපච්චයෙන පච්චයො, මහාභූතා චිත්තසමුට්ඨානානං රූපානං කටත්තා ච රූපානං උපාදාය රූපානං අත්‍ථිපච්චයෙන පච්චයො. බාහිරං ආහාර සමුට්ඨානං උතුසමුට්ඨානං අසඤ්ඤසත්තානං එකං මහාභූතං තිණ්ණන්නං මහාභූතානං අත්‍ථිපච්චයෙන පච්චයො, තයො මහාභූතා එකස්ස මහාභූතස්ස අත්‍ථිපච්චයෙන පච්චයො, ද්වෙ මහාභූතා ද්වින්නං මහාභූතානං අත්‍ථිපච්චයෙන පච්චයො, මහාභූතා කටත්තා රූපානං උපාදායරූපානං අත්‍ථිපච්චයෙන පච්චයො.
පුරෙජාතං අරහා චක්ඛුං අනිච්චතො දුක්ඛතො අනත්තතො විපස්සති, සොතං ඝානං ජිව්හං කායං රූපෙ සද්දෙ ගන්‍ධෙ රසෙ ඵොට්ඨබ්බෙ වත්‍ථුං අනිච්චතො දුක්ඛතො අනත්තතො විපස්සති, දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, රූපායතනං චක්ඛුවිඤ්ඤාණස්ස අත්‍ථිපච්චයෙන පච්චයො, සද්දායතනං -පෙ- ඵොට්ඨබ්බායතනං කායවිඤ්ඤාණස්ස අත්‍ථිපච්චයෙන පච්චයො, චක්ඛායතනං චක්ඛු විඤ්ඤාණස්ස අත්‍ථිපච්චයෙන පච්චයො, සොතායතනං සොතවිඤ්ඤාණස්ස ඝානායතනං ඝානවිඤ්ඤාණස්ස ජිව්හායතනං ජිව්හාවිඤ්ඤාණස්ස කායායතනං කායවිඤ්ඤාණස්ස අත්‍ථිපච්චයෙන පච්චයො, වත්‍ථු විපාකාබ්‍යාකතානං කිරියාබ්‍යාකතානං ඛන්‍ධානං අත්‍ථිපච්චයෙන පච්චයො.
පච්ඡාජාතා විපාකාබ්‍යාකතා කිරියාබ්‍යාකතා පුරෙජාතස්ස ඉමස්ස කායස්ස අත්‍ථිපච්චයෙන පච්චයො.
කබලිංකාරො ආහාරො ඉමස්ස කායස්ස අත්‍ථිපච්චයෙන පච්චයො, රූපජීවිතන්‍ද්‍රියං කටත්තා රූපානං අත්‍ථිපච්චයෙන පච්චයො.
අබ්‍යාකතො ධම්මො කුසලස්ස ධම්මස්ස අත්‍ථිපච්චයෙන පච්චයො, පුරෙජාතං සෙක්ඛා වා පුථුජ්ජනා වා චක්ඛුං අනිච්චතො දුක්ඛතො අනත්තතො විපස්සන්ති. සොතං ඝානං ජිව්හං කායං රූපෙ සද්දෙ ගන්‍ධෙ රසෙ ඵොට්ඨබ්බෙ වත්‍ථුං අනිච්චතො දුක්ඛතො අනත්තතො විප්පස්සන්ති, දිබ්බෙන චක්ඛුනා රූපං පස්සන්ති, දිබ්බාය සොතධාතුයා සද්දං සුණන්ති, වත්‍ථුං කුසලානං ඛන්‍ධානං අත්‍ථිපච්චයෙන පච්චයො.
