කම්මට්ඨාන සඞ්ගහ විභාගො

2. තත්ථ සමථ සඞ්ගහෙ තාව දසකසිණානි, දස අසුභා, දස අනුස්සතියො, චතස්සො අප්පමඤ්ඤායො, එකාසඤ්ඤා, එකං වවත්ථානං, චත්තාරො ආරුප්පා චෙති සත්තවිධෙන සමථ කම්මට්ඨාන සඞ්ගහො.

3. රාග චරිතා, දොස චරිතා, මොහ චරිතා, සද්ධා චරිතා, බුද්ධි චරිතා, විතක්ක චරිතා, චෙති ඡබ්බිධෙන චරිත සඞ්ගහො.

4. පරිකම්ම භාවනා, උපචාර භාවනා, අප්පණා භාවනා චෙති තිස්සො භාවනා.

5. පරිකම්ම නිමිත්තං, උග්ගහ නිමිත්තං, පටිභාග නිමිත්තං චෙති තීණි නිමිත්තානි වෙදිතබ්බානි, කථං.

6. පඨවි කසිණං, ආපො කසිණං, තෙජො කසිණං, වායො කසිණං, නීල කසිණං, පීත කසිණං, ලොහිත කසිණං ඔදාත කසිණං, ආකාස කසිණං, ආලොක කසිණං චෙති ඉමානි දස කසිණානි නාම.

7. උද්ධුමාතකං, විනීලකං, විපුබ්බකං, විච්ඡිද්දකං, වික්ඛායිතකං, වික්ඛිත්තකං, හතවික්ඛිත්තකං, ලොහිතකං, පුළවකං, අට්ඨිකං චෙති ඉමෙ දස අසුභානාම.

8. බුද්ධානුස්සති, ධම්මානුස්සති, සඞ්ඝානුස්සති, සීලානුස්සති, චාගානුස්සති, දෙවතානුස්සති, උපසමානුස්සති, මරණානුස්සති, කායගතාසති, ආනාපානසති, චෙති ඉමා දස අනුස්සතියො නාම.

9. මෙත්තා, කරුණා, මුදිතා, උපෙක්ඛා චෙති ඉමා චතස්සො අප්පමඤ්ඤායො නාම. බ්‍රහ්ම විහාරොති ච පවුච්චති.

10. ආහාරෙ පටික්කූල සඤ්ඤා එකසඤ්ඤා.

11. චතුධාතු වවත්ථානං එකං වවත්ථානං.

12. ආකාසානඤ්චායතනාදයො චත්තාරො ආරුප්පනාමාති සබ්බථාපි සමථ නිද්දෙසෙ චත්තාලීස කම්මට්ඨානානි භවන්ති.

13. චරිතාසු පන දස අසුභා කායගතා සති සඞ්ඛාතා කොට්ඨාස භාවනාච රාගචරිතස්ස සප්පායා.

14. චතස්සො අප්පමඤ්ඤායො නීලාදීනිච චත්තාරි කසිණානි දොසචරිතස්ස.

15. ආනාපානං මොහචරිතස්ස විතක්ක චරිතස්සච.

16. බුද්ධානුස්සති ආදයො ඡ සද්ධාචරිතස්ස.

17. මරණ උපසමසඤ්ඤා වවත්ථානානි බුද්ධිචරිතස්ස.

18. සෙසානි පන සබ්බානිපි කම්මට්ඨානානි සබ්බෙ-

සම්පි සප්පායානි, තත්ථාපි කසිණෙසු පුථුලං මොහචරි-

තස්ස, ඛුද්දකං විතක්ක චරිතස්සෙවාති.