තිංස නිස්සග්ගියා පාචිත්තියා ධම්මා

ඉමෙ ඛො පනාය්‍යායො තිංස නිස්සග්ගියා පාචිත්තියා ධම්මා උද්දෙසං ආගච්ඡන්ති.

1. යා පන භික්ඛුනී පත්තසන්නිචයං කරෙය්‍ය, නිස්සග්ගියං පාචිත්තියං.

2. යා පන භික්ඛුනී අකාලචීවරං කාලචීවරන්ති අධිට්ඨහිත්වා භාජාපෙය්‍ය, නිස්සග්ගියං පාචිත්තියං.

3. යා පන භික්ඛුනී භික්ඛුනියා සද්ධිං චීවරං පරිවත්තෙත්වා සා පච්ඡා එවං වදෙය්‍ය ‘හන්දාය්‍යෙ තුය්හං චීවරං, ආහර මෙතං චීවරං, යං තුය්හං තුය්හමෙවෙතං, යං මය්හං මය්හමෙවෙතං, ආහර මෙතං, සකං පච්ඡාහරා’ති. අච්ඡින්දෙය්‍ය වා අච්ඡින්දාපෙය්‍ය වා, නිස්සග්ගියං පාචිත්තියං.

4. යා පන භික්ඛුනී අඤ්ඤං විඤ්ඤාපෙත්වා අඤ්ඤං විඤ්ඤාපෙය්‍ය, නිස්සග්ගියං පාචිත්තියං.

5. යා පන භික්ඛුනී අඤ්ඤං චෙතාපෙත්වා අඤ්ඤං චෙතාපෙය්‍ය, නිස්සග්ගියං පාචිත්තියං.

6. යා පන භික්ඛුනී අඤ්ඤදත්ථිකෙන පරික්ඛාරෙන අඤ්ඤුද්දිසිකෙන සංඝිකෙන අඤ්ඤං චෙතාපෙය්‍ය, නිස්සග්ගියං පාචිත්තියං.

7. යා පන භික්ඛුනී අඤ්ඤදත්ථිකෙන පරික්ඛාරෙන අඤ්ඤුද්දිසිකෙන සංඝිකෙන සංයාචිකෙන අඤ්ඤං චෙතාපෙය්‍ය, නිස්සග්ගියං පාචිත්තියං.

8. යා පන භික්ඛුනී අඤ්ඤදත්ථිකෙන පරික්ඛාරෙන අඤ්ඤුද්දිසිකෙන මහාජනිකෙන අඤ්ඤං චෙතාපෙය්‍ය, නිස්සග්ගියං පාචිත්තියං.

9. යා පන භික්ඛුනී අඤ්ඤදත්ථිකෙන පරික්ඛාරෙන අඤ්ඤුද්දිසිකෙන මහාජනිකෙන සංයාචිකෙන අඤ්ඤං චෙතාපෙය්‍ය, නිස්සග්ගියං පාචිත්තියං.

10. යා පන භික්ඛුනී අඤ්ඤදත්ථිකෙන පරික්ඛාරෙන අඤ්ඤුද්දිසිකෙන පුග්ගලිකෙන සංයාචිකෙන අඤ්ඤං චෙතාපෙය්‍ය, නිස්සග්ගියං පාචිත්තියං.

පත්තවග්ගො පඨමො

1. ගරුපාවුරණං[1] පන භික්ඛුනියා චෙතාපෙන්තියා චතුක්කංසපරමං චෙතාපෙතබ්බං. තතො චෙ උත්තරි චෙතාපෙය්‍ය, නිස්සග්ගියං පාචිත්තියං.

2. ලහුපාවුරණං පන භික්ඛුනියා චෙතාපෙන්තියා අඩ්ඪතෙය්‍යකංසපරමං චෙතාපෙතබ්බං. තතො චෙ උත්තරි චෙතාපෙය්‍ය, නිස්සග්ගියං පාචිත්තියං.

3. නිට්ඨිතචීවරස්මිං භික්ඛුනියා උබ්භතස්මිං කඨිනෙ දසාහපරමං අතිරෙකචීවරං ධාරෙතබ්බං. තං අතික්කාමෙන්තියා, නිස්සග්ගියං පාචිත්තියං.

