ඒ මෛත්‍රෙය නම් මහාබෝධිසත්ත්‍වයෝ වූකලි මුහූර්ත නම් සර්වඥයන් වහන්සේ සමීපයෙන් ලබනලද විවරණ ඇති ව සොළසාසඞ්ඛ්‍යකප්ලක්‍ෂයක් මුළුල්ලෙහි මෙසේ මෙබඳු වූ පාරමිතාධර්මයන් පුරන්නාහු අවීචි මහානරකයෙහි එළන්නෝ ඇත්තමුත් දන්දීම කඩ නොකරන්නාහ. අඟපසඟ කපා කැබැලි කොට උක්යතෙක ලා මඩින් උක් කැබිලිමෙන් පෙලා පීඩා කෙරෙමින් සිටියත් සිල් කඩ නො කරන්නාහ. සතර මහාද්වීපයෙහි ඓශ්චර්ය හැර විවෙකවාසයයි කියනලද තවුස්වෙස් ම ගන්නාහ. සියලු සක්වළපුරා සිටි කිහිරඟුරු මැඩගෙන මුත් නුවණැත්තවුන් කරා ගොස් කුශලාකුශලාදි ධර්මයන් ම පිළිවිස්නාහ. පවන්වේගයෙන් අළැලීගියාවූ දැතිමෝරු ආදි චණ්ඩ මත්ස්‍යයන් විසින් ගැවැසීගත් මහාසමුද්‍රය බාහුවෙන් පැහැර පිහිනා ගෙන ගොසිනුත් නිර්වාණ නැමැති පරතෙරට පැමිණෙන්ට වීර්ය නොපසුබස්වා පවත්වන්නාහ. කඩුමුවහතින් කන් නාසා කපමින් සිටියදීත් අනුන් කෙරෙහි කෝප නො කරන්නාහ. කඩුපතින් ඉසගසා සිඳිමින් සිටියදීත් බොරු නොකියන්නාහ. සකල ශරීරය සුණු විසුණු කොට විසුරුවමින් සිටියදීත් අධිෂ්ඨානය නොහරින්නාහ. තමා සන්තක රාජ්‍යය උදුරාගත් රජක්හු උත්කෘෂ්ට වූ ප්‍රියපුත්‍රයක්හු මෙන් දැක මෛත්‍රී කරන්නාහ. අනුන් විසින් කරන ලද සුවදුක් දෙකෙහි අනුනය ප්‍රතිඝය නැතිවැ මධ්‍යස්ථව පවත්නාහ. සතර දිග සිට නොයෙක් සියදහස්ගණන් කඩුගත් අත් ඇති පුරුෂයන් විසින් හා යක්‍ෂරාක්‍ෂසාදි භයඞ්කර ස්වරූපය ඇති සත්ත්‍වයන් විසින් භය සන්ත්‍රාස උපදවමින් සිටියදීත් තැති නො ගෙන කුසල්ම කරන්නාහ. ජීවිත පරිත්‍යාගය කොටත් පාරමිතා සමාදානය නොයික්මවන්නාහ.
මෙසේ මෙතෙක්කල් මුළුල්ලෙහි දශපාරමීධර්මයන් සලක්‍ෂණ වශයෙන් පුරන්නාවූ ඒ මෛත්‍රෙය බෝධිසත්ත්‍වයෝ විශ්වන්තරාත්මභාවය හා සදෘශ පශ්චිමාත්මභාවයට පැමිණ සියලු පාරමී ධර්මයන් මස්තකප්‍රාප්ත කොට එයින් චුතව අපගේ සර්වඥයන් වහන්සේ බුදුවන්නාට පළමු කොටම තුෂිත දිව්‍ය ලෝකයෙහි ඉපැද අපමණ වූ දිවසැපත් අනුභව කොට දෙවියන්ටත් ධර්ම දේශනා කෙරෙමින් ඒ තුෂිත දිව්‍යලෝකයෙහි සහපිරිවරින් වාසය කරන්නාහුය.