ඉක්බිත්තෙන් ආයුෂ්මත් වූ ධම්සෙනෙවිසැරියුත් මහතෙරුන් වහන්සේ දිව්‍යමනුෂ්‍යයන්ගේ අදහස් දැන අනාගතයෙහි පහළවන්නා වූ මෛත්‍රෙයසර්වඥයන් වහන්සේගේත් වංශය අසනු කැමැති ව සර්වඥයන් වහන්සේ කරා එළඹ නමස්කාර කොට සිවුරු ඒකාංශ කොට බහා දොහොත් මුදුනෙහි බැඳ සිට, ස්වාමීනි! නුඹ වහන්සේ විසින් අනාගතයෙහි මෛත්‍රෙය නම් බුදුකෙනෙකුන් වහන්සේ උපදිති යි, සංක්‍ෂෙපයෙන් වදාරණලද. ඒ මෛත්‍රෙය නම් බුදුහු කෙබඳු සේක් ද? ස්වාමීනි භාග්‍යවත් වූ බුදුරජාණන් වහන්ස! මා කෙරෙහි කරුණාවෙන් විස්තර කොට ඒ අනාගතවංශදේශනාව වදාළ හොත් යහපත් වන්නේය යි, ආරාධනා කළ සේක.