4. නිට්ඨිතචීවරස්මිං භික්ඛුනියා උබ්භතස්මිං කඨිනෙ එකරත්තම්පි චෙ භික්ඛුනී පඤ්චහි චීවරෙහි විප්පවසෙය්‍ය, අඤ්ඤත්‍ර භික්ඛුනී සම්මුතියා, නිස්සග්ගියං පාචිත්තියං.

5. නිට්ඨිතචීවරස්මිං භික්ඛුනියා උබ්භතස්මිං කඨිනෙ භික්ඛුනියා පනෙව අකාලචීවරං උප්පජ්ජෙය්‍ය, ආකංඛමානාය භික්ඛුනියා තං පටිග්ගහෙතබ්බං. පටිග්ගහෙත්වා ඛිප්පමෙව කාරෙතබ්බං. නොචස්ස පාරිපූරී, මාසපරමං තාය භික්ඛුනියා තං චීවරං නික්ඛිපිතබ්බං ඌනස්ස පාරිපූරියා සතියා පච්චාසාය. තතො චෙ උත්තරි නික්ඛිපෙය්‍ය සතියාපි පච්චාසාය, නිස්සග්ගියං පාචිත්තියං.

6. යා පන භික්ඛුනී අඤ්ඤාතකං ගහපතිං වා ගහපතානිං වා චීවරං විඤ්ඤාපෙය්‍ය අඤ්ඤත්‍ර සමයා, නිස්සග්ගියං පාචිත්තියං. තත්ථායං සමයො; අච්ඡින්නචීවරා වා හොති භික්ඛුනී නට්ඨචීවරා වා. අයං තත්ථ සමයො.

7. තඤ්චෙ අඤ්ඤාතකො ගහපති වා ගහපතානී වා බහූහි චීවරෙහි අභිහට්ඨුං පවාරෙය්‍ය, සන්තරුත්තරපරමං තාය භික්ඛුනියා තතො චීවරං සාදිතබ්බං. තතො චෙ උත්තරි සාදියෙය්‍ය, නිස්සග්ගියං පාචිත්තියං.

8. භික්ඛුනිං පනෙච උද්දිස්ස අඤ්ඤාතකස්ස ගහපතිස්ස වා ගහපතානියා වා චීවර චෙතාපන්නං උපක්ඛටං හොති, ‘ඉමිනා චීවර චෙතාපන්නෙන චීවරං චෙතාපෙත්වා ඉත්ථං නාමං භික්ඛුනිං චීවරෙන අච්ඡාදෙස්සාමී’ති. තත්‍ර චෙසා භික්ඛුනී පුබ්බෙ අප්පවාරිතා උපසංකමිත්වා චීවරෙ විකප්පං ආපජ්ජෙය්‍ය, ‘සාධු වත මං ආයස්මා ඉමිනා චීවරචෙතාපන්නෙන එවරූපං වා එවරූපං වා චීවරං චෙතාපෙත්වා අච්ඡාදෙහී’ති කල්‍යාණකම්‍යතං උපාදාය, නිස්සග්ගියං පාචිත්තියං.

9. භික්ඛුනිං පනෙව උද්දිස්ස උභින්නං අඤ්ඤාතකානං ගහපතීනං වා ගහපතානීනං වා පච්චෙකචීවරචෙතාපන්නානි උපක්ඛටානි හොන්ති, ‘ඉමෙහි මයං පච්චෙකචීවරචෙතාපන්නෙහි පච්චෙක චීවරානි චෙතාපෙත්වා ඉත්ථං නාමං භික්ඛුනිං චීවරෙහි අච්ඡාදෙස්සාමා’ති. තත්‍ර චෙසා භික්ඛුනී පුබ්බෙ අප්පවාරිතා උපසංකමිත්වා චීවරෙ විකප්පං ආපජ්ජෙය්‍ය, ‘සාධු වත මං ආයස්මන්තො ඉමෙහි පච්චෙකචීවරචෙතාපන්නෙහි එවරූපං වා එවරූපං වා චිවරං චෙතාපෙත්වා අච්ඡාදෙථ උභොවසන්තා එකෙනා’ති කල්‍යාණකම්‍යතං උපාදාය, නිස්සග්ගියං පාචිත්තියං.

10. භික්ඛුනිං පනෙව උද්දිස්ස රාජා වා රාජභොග්ගො වා බ්‍රාහ්මණො වා ගහපතිකො වා දූතෙන චීවරචෙතාපන්නං පහිණෙය්‍ය, ‘ඉමිනා චීවරචෙතාපන්නෙන චීවරං චෙතාපෙත්වා ඉත්ථං නාමං භික්ඛුනිං චීවරෙන අච්ඡාදෙහී’ති.

