1. 7. 1.
මිගජාල සූත්‍රය
63. මා විසින් මෙසේ අසන ලදී. එක් සමයෙක්හි භාග්‍යවතුන් වහන්සේ සැවැත්නුවර සමීපයෙහිවූ, අනේපිඬු සිටාණන් විසින් කරවන ලද, ජේතවනාරාමයෙහි වාසය කරන සේක.
ඉක්බිති ආයුෂ්මත් මිගජාල ස්ථවිරතෙම භාග්‍යවතුන් වහන්සේ යම් තැනෙක්හිද, එතැනට පැමිණියේය. පැමිණ, භාග්‍යවතුන් වහන්සේට වැඳ, එකත්පසෙක හුන්නේය. එක් පසෙක හුන්නාවූ ආයුෂ්මත් මිගජාල ස්ථවිර තෙම භාග්‍යවතුන් වහන්සේට මෙය සැළ කෙළේය.
“ස්වාමීනි, ‘එකවිහාරී, එකවිහාරී’ (එකලාව වාසය කරන්නා) යයි කියනු ලැබේ. ස්වාමීනි, කොපමණකින් එකලාව වාසය කරන්නේ වේ ද? කොපමණකින් දෙවැන්නකු සහිතව වාසය කරන්නේ (සදුතියවිහාරී) වේ ද?” කියායි. “මිගජාල, චක්ඛු විඤ්ඤාණයෙන් (ඇසින්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ රූප ඇත්තාහ. ඉදින් මහණ තෙමේ එය පතයි ද, ගුණ වනයි ද, (එහි) ගැලී සිටියි ද, එය පතන, ගුණ වනන, (එහි) ගැලී සිටින ඔහුට තෘෂ්ණා සතුට උපදියි. තෘෂ්ණා සතුට ඇති කල්හි බලවත් ඇල්ම වෙයි. බලවත් ඇල්ම ඇති කල්හි බැඳීම වෙයි. මිගජාල, තෘෂ්ණා සතුට නම් බැම්මෙන් බැඳුණු මහණ තෙමේ දෙවැන්නකු සහිතව වාසය කරන්නේ යයි කියනු ලැබේ. මිගජාල, ජිව්හා විඤ්ඤාණයෙන් (දිවෙන්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ රස ඇත්තාහ. ඉදින් මහණ තෙමේ එය පතයි ද, ගුණ වනයි ද, (එහි) ගැලී සිටියි ද, එය පතන, ගුණ වනන, (එහි) ගැලී සිටින ඔහුට තෘෂ්ණා සතුට උපදියි. තෘෂ්ණා සතුට ඇති කල්හි බලවත් ඇල්ම වෙයි. බලවත් ඇල්ම ඇති කල්හි බැඳීම වෙයි. මිගජාල, තෘෂ්ණා සතුට නම් බැම්මෙන් බැඳුණු මහණ තෙමේ දෙවැන්නකු සහිතව වාසය කරන්නේ යයි කියනු ලැබේ. -පෙ-
“මිගජාල, මනෝ විඤ්ඤාණයෙන් (සිතින්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ ධර්ම ඇත්තාහ. ඉදින් මහණ තෙමේ එය පතයි ද, ගුණ වනයි ද, (එහි) ගැලී සිටියි ද, එය පතන, ගුණ වනන, (එහි) ගැලී සිටින ඔහුට තෘෂ්ණා සතුට උපදියි. තෘෂ්ණා සතුට ඇති කල්හි බලවත් ඇල්ම වෙයි. බලවත් ඇල්ම ඇති කල්හි බැඳීම වෙයි. මිගජාල, තෘෂ්ණා සතුට නම් බැම්මෙන් බැඳුණු මහණ තෙමේ දෙවැන්නකු සහිතව වාසය කරන්නේ යයි කියනු ලැබේ.
“මිගජාල, මෙසේ වාසය කරන්නා වූ මහණ තෙමේ අල්ප ශබ්ද ඇති, ඝෝෂා රහිත, ජනයා සැරිසැරීමෙන් හමන සිරුරු සුළං නැති, මිනිසුන්ගේ රහස් කටයුතුවලට සුදුසු, හුදෙකලා විවේකයට සුදුසු වූ අරණ්‍යයෙහි වනාන්තර (මිනිස් ඇසුරෙන් ඈත්) සෙනසුන් ද ඉතා දුර බැහැර වූ සෙනසුන් ද සේවනය කළත්, එසේ වුවද දෙවැන්නකු සහිතව වාසය කරන්නේ යයි කියනු ලැබේ. ඊට හේතු කවරේ ද? තෘෂ්ණාව ඔහුගේ දෙවැන්නා ය. ඔහුගේ ඒ තෘෂ්ණාව ප්‍රහීණ නොවූයේ ය. එහෙයින් දෙවැන්නකු සහිතව වාසය කරන්නේ යයි කියනු ලැබේ.