අබ්‍යාකතො ධම්මො අකුසලස්ස ධම්මස්ස අත්‍ථිපච්චයෙන පච්චයො, පුරෙජාතං, චක්ඛුං අස්සාදෙති, අභිනන්‍දති, තං ආරබ්භ රාගො උප්පජ්ජති, දිට්ඨි උප්පජ්ජති, විචිකිච්ඡා උප්පජ්ජති, උද්ධච්චං උප්පජ්ජති, දොමනස්සං උප්පජ්ජති, සොතං ඝානං ජිව්හං කායං රූපෙ සද්දෙ ගන්‍ධෙ රසෙ ඵොට්ඨබ්බෙ වත්‍ථුං අස්සාදෙති, අභිනන්‍දති, තං ආරබ්භ රාගො උප්පජ්ජති, -පෙ- දොමනස්සං උප්පජ්ජති. වත්‍ථු අකුසලානං ඛන්‍ධානං අත්‍ථිපච්චයෙන පච්චයො.
කුසලො ච අබ්‍යාකතො ච ධම්මා කුසලස්ස ධම්මස්ස අත්‍ථිපච්චයෙන පච්චයො, සහජාතං, පුරෙජාතං, සහජාතො කුසලො එකො ඛන්‍ධො ච වත්‍ථු ච තිණ්ණන්නං ඛන්‍ධානං අත්‍ථිපච්චයෙන පච්චයො, -පෙ- ද්වෙ ඛන්‍ධා ච වත්‍ථු ච ද්වින්නං ඛන්‍ධානං අත්‍ථිපච්චයෙන පච්චයො.
කුසලො ච අබ්‍යාකතො ච ධම්මා අබ්‍යාකතස්ස ධම්මස්ස අත්‍ථිපච්චයෙන පච්චයො, සහජාතො, පච්ඡාජාතං, ආහාරං, ඉන්‍ද්‍රියං, සහජාතා කුසලා ඛන්‍ධා ච මහාභූතා ච චිත්තසමුට්ඨානානං රූපානං අත්‍ථිපච්චයෙන පච්චයො, පච්ඡාජාතා කුසලා ඛන්‍ධා ච කබලිංකාරො ආහාරො ච ඉමස්ස කායස්ස අත්‍ථිපච්චයෙන පච්චයො, පච්ඡාජාතා කුසලා ඛන්‍ධා ච රූපජීවිතින්‍ද්‍රියඤ්ච කටත්තාරූපානං අත්‍ථිපච්චයෙන පච්චයො.
අකුසලො ච අබ්‍යාකතො ච ධම්මා අකුසලස්ස ධම්මස්ස අත්‍ථිපච්චයෙන පච්චයො, සහජාතං, පුරේජාතං, සහජාතො අකුසලො එකො ඛන්‍ධො ච වත්‍ථු ච තිණ්ණන්නං ඛන්‍ධානං අත්‍ථිපච්චයෙන පච්චයො, තයො ඛන්‍ධා ච වත්‍ථු ච එකස්ස ඛන්‍ධස්ස අත්‍ථිපච්චයෙන පච්චයො, ද්වෙ ඛන්‍ධා ච වත්‍ථු ච ද්වින්නං ඛන්‍ධානං අත්‍ථිපච්චයෙන පච්චයො.
අකුසලො ච අබ්‍යාකතො ච ධම්මා අබ්‍යාකතස්ස ධම්මස්ස අත්‍ථිපච්චයෙන පච්චයො, සහජාතං, පච්ඡාජාතං, ආහාරං, ඉන්‍ද්‍රියං, සහජාතා අකුසලා ඛන්‍ධා ච මහාභූතා ච චිත්තසමුට්ඨානානං රූපානං අත්‍ථිපච්චයෙන පච්චයො. පච්ඡාජාතා අකුසලා ඛන්‍ධා ච කබලිංකාරො ආහාරො ච ඉමස්ස කායස්ස අත්‍ථිපච්චයෙන පච්චයො, පච්ඡාජාතා අකුසලා ඛන්‍ධා ච රූපජීවිතින්‍ද්‍රියඤ්ච කටත්තා රූපානං අත්‍ථිපච්චයෙන පච්චයො.