සො චෙ දූතො තං භික්ඛුනිං උපසංකමිත්වා එවං වදෙය්‍ය ‘ඉදං ඛො අය්‍යෙ අය්‍යං උද්දිස්ස චීවරචෙතාපන්නං ආභතං, පටිග්ගණ්හාතු අය්‍යා චීවරචෙතාපන්න’න්ති.

තාය භික්ඛුනියා සො දූතො එවමස්ස වචනීයො ‘න ඛො මයං ආවුසො චීවරචෙතාපන්නං පතිගණ්හාම, චීවරංච ඛො මයං පතිගණ්හාම කාලෙන කප්පියං’ති. සො චෙ දූතො තං භික්ඛුනිං එවං වදෙය්‍ය, ‘අත්ථි පනය්‍යාය කාචි වෙය්‍යාවච්චකරා’ති. චීවරත්ථිකාය භික්ඛවෙ භික්ඛුනියා වෙය්‍යාවච්චකරා නිද්දිසිතබ්බා ආරාමිකා වා උපාසිකා වා එසා ඛො ආවුසො භික්ඛුනීනං වෙය්‍යාවච්චකරා’ති.

සො චෙ දූතො තං වෙය්‍යාවච්චකරං සඤ්ඤපෙත්වා තං භික්ඛුනිං උපසංකමිත්වා එවං වදෙය්‍ය, ‘යං ඛො අය්‍යෙ, අය්‍යා වෙය්‍යාවච්චකරං නිද්දිසි, සඤ්ඤත්තා සා මයා, උපසංකමතය්‍යා කාලෙන, චීවරෙන තං අච්ඡාදෙස්සතී’ති. චීවරත්ථිකාය භික්ඛවෙ භික්ඛුනියා වෙය්‍යාවච්චකරා උපසංකමිත්වා ද්වත්තික්ඛත්තුං චොදෙතබ්බා සාරෙතබ්බා ‘අත්ථො මෙ ආවුසො චීවරෙනා’ති. ද්වත්තික්ඛත්තුං චොදියමානා සාරයමානා තං චීවරං අභිනිප්ඵාදෙය්‍ය, ඉච්චෙතං කුසලං. නො ච අභිනිප්ඵාදෙය්‍ය, චතුක්ඛත්තුං පඤ්චක්ඛත්තුං ඡක්ඛත්තුපරමං තුණ්හීභූතා උද්දිස්ස තිට්ඨමානා තං චීවරං අභිනිප්ඵාදෙය්‍ය, ඉච්චෙතං කුසලං. තතො චෙ උත්තරි වායමමානා තං චීවරං අභිනිප්ඵාදෙය්‍ය, නිස්සග්ගියං පාචිත්තියං.

නො චෙ අභිනිප්ඵාදෙය්‍ය, යතස්සා චීවරචෙතාපන්නං ආභතං තත්ථ සාමං වා ගන්තබ්බං, දූතො වා පාහෙතබ්බො ‘යං ඛො තුම්හෙ ආයස්මන්තො භික්ඛුනිං උද්දිස්ස චීවරචෙතාපන්නං පහිණිත්ථ, න තං තස්සා භික්ඛුනියා කිඤ්චි අත්ථං අනුභොති. යුඤ්ජන්තායස්මන්තො සකං මා වො සකං, විනස්සා’ති. අයං තත්ථ සාමීචි.

චීවරවග්ගො දුතියො

1. යා පන භික්ඛුනී ජාතරූපරජතං උග්ගණ්හෙය්‍ය වා උග්ගණ්හාපෙය්‍ය වා උපනික්ඛිත්තං වා සාදියෙය්‍ය, නිස්සග්ගියං පාචිත්තියං.

2. යා පන භික්ඛුනී නානප්පකාරකං රූපිය සංවොහාරං සමාපජ්ජෙය්‍ය, නිස්සග්ගියං පාචිත්තියං.

3. යා පන භික්ඛුනී නානප්පකාරකං කයවික්කයං සමාපජ්ජෙය්‍ය, නිස්සග්ගියං පාචිත්තියං.