“මිගජාල, චක්ඛු විඤ්ඤාණයෙන් (ඇසින්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ රූප ඇත්තාහ. ඉදින් මහණ තෙමේ එය නොපතයි ද, ගුණ නොවනයි ද, (එහි) ගැලී නොසිටියි ද, එය නොපතන, ගුණ නොවනන, (එහි) ගැලී නොසිටින ඔහුගේ තෘෂ්ණා සතුට නිරුද්ධ වෙයි. තෘෂ්ණා සතුට නැති කල්හි බලවත් ඇල්ම නොවෙයි. බලවත් ඇල්ම නැති කල්හි බැඳීම නොවෙයි. මිගජාල, තෘෂ්ණා සතුට නම් බැම්මෙන් මිදුණු මහණ තෙමේ එකලාව වාසය කරන්නේ යයි කියනු ලැබේ. -පෙ-
“මිගජාල, ජිව්හා විඤ්ඤාණයෙන් (දිවෙන්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ රස ඇත්තාහ. ඉදින් මහණ තෙමේ එය නොපතයි ද, ගුණ නොවනයි ද, (එහි) ගැලී නොසිටියි ද, එය නොපතන, ගුණ නොවනන, (එහි) ගැලී නොසිටින ඔහුගේ තෘෂ්ණා සතුට නිරුද්ධ වෙයි. තෘෂ්ණා සතුට නැති කල්හි බලවත් ඇල්ම නොවෙයි. බලවත් ඇල්ම නැති කල්හි බැඳීම නොවෙයි. මිගජාල, තෘෂ්ණා සතුට නම් බැම්මෙන් මිදුණු මහණ තෙමේ එකලාව වාසය කරන්නේ යයි කියනු ලැබේ. -පෙ-
“මිගජාල, මනෝ විඤ්ඤාණයෙන් (සිතින්) දත යුතු වූ, ඉෂ්ට වූ, කාන්ත වූ, මන වඩන්නා වූ, ප්‍රිය ස්වභාව ඇත්තා වූ, කාමයෙන් යුක්ත වූ, ඇලුම් කටයුතු වූ ධර්ම ඇත්තාහ. ඉදින් මහණ තෙමේ එය නොපතයි ද, ගුණ නොවනයි ද, (එහි) ගැලී නොසිටියි ද, එය නොපතන, ගුණ නොවනන, (එහි) ගැලී නොසිටින ඔහුගේ තෘෂ්ණා සතුට නිරුද්ධ වෙයි. තෘෂ්ණා සතුට නැති කල්හි බලවත් ඇල්ම නොවෙයි. බලවත් ඇල්ම නැති කල්හි බැඳීම නොවෙයි. මිගජාල, තෘෂ්ණා සතුට නම් බැම්මෙන් මිදුණු මහණ තෙමේ එකලාව වාසය කරන්නේ යයි කියනු ලැබේ.
“මිගජාල, මෙසේ වාසය කරන්නා වූ මහණ තෙමේ භික්ෂූන්ගෙන්, භික්ෂුණීන්ගෙන්, උපාසකයන්ගෙන්, උපාසිකාවන්ගෙන්, රජුන්ගෙන්, රජ මහ ඇමතියන්ගෙන්, තීර්ථකයන්ගෙන්, තීර්ථක ශ්‍රාවකයන්ගෙන් ගැවසීගත් ගම් අසල (සෙනසුන්හි) වාසය කළත්, එසේ වුවද එකලාව වාසය කරන්නේ යයි කියනු ලැබේ. ඊට හේතු කවරේ ද? තෘෂ්ණාව ඔහුගේ දෙවැන්නා ය. ඔහුගේ ඒ තෘෂ්ණාව ප්‍රහීණ වූයේ ය. එහෙයින් එකලාව වාසය කරන්නේ යයි කියනු ලැබේ” යයි (වදාළ සේක).
1. 7. 2.
දුතිය මිගජාල සූත්‍රය
64. එකල්හි ආයුෂ්මත් මිගජාල ස්ථවිරතෙම භාග්‍යවතුන් වහන්සේ යම් තැනෙක්හිද, එතැනට පැමිණියේය. පැමිණ, භාග්‍යවතුන් වහන්සේට වැඳ, එකත්පසෙක හුන්නේය. එක් පසෙක හුන්නාවූ ආයුෂ්මත් මිගජාල ස්ථවිර තෙම භාග්‍යවතුන් වහන්සේට මෙය සැළ කෙළේය. “ස්වාමීනි, මම භාග්‍යවතුන් වහන්සේගේ යම් ධර්‍මයක් අසා, එකලාව, සමූහයෙන් වෙන්ව, අප්‍රමාදව, කෙලෙස් තවන වීර්‍ය්‍යයෙන් යුක්තව, ආත්ම පරිත්‍යාගයෙන් යුක්තව වාසය කරන්නෙම්ද, භාග්‍යවතුන් වහන්සේ මට එබඳු ධර්‍මයක් දේශනා කරන්නේ නම් මැනව” කියායි.