අබ්‍යාකතො ධම්මො අබ්‍යාකතස්ස ධම්මස්ස පුරෙජාතපච්චයෙන පච්චයො, ආරම්මණපුරෙජාතං වත්‍ථුපුරෙජාතං,
ආරම්මණපුරෙජාතං, අරහා චක්ඛුං අනිච්චතො දුක්ඛතො අනත්තතො විපස්සති. සොතං ඝානං ජිව්හං කායං රූපෙ සද්දෙ ගන්‍ධෙ රසෙ ඵොට්ඨබ්බෙ වත්‍ථුං අනිච්චතො දුක්ඛතො අනත්තතො විපස්සති, දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, රූපායතනං චක්ඛු විඤ්ඤාණස්ස පුරෙජාත පච්චයෙන පච්චයො, සද්දායතනං සොතවිඤ්ඤාණස්ස, ගන්‍ධායතනං ඝානවිඤ්ඤාණස්ස, රසායතනං ජිව්හා විඤ්ඤාණස්ස, ඵොට්ඨබ්බායතනං කායවිඤ්ඤාණස්ස, පුරෙජාතපච්චයෙන පච්චයො.
වත්‍ථු පුරෙජාතං, චක්ඛායතනං චක්ඛුවිඤ්ඤාණස්ස පුරෙජාත පච්චයෙන පච්චයො, සොතායතනං සොතවිඤ්ඤාණස්ස, ඝානායතනං ඝානවිඤ්ඤාණස්ස, ජිව්හායතනං ජිව්හාවිඤ්ඤාණස්ස, කායායතනං කායවිඤ්ඤාණස්ස පුරෙජාතපච්චයෙන පච්චයො, වත්‍ථු විපාකාබ්‍යාකතානං කිරියාබ්‍යාකතානං ඛන්‍ධානං පුරෙජාතපච්චයෙන පච්චයො.
අබ්‍යාකතො ධම්මො කුසලස්ස ධම්මස්ස පුරෙජාතපච්චයෙන පච්චයො, ආරම්මණපුරෙජාතං වත්‍ථුපුරෙජාතං,
ආරම්මණපුරෙජාතං සෙක්ඛා වා පුථුජ්ජනා වා චක්ඛුං අනිච්චතො දුක්ඛතො අනත්තතො විපස්සන්ති. සොතං ඝානං ජිව්හං කායං රූපෙ සද්දෙ ගන්‍ධෙ රසෙ ඵොට්ඨබ්බෙ වත්‍ථුං අනිච්චතො දුක්ඛතො අනත්තතො විපස්සන්ති, දිබ්බෙන චක්ඛුනා රූපං පස්සන්ති, දිබ්බාය සොතධාතුයා සද්දං සුණන්ති.
වත්‍ථුපුරෙජාතං, වත්‍ථු කුසලානං ඛන්‍ධානං පුරෙජාතපච්චයෙන පච්චයො.
අබ්‍යාකතො ධම්මො අකුසලස්ස ධම්මස්ස පුරෙජාතපච්චයෙන පච්චයො, ආරම්මණපුරෙජාතං වත්‍ථුපුරෙජාතං,
ආරම්මණපුරෙජාතං, චක්ඛුං අස්සාදෙති, අභිනන්‍දති, තං ආරබ්භ රාගො උප්පජ්ජති, දිට්ඨි උප්පජ්ජති විචිකිච්ඡා උප්පජ්ජති, උද්ධච්චං උප්පජ්ජති, දොමනස්සං උප්පජ්ජති, සොතං ඝානං ජිව්හං කායං රූපෙ සද්දෙ ගන්‍ධෙ රසෙ ඵොට්ඨබ්බෙ වත්‍ථුං අස්සාදෙති, අභිනන්‍දති, තං ආරබ්භ රාගො උප්පජ්ජති, -පෙ- දොමනස්සං උප්පජ්ජති,
වත්‍ථුපුරෙජාතං, වත්‍ථු අකුසලානං ඛන්‍ධානං පුරෙජාතපච්චයෙන පච්චයො.