4. යා පන භික්ඛුනී ඌන පඤ්චකඛන්ධනෙන පත්තෙන අඤ්ඤං නවං පත්තං චෙතාපෙය්‍ය, නිස්සග්ගියං පාචිත්තියං. තාය භික්ඛුනියා සො පත්තො භික්ඛුනී පරිසාය නිස්සජ්ජිතබ්බො. යො ච තස්සා භික්ඛුනී පරිසාය පත්ත පරියන්තො, සා තස්සා භික්ඛුනියා පත්තො පදාතබ්බො ‘යං තෙ භික්ඛුනී පත්තො යාව භෙදනාය ධාරෙතබ්බො’ති. අයං තත්‍ථ සාමීචි.

5. යානි ඛො පන තානි ගිලානානං භික්ඛුනීනං පටිසායනීයානි භෙසජ්ජානි සෙය්‍යථීදං, සප්පි නවනීතං තෙලං මධු ඵාණිතං, තානි පටිග්ගහෙත්වා සත්තාහපරමං සන්නිධිකාරකං පරිභුඤ්ජිතබ්බානි. තං අතික්කාමෙන්තියා, නිස්සග්ගියං පාචිත්තියං.

6. යා පන භික්ඛුනී භික්ඛුනියා සාමං චීවරං දත්වා කුපිතා අනත්තමනා අච්ඡින්දෙය්‍ය වා අච්ඡින්දාපෙය්‍ය වා, නිස්සග්ගියං පාචිත්තියං.

7. යා පන භික්ඛුනී සාමං සුත්තං විඤ්ඤාපෙත්වා තන්තවායෙහි චීවරං වායාපෙය්‍ය, නිස්සග්ගියං පාචිත්තියං.

8. භික්ඛුනිං පනෙව උද්දිස්ස අඤ්ඤාතකො ගහපති වා ගහපතානී වා තන්තවායෙහි චීවරං වායාපෙය්‍ය, තත්‍ර චෙ සා භික්ඛුනී පුබ්බෙ අප්පවාරිතා තන්තවායෙ උපසංකමිත්වා චීවරෙ විකප්පං ආපජ්ජෙය්‍ය ‘ඉදං ඛො ආවුසො චීවරං මං උද්දිස්ස වීය්‍යති. ආයතඤ්ච කරොථ විත්ථතඤ්ච අප්පීතඤ්ච සුවීතඤ්ච සුප්පවායිතඤ්ච සුවිලෙඛිතඤ්ච සුවිතච්ඡිතඤ්ච කරොථ, අප්පෙවනාම මයම්පි ආයස්මන්තානං කිඤ්චිමත්තං අනුපදජ්ජෙය්‍යාමා’ති. එවඤ්ච සා භික්ඛුනී වත්වා කිඤ්චිමත්තං අනුපදජ්ජෙය්‍ය අන්තමසො පිණ්ඩපාතමත්තම්පි, නිස්සග්ගියං පාචිත්තියං.

9. දසාහානාගතං කත්තිකතෙමාසිකපුණ්ණමං භික්ඛුනියා පනෙව අච්චෙකචීවරං උප්පජ්ජෙය්‍ය, අච්චෙකං මඤ්ඤමානාය භික්ඛුනියා පටිග්ගහෙතබ්බං, පටිග්ගහෙත්වා යාව චීවරකාලසමයං නික්ඛිපිතබ්බං. තතො චෙ උත්තරි නික්ඛිපෙය්‍ය, නිස්සග්ගියං පාචිත්තියං.

10. යා පන භික්ඛුනී ජානං සංඝිකං ලාභං පරිණතං අත්තනො පරිණාමෙය්‍ය, නිස්සග්ගියං පාචිත්තියං.

ජාතරූපවග්ගො තතියො

උද්දිට්ඨා ඛො අය්‍යායො තිංස නිස්සග්ගියා පාචිත්තියා ධම්මා. තත්ථාය්‍යායො පුච්ඡාමි, කච්චිත්ථ පරිසුද්ධා? දුතියම්පි පුච්ඡාමි කච්චිත්ථ පරිසුද්ධා? තතියම්පි පුච්ඡාමි, කච්චිත්ථ පරිසුද්ධා? පරිසුද්ධෙත්ථාය්‍යායො, තස්මා තුණ්හී, එවමෙතං ධාරායාමීති.

නිස්සග්ගියා පාචිත්තියා නිට්ඨිතා

  1. පාපුරණං (සීහල-ස්‍යාම)